မဲခေါင်၊ ဇွန် ၁၁
ရှမ်းပြည်မြောက်ပိုင်း၊ မူဆယ်ဒေသတွင် လူကုန်ကူးခံခဲ့ရသည့် ပင်လောင်းမြို့နယ်၊ တောင်လေးကျေးရွာမှ ပအိုဝ်းတိုင်းရင်းသူများအနက် နောက်ထပ် အမျိုးသမီး၂ ဦး ဇွန် ၉ ရက်တွင် လွတ်မြောက်လာခဲ့ကြောင်း နီးစပ်သူများထံမှ သိရသည်။
ယင်းအမျိုးသမီးများသည် အလုပ်အကိုင် ရရှိမည်ဟု ယုံကြည်ကာ မူဆယ်ဒေသသို့ သွားရောက်ခဲ့ကြရာမှ လူကုန်ကူးခံခဲ့ရခြင်း ဖြစ်ပြီး၊ ယခင်က ၁၀ ဦး လွတ်မြောက်ခဲ့ပြီးနောက် ယခု ၂ ဦး ထပ်မံလွတ်မြောက်လာခြင်း ဖြစ်သည်။
“အခု ၂ ယောက် ထပ်လွတ်လာတာ ဝမ်းသာစရာပါ။ ဒါပေမယ့် ကျန်နေသေးတဲ့ ၂ ယောက်ကိုလည်း အမြန်ဆုံး ပြန်တွေ့စေချင်ပါတယ်။ လွတ်မြောက်လာတဲ့ ၂ ယောက်ကတော့ မနေ့ကပဲ ရွာကို ပြန်ရောက်လာပါတယ်။ မိသားစုဝင်တွေကတော့ နေ့တိုင်း စိုးရိမ်ပူပန်နေရဆဲပါ” ဟု လူကုန်ကူးခံရသူများနှင့် နီးစပ်သည့် ဒေသခံတစ်ဦးက ပြောသည်။
လက်ရှိတွင် ကျန်ရှိနေသည့် အမျိုးသမီး ၂ ဦးနှင့် ပတ်သက်၍ မိသားစုဝင်များက အဆက်အသွယ် ရရှိရန်နှင့် ဘေးကင်းစွာ ပြန်လည် လွတ်မြောက်လာရေးအတွက် စိုးရိမ်ပူပန်နေကြကြောင်း သိရသည်။
အလုပ်အကိုင်အခွင့်အလမ်း ရရှိမည်ဟုဆိုကာ နယ်စပ်ဒေသများသို့ သွားရောက်မည့်သူများအနေဖြင့် ပိုမိုသတိထားကြရန် ဒေသခံများကလည်း တိုက်တွန်းထားသည်။
“အလုပ်အကိုင် ရမယ်ဆိုပြီး သွားကြရာကနေ လူကုန်ကူးခံရတာ ဖြစ်လို့ တခြားဒေသခံတွေလည်း အလားတူမဖြစ်အောင် ပိုပြီး သတိထားဖို့လိုပါတယ်” ဟု ပင်လောင်းဒေသခံတစ်ဦးက ဆိုသည်။
လက်ရှိတွင် သက်ဆိုင်ရာ တာဝန်ရှိသူများနှင့် လူမှုကူညီရေးအဖွဲ့များက ကျန်ရှိနေသည့် အမျိုးသမီး ၂ ဦးကို အမြန်ဆုံး ကယ်တင်နိုင်ရေးအတွက် ဆက်လက် ဆောင်ရွက်နေကြောင်း သိရသည်။
လူကုန်ကူးခံရသည့် အမျိုးသမီးငယ် ၁၄ ဦးသည် ပြီးခဲ့သည့် မတ်လအတွင်း မူဆယ်သို့ အလုပ်လုပ်ရန် သွားရောက်ခဲ့ကြရာမှ အလုပ်မရရှိဘဲ ဂိုထောင်တစ်ခုအတွင်း ပိတ်လှောင်ခံထားရပြီး တရုတ်ဇနီးအဖြစ် ရောင်းစားခံရမည့် အခြေအနေနှင့် ရင်ဆိုင်ခဲ့ရကြောင်း သိရသည်။
ယင်းအခြေအနေကို သိရှိပြီးနောက် ယင်းအထဲမှ ၁၀ ဦးမှာ ထွက်ပြေးလွတ်မြောက်နိုင်ခဲ့ပြီး ယခု နောက်ထပ် ၂ ဦးပါ လွတ်မြောက်လာခဲ့ခြင်း ဖြစ်သည်။
#MeKongNews
#မူဆယ်
#လူကုန်ကူး
#ပအိုဝ်းတိုင်းရင်းသူ
#လွတ်မြောက်
