မဲခေါင်၊ အောက်တိုဘာ ၃၀
အောက်တိုဘာ ၂၉ ရက်နံနက်အစောပိုင်းတွင် မြန်မာစစ်ဘက်ဆိုင်ရာတာဝန်ရှိသူများက မဲခေါင်မြစ်ကို ဖြတ်ကျော်ပြီး တာချီလိတ်ကျားဖြန့်လုပ်ငန်းတွင် ပိတ်မိနေခဲ့သော ၂၉ နှစ်အရွယ် မလေးရှားအမျိုးသမီး မစ္စလမ်းဆိုသူကို ထိုင်းလူဝင်မှုကြီးကြပ်ရေးရဲတပ်ဖွဲ့ထံ လွှဲပြောင်းပေးခဲ့ကြောင်းနှင့် ယင်းအမျိုးသမီး သည် ၃ နှစ်ကြာ ပြင်ပနှင့်အဆက်အသွယ်မရခဲ့ဘဲ နှိပ်စက်မှုများစွာခံခဲ့ရကြောင်း မေးမြန်းစစ်ဆေးမှု၌ ထုတ်ဖော်ပြောဆိုသွားခဲ့သည်။
မစ္စလမ်းသည် ၂၀၂၂ ခုနှစ်က မိခင်လေဖြတ်သွားသောကြောင့် ဆေးကုသစားရိတ်များကုန်ကျသဖြင့် မိသားစု စုဆောင်းထားသည့်ငွေများကုန်သွားသဖြင့် အွန်လိုင်းမှ အလုပ်အကိုင်ရှာဖွေရာစင်ကာပူ၌ အမျိုးသမီးစားပွဲထိုးအလုပ်ရနိုင်မည့်ကြော်ငြာကို တွေ့ခဲ့ကြောင်း၊ ထို့ကြောင့် အေးဂျင့်နှင့်ချိတ်ဆက်ရာ Work Permit ရရေး လုပ်ဆောင်စရာရှိသည်ဟုဆိုပြီး ထိုင်းသို့ ခေါ်ဆောင်ကာ ကရင်ပြည်နယ်နှင့် ထိုင်း နယ်စပ် မဲဆောက်မြို့သို့ ကားဖြင့်ခေါ်သွားပြီးနောက် မြ၀တီရှိ နာမည်ကြီး KK Park ကျားဖြန့် လုပ်ငန်း သို့ လူမှောင်ခိုကူးပို့ဆောင်ခံရသည်ဟု ထွက်ဆိုခဲ့သည်။
ကျားဖြန့်လုပ်ငန်းများကို လုပ်နေရင်းမှ မကြာခဏဆိုသလို ဘာသာပြန်လုပ်ပေးရသည့်တိုင် အနည်းဆုံး ၁၀ ကြိမ်ထက်မနည်း ရေပိုက်လုံးဖြင့် ရိုက်နှက်ခံခဲ့ရကြောင်း၊ ထို့နောက် Huanya Park ကျားဖြန့်ဝင်းသို့ ရောင်းစားခံရပြီး ၂၀၂၅ ခုနှစ် ဇွန်လ တွင် တာချီလိတ်ရှိ ကျားဖြန့်ရုံတစ်ခုသို့ ထပ်မံရောင်းစားခံရကြောင်း၊ တာချီလိတ်ကျားဖြန့်လုပ်ငန်းတွင် ရှိနေစဉ် ဖမ်းဆီးထားသူများက မိသားစုထံ ဆက်သွယ်ပြီး ပြန်ပေးငွေ ဘတ် ၂၀၀၀၀၀ (ဒေါ်လာ ၆၂၀၀) ပေးပါက လွှတ်ပေးမည်ဟု ဆက်သွယ်ကြောင်း၊ ထို့ကြောင့် မိသားစုဝင်များက Mirror Foundation နှင့် ချိတ်ဆက်အကူအညီတောင်းရာမှ ထိုင်းအာဏာပိုင်များနှင့် ပူးပေါင်းပြီး မစ္စလမ်းကို ကယ်ထုတ်နိုင်ခဲ့ခြင်းဖြစ်သည်။
လတ်တလောမေးမြန်းစစ်ဆေးမှုများအရ မစ္စလမ်းသည် ထိုင်းလူမှုဖွံ့ဖြိုးရေးနှင့်လူသားလုံခြုံရေးဝန် ကြီးဌာန၊ စုံစမ်းစစ်ဆေးရေးမှူးများ၊ လ၀က အရာရှိများက ဓားစာခံအဖြစ် လူမှောင်ခိုကူးခံရသူအဖြစ် သတ်မှတ်ကြောင်း ထိုင်းဒုရဲမှူးကြီး ထရိုင်ရောင်က ထုတ်ဖော်ပြောဆိုခဲ့သည်။
သို့သော် ချင်းရိုင်ခရိုင်ရှိ လူမှောင်ခို ဓားစာခံစောင့်ကြည့်ရေးနှင့်ဝန်ဆောင်မှုစင်တာက မစ္စလမ်းအား ၁ ရက်မှ ၁၅ ရက်အတွင်း စိတ်ပိုင်း၊ ရုပ်ပိုင်းဆိုင်ရာ အဆင်သင့်ဖြစ်စေရန် ကူညီဖေးမှုနှင့်အတူ စုံစမ်းမေး မြန်းမှုများထပ်လုပ်ပြီးလျှင် လူမှောင်ခိုကူးခံရသည်မှာ သေချာသည်ဟု ဆုံးဖြတ်ချက်အတည်ချပြီးပါက မလေးရှားသံရုံးနှင့်ချိတ်ဆက်ပြီး ပြည်တော်ပြန်ပို့ပေးသွားမည်ဟု သိရသည်။
ကိုကလင်း
Ref: Khaosod
#MeKongNews
#ကျားဖြန့်
#တာချီလိတ်
#မလေးရှား
#မြဝတီ
#လူမှောင်ခို
#ထိုင်းနိုင်ငံ
