မဲခေါင်၊ ဇွန် ၁၂
ယမ်းသိုလှောင်ရုံ ပေါက်ကွဲမှုကြောင့် ပျက်စီးသွားသည့် နမ့်ခမ်းမြို့နယ် ကောင်းတပ်ကျေးရွာ ပြန်လည်ထူထောင်ရေးအတွက် မွန်ပြည်သစ်ပါတီ – စစ်အာဏာရှင်တိုက်ဖျက်ရေး/ရာမညမွန်တပ်တော် – MNSP-AD/RMA က အလှူငွေ ကျပ်သိန်း ၃၀၀ ပါဝင်ကူညီသည်ဟု ပြန်လည်ထူထောင်ရေးကော်မတီထံမှ သိရသည်။
မွန်ပြည်သစ်ပါတီမှ ခွဲထွက်ကာ မွန်ပြည်သစ်ပါတီ – စစ်အာဏာရှင်တိုက်ဖျက်ရေးအဖွဲ့ ဖွဲ့ပြီး စစ်ကောင်စီကိုတော်လှန်နေသည့် MNSP – AD သည် ကောင်းတပ်ကျေးရွာ ပြန်လည်ထူထောင်ရေးအတွက် ကျပ်သိန်း ၃၀၀ ကို ယမန်နေ့ ဇွန် ၁၁ ရက်တွင် ပါဝင်ကူညီခဲ့ခြင်း ဖြစ်သည်။
ထို့အတူ မိုင်းလားအဖွဲ့ – NDAA၏ မိုင်းလားကျန်းမာရေးကော်မတီ ၊ ကိုးကန်တပ်ဖွဲ့ – MNDAA နှင့် နယ်စည်းမခြားဆရာဝန်များအဖွဲ့ လိုင်ဇာရုံးတို့ကလည်း ကောင်းတပ်ကျေးရွာ ပေါက်ကွဲမှုကြောင့် ထိခိုက်သည့် ပြည်သူများအား ကုသရာတွင် အသုံးပြုနိုင်ရန် ဆေးဝါးနှင့် အထောက်အပံ့ပစ္စည်းများကို လာရောက်ကူညီခဲ့သည်။
ယခုလအတွင်းတွင်ပင် ကောင်းတပ်ကျေးရွာ ပြန်လည်ထူထောင်ရေးအတွက် KIO/KIA က ကျပ်သိန်း ၅၅၀၊ “ဝ”တပ်ဖွဲ့-UWSA နှင့် ရှမ်းတပ်ဖွဲ့ – SSPP က ငွေသား ကျပ်သိန်း ၁၀၀ စီနှင့် ဆန်အိတ် ၂၀ တို့ကိုလည်း ကောင်းတပ်ကျေးရွာပြန်လည်ထူထောင်ရေးကော်မတီထံ ကူညီခဲ့သေးသည်။
ကောင်းတပ်ကျေးရွာ ပြန်လည်ထူထောင်ရေးကော်မတီ- Committee of KaungTap ကို မြေပြင်တွင်လက်ရှိ လုပ်ငန်းလုပ်ဆောင်နေသည့် ဌာနဆိုင်ရာများ၊ ဒေသခံများ၊ လူမှုကယ်ဆယ်ရေးအဖွဲ့များ၊ အရပ်ဖက်အဖွဲစည်းများဖြင့် ဖွဲ့စည်းထားခြင်းဖြစ်သည်။
အလှူရှင်များအနေဖြင့် အလှူငွေများ(သို့) ကူညီပစ္စည်းများ ထည့်ဝင်ခြင်းဖြင့် ကူညီလိုပါက ကော်မတီ Page မှသော်လည်းကောင်း၊ ကောင်းတပ်ကျေးရွာ ဘုန်းကြီးကျောင်းတွင် ဖွင့်လှစ်ထားသည့် အလှူခံဌာနတွင်လည်းကောင်း လာရောက်လှူဒါန်းနိုင်သည်ဟု ကောင်းတပ်ကျေးရွာ ပြန်လည်ထူထောင်ရေးကော်မတီက နှိုးဆော်ထားသည်။
တအာင်းတပ်မတော် – PSLF/TNLA ထိန်းချုပ်ထားသည့် ရှမ်းပြည်မြောက်ပိုင်း၊ နမ့်ခမ်းမြိုနယ်၊ ကောင်းတပ်ရွာတွင် ပြီးခဲ့သည့် မေ ၃၁ ရက်က TNLA စီးပွားရေးဌာနပိုင် ယမ်းသိုလှောင်ရုံ ပေါက်ကွဲမှုကြောင့် ပြည်သူ ၆၁ ဦး သေဆုံးကာ ၁၅၀ ကျော်ထိခိုက်ဒဏ်ရာ ရရှိခဲ့သည်။
ထိုပေါက်ကွဲမှုအတွင်း နေအိမ်နှင့် အဆောက်အဦး ၆၈၀ ကျော်လည်း ပျက်စီးသွားသဖြင့် ပြန်လည်ထူထောင်ရန် အကူအညီလိုအပ်ဆဲ ဖြစ်သည်။
#MeKongNews
#ကောင်းတပ်ရွာ
#MNSP-AD
#MNDAA
#NDAA
#ဆေးပစ္စည်း
