မဲခေါင်၊ နိုဝင်ဘာ ၁၃
ရှမ်းပြည်တောင်ပိုင်း၊ ပအိုဝ်းဒေသရှိ ကျေးရွာများတွင် နေထိုင်သော စစ်သင်တန်း မတက်ဖူးသည့် အမျိုးသားများကိုပါ စစ်ကောင်စီလက်အောက်ခံ PNO ပြည်သူ့စစ်က အလှည့်ကျ ရှေ့တန်းသို့ ပို့ဆောင်နေသည် ဟု ကိုယ်တွေ့ကြုံသူများထံမှ သိရသည်။
အရွယ်ရောက်ပြီး ကျောင်းတက်ခြင်း မရှိတော့သည့် အမျိုးသားများအားလုံးကို အလှည့်ကျ တစ်ကြိမ်လျှင် ရက် ၂၀ ဖြင့် ရှေ့တန်းသို့ သွားရခြင်းဖြစ်ပြီး ထိုသို့ သွားရာတွင် ယူနီဖောင်း၊ စားစရိတ်ကအစ ကိုယ့်အစီစဉ်နှင့်ကိုယ် သွားရသည်ဟု ကိုယ်တိုင်ကြုံတွေ့သူများက ပြောသည်။
ယခင်တွင် အသက် ၁၈ နှစ်ပြည့်ပြီး ကျောင်းမတက်တော့သည့် သူများသာ သွားရမည်ဟု ဆိုသော်လည်း လက်ရှိတွင် အသက် ၁၈ နှစ် မပြည့်သော်လည်း ရှေ့တန်းသို့ အလှည့်ကျသွားရကြောင်း မသွားလိုပါက လူငှားထည့်ရပြီး တစ်ကြိမ်လျှင် လူငှားရမ်းခမှာ ၁၂ သိန်းမှ သိန်း ၂၀ ထိရှိသဖြင့် ငှားရမ်းနိုင်ခြင်းမရှိသူများ ရှေ့တန်းသို့ စစ်ပညာအသိမရှိဘဲ သွားနေရကြောင်း ကိုယ်တိုင်ရှေ့တန်းအပို့ခံရသူ တစ်ဦးက ရှင်းပြသည်။
“စစ်သင်တန်း တက်ရတဲ့သူရော မတက်ရတဲ့သူရော တစ်ရွာလုံး အလှည့်ကျသွားရတယ်။ တစ်ခါခေါ်ရင် တစ်ရွာကို ၂ ယောက်ကနေ ၆ ယောက်အထိ သွားရတာရှိတယ်။ ယူနီဖောင်း၊ တကိုယ်ရည်သုံးပစ္စည်းကအစ ကိုယ့်ဘာသာကိုယ် စီစဉ်ပြီး သူတို့ပြောတဲ့စုရပ်နေရာကိုသွားရတယ်။ ပြီးရင် သူတို့ပို့တဲ့ ရှေ့တန်းကို သွားရတယ်။ တချို့က ပင်လောင်း – ဖယ်ခုံနယ်စပ်သွား တချို့က ဆီဆိုင် – လွိုင်ကော်နယ်စပ်သွားရတယ်။ တချို့ကတော့ ဦးအောင်ခမ်းထီနေတဲ့ ကျောက်တလုံးကြီးကို ကာကွယ်ဖို့ ကျောက်တလုံးကြီးတောင်ဘက်မှာရှိတဲ့ ထီခွဘက်ကို သွားရတယ်” စစ်သင်တန်းမတက်ရဘဲ ကိုယ်တိုင်ရှေ့တန်းအပို့ခံရသည့် တောင်ကြီးမြို့နယ် တောင်ပိုင်းကျေးရွာတစ်ရွာမှ ပအိုဝ်းဒေသခံတစ်ဦးက ပြောသည်။
ထိုသို့ စစ်သင်တန်းမတက်ရဘဲ ရှေ့တန်းသို့ အပို့ခံရသော ဒေသခံများတွင် တိုက်ပွဲဖြစ်ပွားသည်နှင့် ကြုံကာ သေဆုံးသွားသူများ၊ အဖမ်းခံရသူများလည်းရှိကြောင်း သိရသည်။
“ကောင်ထိုဖက်မှာ တိုက်ပွဲဖြစ်တော့ ကျွန်တော်တို့က ရှေ့ဆုံးမှာမဟုတ်တော့ မတိုက်ရဘူး။ အဲ့မှာ ရှေ့ကနေတိုက်ရတဲ့အဖွဲ့ထဲက တီးတူးက အဖမ်းခံရတယ်လို့ သတင်းတက်လာမှ သိရတယ်။ သေတဲ့လူတွေကလည်း သေကြတယ်။ သင်တန်းမတက်ရဘူးလေ။ ကျွန်တော်ကလည်း အဲ့ကနေ ပြန်လာတာနဲ့ ထိုင်းကို လာလိုက်တာ ရွာမှာဆက်နေရင် နောက်တစ်ခါ ရှေ့တန်းထပ်သွားရမှာ ကြောက်လို့”ဟု လက်ရှိ ထိုင်းနိုင်ငံတွင် နေထိုင်သူ ခွန်ဇော်သိန်း(အမည်လွှဲ)က ပြောသည်။
၎င်းပြောပြချက်အရ ခွန်တီးတူးသည် တောင်ကြီးမြို့နယ် ဟမ်းဖို့ကြီးကျေးရွာမှဖြစ်ပြီး စစ်သင်တန်းမတက်ရဘဲ ဆီဆိုင် – လွိုင်ကော်နယ်စပ်ရှိ ရှေ့တန်းသို့ အပို့ခံရသဖြင့် တိုက်ပွဲဖြစ်ပွားရာတွင် တော်လှန်ရေးတပ်ဖွဲ့များ၏ ဖမ်းဆီးခြင်းကို ခံခဲ့ရသည်။
၎င်းပြောသည့် ခွန်တီးတူးဆိုသူမှာ ပြီးခဲ့သည့် သြဂုတ် ၆ ရက်တွင် ဆီဆိုင်မြို့နယ် ကောင်ထိုကျေးရွာအနီး တိုက်ပွဲဖြစ်ပွားစဉ်အတွင်း အမှတ် – ၁၀၀၅ တပ်ရင်း၊ ရှမ်းတောင် PDF မှ စစ်သုံ့ပန်းအဖြစ် ဖမ်းဆီးမိခဲ့သူ ဖြစ်သည်။
ခွန်တီးတူးအဖမ်းခံရပြီးနောက် PNO ပြည်သူ့စစ်က ၎င်း၏ မိသားစုဝင်များကို ကက္ကူရှိ PNO စစ်ဦးစီးချုပ် ဗိုလ်မှူးကြီးခွန်မြင့်အောင်က နေအိမ်သို့ခေါ်ယူပြီး ဆွမ်းသွပ်အမျှဝေပေးရန်သာ ပြောဆိုခဲ့သည်ဟု ၎င်းနှင့် အတူ ရှေ့တန်းအပို့ခံရသည့် ခွန်ဇော်သိန်းက ပြောသည်။
ယခုကိစ္စနှင့်ပတ်သက်ပြီး PNO စစ်ဦးစီးချုပ် ဗိုလ်မှူးကြီးခွန်မြင့်အောင်ကို ဆက်သွယ်မေးမြန်းသော်လည်း ပြန်လည်ဖြေကြားခြင်း မရှိသေးပေ။
စစ်ကောင်စီလက်အောက်ခံ PNO ပြည်သူ့စစ်သည် လက်ရှိအချိန်တွင်လည်း ရှမ်း-ကရင်နီတွင် စစ်ကောင်စီနှင့်အတူ ပူးတွဲကာ စစ်ကြောင်းထိုးတိုက်ခိုက်နေသည်။
#MeKongNews
#ရှမ်းတောင်
#PNO
#ပအိုဝ်းဒေသ
#ရှေ့တန်းပို့
ပုံအညွှန်း – စစ်သင်တန်းမတက်ရပဲရှေ့တန်းအပို့ခံရသဖြင့် အဖမ်းခံရသည့် ခွန်တီးတူး
