မဲခေါင်၊ မေ ၆
အီရန်နှင့် ကျယ်ပြန့်သော သဘောတူညီချက် ရရှိရန် ကြီးမားသော တိုးတက်မှုများကို အကြောင်းပြ၍ ဟောမုဇ်ရေလက်ကြားဖြတ် သင်္ဘောများကို လိုက်ပါ ကူညီစောင့်ရှောက် ပေးမည့် အစီအစဉ်ကို ခေတ္တရပ်တန့်ထားမည်ဟု အမေရိကန်သမ္မတ ဒေါ်နယ်ထရမ့်က ပြောကြားသည်။
ယင်းမတိုင်မီ နာရီပိုင်းတွင် သောင်တင်နေသော သင်္ဘောများအား ရေလက်ကြားမှ လိုက်ပါစောင့်ရှောက်ရေး တနင်္လာနေ့က စတင်ခဲ့သော အစီအစဉ်ကို နိုင်ငံခြားရေးဝန်ကြီး မာကို ရူဘီယိုက ချပြခဲ့သည်။
အီရန်အပေါ် ပိတ်ဆို့မှုများ အပြည့်အဝဆက်ရှိနေစဉ် အီရန်နှင့် သဘောတူညီချက်ကို အပြီးသတ်ကာ လက်မှတ်ရေးထိုးနိုင်မည်လာဆိုခြင်းကို စောင့်ကြည့်ရန် လွတ်လပ်မှုပရောဂျက်ကို ခေတ္တရပ်တန့်ထားရန် မိမိတို့နှစ်ဖက်စလုံး သဘောတူညီထားကြောင်း ဒေါ်နယ်ထရမ့်က လူမှုမီဒီယာပေါ်၌ ရေးသားသည်။
တီဟီရန်ဘက်ကမူ မည်သည့်တုံ့ပြန်မှုမှ ချက်ခြင်း ထွက်ပေါ်မလာသေးကြောင်း ရိုက်တာသတင်းက ဆိုသည်။
ထရမ့်၏ ပို့စ်ထွက်ပေါ်ပြီးနောက် ရေနံဈေး တစ်စည်လျှင် ဒေါ်လာ ၁၀၀ အောက်သို့ ကျဆင်းသွားခဲ့သော်လည်း မည်သည့်တိုးတက်မှု ရသည်ဆိုခြင်း နှင့် ရပ်တန့်မှု မည်မျှကြာမည်ကို မှတ်ချက်ပေးရန် တောင်းဆိုမှုကို အိမ်ဖြူတော်က ချက်ခြင်း မတုံ့ပြန်ခဲ့ပေ။
ရေလက်ကြားဖြတ် သင်္ဘောများကို အီရန်က ထိန်းချုပ်ခြင်းကို ခွင့်ပြုမည်မဟုတ်ကြောင်း နိုင်ငံခြားရေးဝန်ကြီး မာကိုရူဘီယိုနှင့် အခြားအရာရှိကြီးများက အစောပိုင်းတွင် ပြောကြားကြသည်။
မိုင်းများ၊ ဒရုန်းများ၊ ဒုံးကျည်များ၊ အမြန်တိုက်ခိုက်ရေး ရေယာဉ်များဖြင့် တိုက်ခိုက်သွားနိုင်ကြောင်း အီရန်က ခြိမ်းခြောက်သလို လက်တွေ့ တိုက်ခိုက်မှုများလည်း လုပ်၍ ဟောမုဇ်ရေလက်ကြားကို အီရန်က ထိရောက်စွာ ပိတ်ဆို့ထားခဲ့သည်။
အမေရိကန်ကလည်း အီရန် ဆိပ်ကမ်းသို့ အဝင်၊ အထွက်လုပ်သော သင်္ဘောများကို ရေတပ်ဖြင့် ပိတ်ဆို့ထားပြီး အခြားကုန်တင်သင်္ဘောများအား လိုက်ပါစောင့်ရှောက်ရန် ကြိုးပမ်းခဲ့သည်။
သို့သော် အမေရိကန် ရေတပ်သင်္ဘောများ ရေလက်ကြားသို့ ဝင်ရောက်လာခဲ့ပါက ပစ်ခတ်တိုက်ခိုက်သွားမည် ဖြစ်ကြောင်း အီရန်က သတိပေးထားပြီး လွတ်လပ်မှုပရောဂျက် စတင်သော တနင်္လာနေ့မှာပင် ကုန်တင်သင်္ဘောများကိုပါ ပစ်ခတ်တိုက်ခိုက်မှုများ လုပ်ဆောင်ခဲ့သည်။
တနင်္လာနေ့တွင် အီရန်၏ ရေယာဉ်ငယ်များ၊ ဒုံးကျည်များနှင့် ဒရုန်းများကို ဖျက်ဆီးပစ်ခဲ့သည်ဟု အမေရိကန်ရေတပ်က ပြောသည်။
အေးကျော်
Ref: Reuters
#MeKongNews
#ဟောမုဇ်ရေလက်ကြား
#သင်္ဘောများ
#စောင့်ရှောက်ရေး
#ထရမ့်
#ရပ်တန့်
