မဲခေါင်၊အောက်တိုဘာ ၂၇
ရှမ်းပြည်မြောက်ပိုင်း အထူးဒေသ (၁) အတွင်း ဘာသာစကားနှင့် ပညာရေး၊ မြေယာပိုင်ဆိုင် ခွင့်၊ နိုင်ငံခြားသားများ၏ လွှမ်းမိုးမှု၊ သမိုင်းဝင်ယဉ်ကျေးမှုနှင့် မြို့ရွာအမည်များ၊ လူ့အခွင့်အရေးနှင့် လွတ်လပ်စွာထုတ်ဖော်ပြောဆိုခွင့်တို့နှင့် ပတ်သက်၍ ရှမ်းပြည်ပူးပေါင်းဆောင်ရွက်ရေးကော်မတီ – SSJAC က ထုတ်ပြန်ထားသည့် စွပ်စွဲချက်များသည် မြေပြင်အခြေအနေနှင့် ကင်းကွာနေကြောင်း ကိုးကန့်အဖွဲ့ – MNDAA က အောက်တိုဘာ ၂၃ ရက်တွင် အိတ်ဖွင့်ပေးစာဖြင့် တုံ့ပြန်ထားသည်။
ယင်းအိတ်ဖွင့်ပေးစာတွင် အထူးဒေသ (၁) အတွင်းရှိ အခြေခံပညာကျောင်းများ၌ မြန်မာ ဘာသာစကားကို အဓိကသင်ကြားနေပြီး အင်္ဂလိပ်ဘာသာကို မူလတန်းမှစ၍ သင်ကြားရန်နှင့် တရုတ်ဘာသာကို ရွေးချယ်သင်ကြားနိုင်သည့် ဘာသာရပ်အဖြစ် ထည့်သွင်းထားကြောင်း ဖော်ပြထားသည်။
ထို့အပြင် ဒေသခံတိုင်းရင်းသားများ၏ ဘာသာစကားများကိုလည်း ဒေသခံများ၏ ဆန္ဒနှင့်အညီ သင်ကြားခွင့်ပြုထားကြောင်း ဆိုသည်။
မြေယာပိုင်ဆိုင်ခွင့်နှင့် ပတ်သက်၍လည်း အထူးဒေသ (၁) ၏ မြေယာစီမံခန့်ခွဲရေးဥပဒေများအရ နိုင်ငံခြားသားများအား မြေယာပိုင် ဆိုင်ခွင့် ခွင့်ပြုထားခြင်းမရှိဘဲ အထူးဒေသ (၁) မှတ်ပုံတင်ရှိသူများ သို့မဟုတ် မြန်မာနိုင်ငံသားများသာ တရားဝင် မြေယာပိုင်ဆိုင်ခွင့်ရှိကြောင်း တုံ့ပြန်ထားသည်။
သမိုင်းဝင်မြို့ရွာအမည်များကို အတင်းအကျပ် ပြောင်းလဲထားခြင်းမရှိဘဲ မူလအမည်များကို ဆက်လက်အသုံးပြုနေကြောင်းနှင့် ကိုးကန့်ဘာသာစကားဖြင့် အမည်များတွဲဖက်အသုံးပြုခြင်းမှာ အုပ်ချုပ်ရေးလုပ်ငန်းများ လွယ်ကူစေရန်ဖြစ်ကြောင်း အထူးဒေသ (၁) အုပ်ချုပ်ရေးကော်မတီက ဆိုသည်။
ထို့အပြင် တိုင်းရင်းသားရိုးရာယဉ်ကျေးမှုပွဲများကိုလည်း ကျင်းပခွင့်ပြုထားကြောင်း ဖော်ပြထားသည်။
လူ့အခွင့်အရေးနှင့် လွတ်လပ်စွာထုတ်ဖော်ပြောဆိုခွင့်နှင့် ပတ်သက်၍လည်း ဥပဒေဘောင်အတွင်း ဆောင်ရွက်မှုများကို ကန့်သတ်ခြင်း၊ ခြိမ်းခြောက်ခြင်း မရှိကြောင်းနှင့် ဒေသခံပြည်သူများ၏ အခြေခံအခွင့်အရေးများကို အလေး ထားကာကွယ်နေကြောင်း တုံ့ပြန်ထားသည်။
SSJAC ၏ ထုတ်ပြန်ချက်များသည် မြေပြင်အခြေအနေမှန်နှင့် ကင်းကွာပြီး တိုင်းရင်းသားများအကြား အထင်အမြင်လွဲမှားမှုနှင့် လူမျိုး ရေးပဋိပက္ခများ ဖြစ်ပေါ်စေနိုင်သည့် လှုံ့ဆော်မှုများ ဖြစ်ကြောင်းလည်း အထူးဒေသ (၁) ဘက်က စွပ်စွဲထားသည်။
လက်ရှိတွင် အထူးဒေသ (၁) အပါအဝင် ရှမ်းပြည်မြောက်ပိုင်းဒေသ တစ်ခုလုံး တည်ငြိမ်အေးချမ်းနေပြီး စီးပွားရေး၊ ပညာရေးနှင့် ကျန်းမာရေးကဏ္ဍများကို ဆောင်ရွက်နေကြောင်း ထုတ်ပြန်ချက်တွင် ဖော်ပြထားသည်။
တိုင်းရင်းသားအားလုံး တန်းတူညီမျှရေးနှင့် မိမိတို့နှစ်သက်ရာ ဘာသာတရားကို လွတ်လပ်စွာ ကိုးကွယ်ခွင့်ရှိရေးတို့ကိုလည်း လက်တွေ့ကျင့်သုံးနေကြောင်း ဆိုသည်။
ထို့အပြင် SSJAC ၏ ထုတ်ပြန်ချက်တွင် အခြေ အမြစ်မရှိသော စွပ်စွဲချက်များကို မလိုက်နာပါက နိုင်ငံရေးနှင့် လူမှုရေးဆိုင်ရာ တုံ့ပြန်မှုများ ပြုလုပ်သွားမည်ဟု ဖော်ပြထားခြင်းအပေါ် လက်မခံကြောင်းနှင့် ဒေသတွင်းတည်ငြိမ်ရေးကို ထိခိုက်စေရန် သို့မဟုတ် တိုင်းရင်းသားများအကြား ပဋိပက္ခဖြစ်စေရန် ရည်ရွယ်သည့် လှုပ်ရှားမှုများရှိလာပါက ဒေသခံပြည်သူများ ၏ အကျိုးစီးပွားကို ကာကွယ်ရန် တုံ့ပြန်သွားမည်ဖြစ်ကြောင်း၊ သွေးထိုးလှုံ့ဆော်မှုများကြောင့် ဖြစ်ပေါ်လာမည့် မလိုလားအပ်သည့် အကျိုးဆက်ကို SSJAC က တာဝန်ခံရမည်ဖြစ်ကြောင်း အထူးဒေသ (၁) အုပ်ချုပ်ရေးကော်မတီက သတိပေးထားသည်။
ယင်းအိတ်ဖွင့်ပေးစာကို ပြည်ထောင်စုမြန် မာနိုင်ငံ အထူးဒေသ (၁) အုပ်ချုပ်ရေးကော်မတီ အမည်ဖြင့် ထုတ်ပြန်ထားခြင်းဖြစ်သည်။
#MeKongNews
#ကိုးကန့်
#MNDAA
#SSJAC
#ရှမ်းပြည်
