ငွေပေးနိုင်ရင် ကားပြန်ရ
မဲခေါင်၊ ဒီဇင်ဘာ-၁
ရှမ်းပြည်တောင်ပိုင်း၊ တောင်ကြီးမြို့မှာ နိုဝင်ဘာ နောက်ဆုံးပါတ်မှစတင်ကာ စစ်တပ်၊ ရဲ၊ ယာဉ်ထိန်းရဲ့တွေ ပါဝင်တဲ့ ပူးပေါင်းအဖွဲ့က လိုင်စင်မဲ့ကားတွေ ဖမ်းဆီးကာတိုင်းမှူးကိုယ်တိုင်တရားလိုလုပ်ကာအမှုဖွင့်အရေးယူနေတယ်လို့ ဒေသတွင်းသတင်းရင်းမြစ်တွေထံကနေသိရပါတယ်။
တောင်ကြီးမြို့ပေါ်က အဓိကလမ်းမကြီးတွေနဲ့ အေးစေတီအတက်လမ်း၊ မြေပုံဂိတ်၊ အဆုတ်ဆေးရုံမီးပွိုင့်၊ နဂါးပွက်ကျောင်းလမ်းဆုံ၊ ထုံးဖိုစစ်ဆေးရေးဂိတ်စတဲ့ နေရာတွေအပြင်တခြားနေရာတွေမှာလည်း ရှောင်တခင် စစ်ဆေးဖမ်းဆီးနေတာ ဖြစ်တယ်လို့သိရပါတယ်။
“တခါတည်း ဗဟိုစက်ပစ္စည်း စာရင်းအင်းကိုအပ်တယ်၊ သူတို့လိုချင်တဲ့ကားဆိုရင် သိမ်းတယ်၊ မလိုချင်တဲ့ကားဆိုရင်တော့ငွေနဲ့ ပြန်ညှိရတာပေါ့”လို့သတင်းရင်းမြစ်တစ်ဦးကမဲခေါင်သတင်းဌာနကို ပြောပါတယ်။
အဲဒီလိုဖမ်းဆီးရမိတဲ့လိုင်စင်မဲ့ကားတွေအနက် Pick up၊ 4 Door၊ Crown Gradeမြင့်၊ GE 6၊ GP 1စတဲ့ တန်ဖိုးမြင့်ကားတွေ ဆိုပါကသိမ်းဆည်းလိုက်ပြီး တန်ဖိုးနည်းကားတွေကိုတော့ ငွေသိန်းဆယ်နဲ့ချီတောင်းယူကာ ပြန်ပေးတာတွေ ရှိနေတယ်လို့သိရပါတယ်။
“အခုက ညဖက်တွေဆို ပိုဖမ်းလာတယ်၊ အရင်ကဆို ညဖက်တွေ မဖမ်းဘူး၊ မနေ့ညကလည်း နဂါးပွက်ကျောင်းမီးပွိုင့်ထိပ်နားမှာ ကား၊ ဆိုင်ကယ် အကုန်တားစစ်တယ်။ မျက်နှာတွေပါဓာတ်မီးနဲ့ ထိုးကြည့်ပြီး စစ်နေတာ၊ သူတို့လည်း လိုင်စင်မဲ့ကားတွေ စီးနေတာပဲလေ၊ နားလည်မှုလေးတော့ ရှိသင့်တာပေါ့၊ စည်းကမ်းဖောက်လို့ ဖမ်းတယ်၊ ဒဏ်ငွေအရေးယူတာမျိုးတွေကို လက်ခံပါတယ်၊ အခုဟာက ငွေလိုချင်လို့ကို တမင်ဖမ်းနေတာ” လို့ တောင်ကြီးဒေသခံတစ်ဦးက မဲခေါင်သတင်းဌာနကို ပြောပါတယ်။
ပြီးခဲ့တဲ့ တောင်ကြီးတန်ဆောင်တိုင် ကာလအတွင်းကလည်း လိုင်စင်မဲ့ကား၊ ဆိုင်ကယ်အစီးရေ ရာနဲ့ချီကို ဖမ်းဆီးခဲ့ပြီးငွေကြေးရယူကာ ပြန်ပေးတာတွေရှိခဲ့ပေမယ့် တန်ဖိုးမြင့် ကား၊ ဆိုင်ကယ်အချို့ကိုတော့ လက်ရှိအချိန်ထိ ပြန်မပေးသေးဘူးလို့လည်း သိရပါတယ်။
ဓာတ်ပုံ-Local
CJ-003
#MekongNews
#တောင်ကြီး
#လိုင်စင်မဲ့ကား
#ဖမ်းဆီး
#ငွေပေးနိုင်သူ
#ကားပြန်ရ
