မဲခေါင်၊ ဧပြီ ၇

ရှမ်းပြည်တောင်ပိုင်း၊ မိုင်းနောင်မြို့မှတဆင့် တရုတ်ပြည်သို့ တင်ပို့ရောင်းချနေသည့် ပြောင်းတင်ကားများကို မိုင်းနောင်မြို့ စစ်ကောင်စီစစ်ဆေးရေးဂိတ်က ပြောင်းလုပ်ငန်းပိုင်ရှင်များကိုယ်တိုင် သတင်းပို့ရန် တင်းကြပ်နေသဖြင့် ပြောင်းကုန်သည်များ အခက်တွေ့နေကြကြောင်း သိရသည်။

မတ်လ ၂၈ရက် လှုပ်ခတ်ခဲ့သည့် ငလျင်ကြောင့် အင်တာနက်လိုင်းများ ပြတ်တောက်သည့်အတွက် ဧပြီတစ်လလုံး ပို့ကုန်လိုင်စင် လျှောက်ထားရန်မလိုဘဲ ပို့ကုန်ကြေညာလွှာဖြင့် တိုက်ရိုက်တင်ပို့နိုင်ကြောင်း ဖြေလျော့ပေးထားသော်လည်း မိုင်းနောင်အခြေစိုက် စကခ ၂ က ပြောင်းကားများကို ပိုင်ရှင်ကိုယ်တိုင် လာရောက်အကြောင်းကြားရန် တင်းကြပ်နေခြင်းဖြစ်ကြောင်း ပြောင်းကားယာဉ်မောင်းတစ်ဦးက မဲခေါင်ကိုပြောသည်။

“အရင်ကအတိုင်းသွားတာ ပိုင်ရှင်ကိုယ်တိုင် သတင်းပို့ရမယ်​​ပြောလာလို့ လှမ်းခေါ်ရတယ်။ သူဌေးမက နီးလို့ လာနိုင်ခဲ့တာ၊ ဘာတွေပြောပြီး ဘာတွေဘယ်လို ညှိလည်း မသိရဘူး။ သူဌေး မလာနိုင်သေးတဲ့ ကားတွေတော့ ရပ်ထားနေရဆဲပဲ” ဟု ၎င်းက ပြောသည်။

ဧပြီလ ၁ ရက် မတိုင်မီက ၁၇ တန်တင် ပြောင်းကားတစ်စီးလျင် မိုင်းနောင်ဂိတ်တွင် ကျပ်ငွေ ၅ သိန်းစီ ပေးဆောင်၍ သွားနေကြရာမှ ယခုအခါ ပိုင်ရှင်ကိုယ်တိုင် လာရောက်ရန် တင်းကြပ်လာခြင်းဖြစ်သည်။

အင်တာနက်လိုင်းများမကောင်းသည့်အတွက် ပို့ကုန်ကြေညာလွှာဖြင့်သာ တင်ပို့ခွင့်ပြုလိုက်ရာ ပြောင်းတင်ပို့သူများ ဝန်ပေါ့သွားသော်လည်း ယခုကဲ့သို့ ပိုင်ရှင်ကိုယ်တိုင် လာရောက်သတင်းပို့ရမည်ဆိုသည့်အတွက် ပိုမိုအခက်တွေ့သွားကြောင်း၊ မည်သည့်အတွက်ကြောင့် ပိုင်ရှင်ကိုယ်တိုင် လာရောက်သတင်းပို့ခိုင်းသည်ကို မသိရကြောင်း ပြောင်းကုန်သည်တစ်ဦးက ပြောသည်။

“အခုလကုန်အထိ အကောက်ခွန်ကြေညှာလွှာနဲ့ပဲ သွားလို့ရမယ်ဆိုလို့ ဝန်ပေါ့ပြီတွက်တာ၊ ခုတော့ပိုဆိုး၊ အဝေးရောက်နေတဲ့ပိုင်ရှင်ဆို ပိုခက်တော့တာပေါ့” ၎င်းက ပြောသည်။

ပြောင်းကားများကို တာချီလိတ်ဘက်မှတဆင့် ထိုင်းနိုင်ငံဘက်သို့လည်ကောင်း၊ မိုင်းနောင် -ကျေးသီးမှတဆင့် မိုင်းရယ်-တန့်ယန်ကို ဖြတ်ကာ တရုတ်နိုင်ငံဘက်သို့လည်ကောင်း လမ်းကြောင်း ၂ ခုဖြင့် တင်ပို့နေခြင်းဖြစ်ပြီး တာချီလိတ်လမ်းကြောင်းတွင် မည်သည့် အတားအဆီးမျှ မရှိဘဲ ပုံမှန်သွားလာ၍ ရနေကြောင်း၊ မိုင်းနောင်လမ်းကြောင်းတွင်သာ ယခုကဲ့သို့ ပိုင်ရှင်ကိုယ်တိုင် လာရောက်သတင်းပို့ခိုင်းခြင်းဖြစ်ကြောင်း ပြောင်းကုန်သည်များထံမှ သိရသည်။

လက်ရှိပြောင်းဈေးမျာ တရုတ်ပြည်အရောက် စက်ရုံချ တစ်တန်လျင် ၂၆၅၀ မှ ၂၆၈၀ ယွမ်၊ ထိုင်းနိုင်ငံ စက်ရုံအရောက် တစ်တန်လျင် ၁၀၂၀၀ မှ ၁၀၆၀၀ ဘတ်စျေးရှိနေပြီး ယခင်နှစ်က ရောင်းစျေးမတက်သည့်အတွက် ယခုနှစ်တွင် ပြည်တွင်းစိုက်ဧက လျော့နည်းကာ အထွက်နှုန်းလည်း လျော့နည်းနေကြောင်း ပြောင်းစျေးကွက်မှ သိရသည်။

မဟာ
#MeKongNews
#ပြောင်းဈေးကွက်
#မိုင်းနောင်
#ပို့ကုန်ကြေညာလွှာ
#ပို့ကုန်လိုင်စင်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)