မဲခေါင်၊ ဇွန် ၁၂
ရှမ်းပြည်မြောက်ပိုင်း၊ သီပေါမြို့၊ ဒုဌဝတီမြစ်ကူးတံတားကို စစ်ကောင်စီက ဖြတ်သန်းသွားလာခွင့် ပိတ်ထားသည်မှာ ကြာမြင့်လာသည်နှင့်အမျှ မြစ်ကို လှေဖြင့်ကူးကြရာတွင် လှေကူးခများကို ယခင်ကထက် လှေလုပ်သားများက မတန်တဆ တိုးတောင်းလာနေကြောင်း ခရီးပြည်သူများက မဲခေါင်သို့ပြောသည်။
သီပေါမြစ်ဆိပ် ၂ ခုမှ စက်လှေများဖြင့် ကူးပေးရာတွင် ယခင်က ဆိုင်ကယ်တစ်စီး ၁ သောင်းကိုယခု ၁ သောင်းခွဲ၊ လူတစ်ယောက် ဖြတ်သန်းခ ယခင် ၅ ထောင်ကျပ်၊ ယခု ၁ သောင်းကျပ်နှင့် အိတ်များ ပါလျှင်ပါသလို တောင်းယူနေပြီး စက်လှေတစ်စီးနှင့်တစ်စီး၊ လှေဆိပ်တစ်ခုနှင့် တစ်ခု မတူညီဘဲ ထင်သလို ကောက်ခံနေကြသည်ဟု ဆိုသည်။
“စက်လှေတစ်ခေါက်ကို ၁ သိန်းခွဲလောက် ရတာပေါ့။ ဘာလို့လဲဆိုတော့ လှေဆိပ်တစ်ခုမှာ စက်လှေ အနည်းဆုံး ၁၀ စီး၊ ၁၂ စီး ရှိတယ်။ တစ်ခေါက် ကူးလို့ရှိရင် ၁ မိနစ်၊ ၂ မိနစ်လောက်ပဲ ကြာတာ၊ ၁ သိန်းခွဲ။ အဲဒါ ကုန်ပိုင်း မကဘူး၊ ၃၊ ၄၊ ၅ သိန်းရတယ်။ အဲ့တော့ ၁ မိနစ်၊ ၂ မိနစ်အတွင်းမှာ ၅ မိနစ်ပဲ ထားလိုက်ဦး၊ ၁ သိန်းခွဲ ရတာဆိုတော့ တွက်သာကြည့်လိုက်တော့ တနေကုန်ဆိုတော့၊ မနက် ၆ နာရီကနေ ည ၆ နာရီထိ ကူးပေးတယ်။ ခု ဖြတ်သန်းခ တိုးကောက်တော့ ဒိထက်ပိုရတော့မပေါ့။ တကယ့်လုပ်စားပဲ” ဟု ခရီးသွား ယာဥ်မောင်းတစ်ဦးက ပြောသည်။
ယင်းစက်လှေဆိပ်များကို စစ်ကောင်စီတပ်နှင့် ရဲက ဦးစီးနေခြင်းဖြစ်ပြီး တစ်နေ့တာ ရငွေကို ၅ ပုံ ပုံ၍ စစ်တပ်၊ ရဲ၊ စက်လှေပိုင်ရှင်၊ လုပ်သားနှင့် တစ်ဖက်ကမ်းမှ MNDAA တို့ တစ်ပုံစီ အချိုးကျခွဲဝေရယူကြကြောင်း သိရသည်။
“အခုတစ်လော စစ်ကားတွေ တံတားကဖြတ်ရင် အရပ်ကားတွေလည်း ပိုက်ဆံပေးပြီး ဖြတ်ကြတယ်။ ရောလိုက်ရတာပေါ့၊ တစ်စီးကို ဖြတ်ခ ကျပ် ၁၀ သိန်း အနည်းဆုံးပဲ ပေးရတာ၊ ကုန်ကားတွေဆို ၂၀ အထက်ပဲ၊ ခုဆို ခဏခဏဖြတ်လို့ သဲအိပ်တွေတောင် မထားတော့ဘူး။ လှိမ့်ပြီးရွှေ့လို့ ဖယ်လို့လွယ်တဲ့ ကတ္တရာပုံးမျိုးတွေပဲ ထားတော့တယ်။ ဒါပေမယ့် လှေကူးခက သူဌေးဖြစ် တွက်ချေကိုက်နေကြတော့ တံတားက ဖွင့်မှာမဟုတ်တော့ဘူး’ဟု သီပေါမြို့ခံတစ်ဦက ပြောသည်။
ထို့ပြင် ၎င်းတို့၏ လုပ်ရပ်များ ပေါ်ပေါက်မည် စိုးသည့်အတွက် ဒုဌဝတီမြစ်ကို ဖြတ်သန်းသည့် လှေဆိပ်များနှင့် တံတားကို ဓာတ်ပုံမရိုက်ရ၊ ရိုက်လျှင် ဒဏ်ငွေ ကျပ် ၅ သိန်းနှင့် ဖုန်းသိမ်းခံရမည်ဟု ကြေညာထားသည်ဟု ဆိုသည်။
သီပေါတံတားမှာ ယမန်နှစ် နိုဝင်ဘာလက စစ်ကောင်စီနှင့် MNDAA တို့ နှစ်ဖက် ဆက်ဆံရေးတင်းမာပြီးနောက် ဖြတ်သန်းမှုကို နှစ်ဖက်ပိတ်ပင်ခဲ့ပြီးနောက်ပိုင်း MNDAA က ပိတ်ပင်ထားမှုကို ရုပ်သိမ်းခဲ့သော်လည်း စစ်ကောင်စီက ဆက်လက်ပိတ်ပင်ထားပြီး စီးပွားဖြစ် လုပ်စားနေခြင်းဖြစ်ရာ ခရီးသွား အများပြည်သူတို့ ခက်ခဲမှုများ ကြုံတွေ့လျက်ရှိနေကြခြင်း ဖြစ်သည်။
#MeKongNews
#သီပေါတံတား
#ပိတ်ထားမှု
#လှေကူးခ
#အဆမတန်
