မဲခေါင်၊ စက်တင်ဘာ ၁၂
လစဉ် သွေးအလုံး ၃၀၀ ဝန်းကျင်လိုအပ်ချက်ရှိသည့် ကျိုင်းတုံမြို့တွင် သွေးလှူရှင်နည်းပါးနေ၍ လိုအပ်သည့် သွေးကို ရှာဖွေရန် အချိန်များစွာ ပေးနေရကြောင်း ကျိုင်းတုံဒေသခံများထံမှ သိရသည်။
ကျိုင်းတုံမြို့ရှိ လူနာအတွက် သွေးတစ်လုံးလိုအပ်ပါက ၃၊ ၄ရက် အချိန်ပေးရှာဖွေနေရပြီး သွေးလှူဒါန်းခြင်းသည် အန္တရာယ်မရှိပဲ လူတစ်ယောက်၏ အသက်ကို ကယ်တင်နိုင်သော်လည်း ယင်းအသိနည်းသည့်အတွက် လှူဒါန်းသူနည်းပါးနေကြောင်း သွေးလိုအပ်ပါက ကူညီရှာဖွေပေးနေသူတစ်ဦးက ပြောသည်။
“ကျိုင်းတုံမှာက သွေးလိုအပ်တဲ့ လူနာတွေက များပြီး သွေးလှူရှင်တွေက အရမ်းနည်းပါတယ်။ တချို့လူနာတွေက ကုန်ပစ္စည်းလို အဆင့်သင့် အများကြီး ရှိတယ်ထင်ပြီး အခုချက်ချင်း လိုတယ်တွေ ပြောတာ။ တကယ်တမ်းမှာ သွေးတလုံးကို ၃-၄ ရက် ပတ်ရှာတာတောင် မရတာတွေ အများကြီးပါ” ဟု ၎င်းက ပြောသည်။
ကျိုင်းတုံမြို့ရှိ ဆေးရုံ၊ ဆေးခန်းများအတွက် လစဉ် သွေးလိုအပ်ချက်သည် အလုံးရေ ၃၀၀ ဝန်းကျင် ရှိမည်ဟု ခန့်မှန်းရသော်လည်း သွေးလှူသူ နည်းပါးလွန်းသဖြင့် အချိန်များစွာ ပေးကာ ရှာဖွေနေရသကဲ့သို့ ပုံမှန်လှူဒါန်းနေကြ လူများပင် လှူပေးရသည်မှာ အလျှင်မမှီဖြစ်နေရ၍ ကျိုင်းတုံမြို့ပေါ်ရှိ လူနာများ၊ ငွေကြေး ရှိသူများအနေနှင့် မိမိအသိုင်းအဝိုင်းတွင် ရှာဖွေပြီး အချင်းချင်း လှူဒါန်းပေးနိုင်ပါက ပိုအဆင်ပြေနိုင်ကြောင်း ပရဟိတ လုပ်ကိုင်နေသူတစ်ဦးက ပြောသည်။
“သွေးလှူတဲ့ အဖွဲ့တွေက ဘက်ဂျက်မရှိတော့ ရေရှည် မရပ်တည်နိုင်ကြတော့ဘူး။ သွေးလှူရှင်ကိုပဲ အဟာရလှူလိုက်တာမို့ သွေးကိစ္စ သီးသန့် လုပ်ပေးတဲ့ အဖွဲ့အစည်းတွေ မလွယ်ဘူး။ ဒါတင်မက သက်ဆိုင်ရာ ဌာနတွေကလည်း ပူးပေါင်း ပါဝင်မှု မရှိဘူး” ဟု ၎င်းက ပြောသည်။
သွေးလိုအပ်ချက် မြင့်မားနေသလို ကြားထဲတွင် သွေးအလွဲသုံးစား ပြုလုပ်သူများ၊ ရောင်းစားနေကြသူများ ရှိနေသည့်အတွက် သွေးလှူရသည့် ကိစ္စများ ကူညီရာတွင် စိတ်ပျက်စရာ အခြေအနေများလည်း ရှိနေသည်ဟု ဒေသခံများကဆိုသည်။
သွေးလှူချင်သူများအနေဖြင့် အသက် ၁၈ နှစ်မှ ၅၅ နှစ်အတွင်း ကိုယ်အလေးချိန် ၁၂၀ ရှိသူ မည်သူမဆို လှူဒါန်းနိုင်ပြီး အိပ်ရေးဝစွာ အိပ်ထားပြီး အရက်သေစာသောက်စားထားခြင်း မရှိသူ၊ လက်တလော ရောဂါဝေဒနာ မရှိသူ နှင့် လွန်ခဲ့သော ၆ လအတွင်း ဆေးမှင်ကြောင်၊ ဆေးအပ်စိုက်ခြင်း နှင့် နားဖောက်ခြင်း မရှိသူတို့ ဖြစ်ရမည် ဟု အမျိုးသားသွေးလှူဘဏ်က သတ်မှတ်ထားသည်။
ကိုယ်ဝန်ဆောင် အမျိုးသမီးများ နှင့် နို့တိုက်ခြင်း၊ လက်တလော ဓမ္မတာ လာနေသူများအနေနှင့်လည်း သွေးလှူရန် မသင့်တော်ဘဲကျန်းမာသူ မည်သူမဆို သွေးလှူဒါန်းနိုင်ပြီး အန္တရာယ် မရှိပဲ လူ့အသက်တစ်ချောင်းကို ကယ်တင်နိုင်ပေးနိုင်ကြောင်း တိုက်တွန်းထားသည်။
#MeKongNews
#ကျိုင်းတုံမြို့
#သွေးလှူဒါန်းမှု
#သွေးလှူရှင်
#ရှမ်းပြည်အရှေ့ပိုင်း
