မဲခေါင်၊ သြဂုတ် ၂၀

ရှမ်းပြည်တောင်ပိုင်း၊ လဲချားမြို့နယ်မှ ၇၅၈ ဝမ်ပန်ပြည်သူ့စစ်သည် ကွတ်တောင်းနှင့် လွယ်တီးရှိ ကျားဖြန့် လုပ်ငန်းများကို ပြည်သူ့စစ်ဝတ်စုံ ဝတ်ဆင်စေကာ အကာအကွယ်ပေးနေသည်ဟု ဒေသခံများက မဲခေါင်သို့ ပြောသည်။

ပြီးခဲ့သည့် ဇူလိုင်လကုန်ပိုင်းက သတင်းပေါက်ကြားမှုကြောင့် ကျိုင်းတုံနှင့် မိုင်းနောင်မှ စစ်တပ် စစ်ကြောင်းများ လိုက်လံရှာဖွေသော်လည်း ပြည်သူ့စစ်ခေါင်းဆောင် စိုင်းဆေးစင့်က နေရာဟောင်းများကိုသာ လိုက်ပြခဲ့ပြီး မရှိတော့ကြောင်း လိမ်ညာခဲ့သည် ဟု ဒေသခံသတင်းအရင်းအမြစ်က ပြောသည်။

“ကြားတာတော့ စစ်ကြောင်းတွေ တောနင်းရှာမှာကို ခိုလမ် ရလခတိုင်းမှူးက ဟန့်တားတယ်ကြားတယ်။ လဲချားဗျူဟာနဲ့လည်း စိုင်းဆေးစင့်က အဆင်ပြေနေတော့လေ။ ကျားဖြန့်တွေကတော့ ဝမ်ပန်၊ နောင်ဟင်၊ နားနိုင်းဘက်တွေမှာလည်း ရှိနေတယ်” ဟု ၎င်းက ပြောသည်။

လဲချား (၇၅၈)ဝမ်ပန်ပြည်သူ့စစ် စိုင်းဆေးစင့် သည် ကျားဖြန့်လုပ်ကိုင်နေသည့် တရုတ်များကို နောင်ဟင်ပြည်သူ့စစ် ဝတ်စုံ အကာအကွယ်ဖြင့် ဆက်လက်နေထိုင် အလုပ်လုပ်ခွင့်ပြုနေကြောင်း သိရသည်။

အလားတူ စိုင်းကောဆိုသူကို လုံခြုံရေးတာဝန်ပေးထားပြီး နားနိုင်းရွာအနီးတွင်လည်း ကျားဖြန့်လုပ်ငန်းများ ရှိနေသည်ဟု ဆိုသည်။

စိုင်းဆေးစင့်သည် ၇၅၈ ဝမ်ပန်ပြည်သူ့စစ်အကြီး အကဲဖြစ်ပြီး လုပ်ငန်းအားလုံးကို ဒေသဆိုင်ရာ စစ်ဖက်၊ အရပ်ဘက်များနှင့် အပေးအယူ နားလည်မှုများဖြင့် ပြုလုပ်နေသည်ဟု အကြောင်းသိ ဒေသခံများထံက စုံစမ်းသိရသည်။

၇၅၈ ပြည်သူ့စစ်သည် စစ်တပ်၏ လက်အောက်ခံဖြစ်ပြီး ဒေသအရ ဝမ်ပန်၊ နားပွဲ စသည်ဖြင့် ဖွဲ့စည်းထားရှိပြီး ရှမ်ပြည်တောင်ပိုင်း နမ့်စန်၊ မိုင်းကိုင်၊ ကျေးသီးများဘက်၌ ဖွဲ့စည်းထားရှိနေကြောင်း သိရသည်။

ပြီးခဲ့သည့် ၂၀၁၉ ခုနှစ် သြဂုတ်လ ၂၂ နှင့် ၂၃ ရက်များကလည်း သျှမ်းပြည်တောင်ပိုင်း နမ့်စန်မြို့နယ် နားပြဲ ကျေးရွာအုပ်စု ခေးနင်းကျေးရွာနှင့် လဲချားမြို့နယ် နမ့်ဟူးဘုရားဂူ အကြားရှိ ၇၅၈ ပြည်သူ့စစ်တပ်ဖွဲ့(နားပွဲ)၏ မူးယစ်ဆေးဝါးထုတ်လုပ်သည့် စက်ရုံအား ခလရ ၁၅၂ မှ ဝင်ရောက်စီးနင်း ဖမ်းဆီးခဲ့သေးကြောင်း သိရသည်။

#MeKongNews
#လဲချားမြို့နယ်
#ဝမ်ပန်ပြည်သူ့စစ်
#၇၅၈ပြည်သူ့စစ်
#ကျားဖြန့်လုပ်ငန်း
#ရှမ်းပြည်တောင်ပိုင်း
#ခိုလမ်ရလခတိုင်းမှူး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)