မဲခေါင်၊ မတ် ၂၁
ရှမ်းပြည်အရှေ့ပိုင်း၊ ကျိုင်းတုံမြို့မှာ နှစ်စဉ်ကျင်းပသည့် စော်ဘွားစျေးနေ့ မတ်လ ၂၀ ရက် နံနက်ပိုင်းက ကျင်းပခဲ့ကြောင်း ဒေသခံများထံက သိရသည်။
စော်ဘွားစျေးကျင်းပသည့် ရက်တွင် ကျိုင်းတုံမြို့မစျေးအားပိတ်ထားပြီး စျေးသည်များအားလုံး စော်ဘွားစျေးတွင် လာရောက်ရောင်းချကြကာ မြို့သူမြို့သားများ၊ ဧည့်သည်များ သွားရောက်လည်ပတ်စျေးဝယ်ထွက်ကြရာ ယခုနှစ်တွင် မနက်ပိုင်းက တိုးမပေါက်အောင် လူစည်ကားခဲ့သည်ဟု သိရသည်။
ယခုနှစ် ဝမ်းကတ်ကောင်ဝ်(ဝၼ်းၵၢတ်ႇၵဝ်ႇ)(စျေးဟောင်းနေ့)ကို မတ်လ ၁၉ ရက်နေ့(အကြို့နေ့) ညနေပိုင်းတွင် စျေးစတင် တည်ခင်းရောင်းချခဲ့ပြီး မတ်လ ၂ဝ ရက် စော်ဘွားစျေးကို နံနက် ၆ နာရီခန့်မှ စတင်ပြီး နံနက် ၉ နာရီမှ ၁၁ နာရီခန့်အချိန်သည် အစည်ကားဆုံးအချိန်ဖြစ်ကြောင်း သိရသည်။
“မိုးဖွဲဖွဲ ကျနေတဲ့အထဲက အနွေးထည်အထူကြီးတွေဝတ်ပြီး စျေးဝယ်ရတာ ကျနော်တို့ ဂုံရှမ်းရိုးရာအရ အလွန်ပျော်စရာကောင်းလှတယ်။ တစ်နှစ်မှ တစ်ကြိမ်၊ တစ်ကြိမ်မှ တစ်ရက်၊ တစ်ရက်မှ တစ်မနက်တည်း ကျင်းပလျှက်ရှိတဲ့ ကျနော်တို့ရှမ်းအရှေ့ ကျိုင်းတုံမြို့ ကျနော်တို့ဂုံရုမ်းရိုးရာဓလေ့ထုံးစံ အလှူအဒါန်းပေးခြင်း ကုသိုလ်တစ်မျိုးပါခ။ ရှေးခေတ်အလှူတန်းတစ်မျိုးပါခ။ လူနတ်သတ္တဝါများအားလုံး လူနတ်ဗြဟ္မာများအားလုံး ကုသိုလ်အမျှခ။ ဆာတုခ” ဟု ကျိုင်းတုံမြို့သားတစ်ဦးက ပြောသည်။
ဈေးနေ့ နံနက်ပိုင်းတွင် စော်ဘွားကြီးနှင့်တကွ ကွယ်လွန်လေပြီးသော ဆွေတော်မျိုးတော်များအားလုံးကို ရည်စူး၍ အုတ်ဂူတည်ရှိသောနေရာတွင် သံဃာတော်များပင့်ဆောင်ပြီး ဆွမ်းပွဲနှင့်အလှူအတန်း ပြုလုပ်ပေးပြီး ညပိုင်း ၆ နာရီတွင် အုတ်ဂူနေရာ၌ ဆီးမီးခွက် ၁၀၀၀ ခွက် ပူဇော်လှူဒါန်းပေးခဲ့ကြောင်း သိရသည်။
ကတ်တောင်ဝ်(စျေးဟောင်းနေ့)စျေးတည်ခင်းသည့်နေရာမှာ မဟာမြတ်မုနိဘုရား စျေးတန်းကြီးလမ်းတလျှောက် ပါလျှံတံခါးကျော်ပြီး (ပြည်သူ့ဆေးရုံဟောင်း)မြို့နယ်ထွေအုပ်ရုံးထိ၊ ပါလျှံတံခါးမှ လွယ်မွေလမ်းတလျောက် မြန်မာ့စီးပွားဘဏ် အနီးအထိနှင့် ပါလျှံတံခါးမှ စျေးတန်းလေးလမ်းတစ်လျောက် ဖြစ်ကြောင်း သိရသည်။
စော်ဘွားစျေးပေါ်ပေါက်လာပုံသမိုင်းမှာ သက္ကရာဇ် ၇၃၀ ခုနှစ် အေဒီ ၁၃၆၈ ခုနှစ် စော်ဘွားစောဝ်ကျစ်ပ်ပန်းတူ (ခ)စောဝ်သတ္တဗန္တုရာဇာ လက်ထက်တော်တွင် စတင်ခဲ့ပြီး ယခုအောင်မြေနတ်နန်းပုရဝုဏ်နေရာသည် “စော်ဘွားစျေး” ဖြစ်ကြောင်း သိရသည်။
#MeKongNews
#စော်ဘွားဈေးနေ့
#ကျိုင်းတုံ
#အောင်မြေနတ်နန်း
#ဈေးဟောင်းနေ့
