မဲခေါင်၊ မေ ၃
Skyhammer ဟု အမည်ပေးထားသော ကြားဖြတ်အသေခံ Shahed ဒရုန်းသစ်ကို ဗြိတိန်စစ်တပ်က အရှေ့အလယ်ပိုင်းဒေသအတွင်း အောင်မြင်စွာ စမ်းသပ် တီထွင်လိုက်နိုင်ကာ တစ်နာရီ မိုင် ၄၃၀ နှုန်း ပျံသန်းနိုင်သည်ဟု သိရှိရသည်။
ယင်းဒရုန်းကို ကိန်းဘရစ်ချ်အာကာသဌာနမှ စတင်တီထွင်ခြင်းဖြစ်ကာ အကွာအဝေး အမြင့်ဆုံး ၃၀ ကီလိုမီတာသာ သွားနိုင်သော်လည်း အလျင်မှာ တစ်နာရီ မိင် ၄၃၀ ရှိသဖြင့် ယူကေ၏ နောက်ဆုံးပေါ် နည်းပညာ အောင်မြင်မှုအဖြစ် သတ်မှတ်ခဲ့ကြသည်။
စမ်းသပ်မှုများကို ဂျော်ဒန်နိုင်ငံတွင် ပြုလုပ်ခဲ့ပြီး ဂျော်ဒန်အပါအဝင် အရှေ့အလယ်ပိုင်းဒေသမှ မဟာမိတ်နိုင်ငံများ ကာကွယ်ရေးအတွက် အဓိက ထောက်ပံ့ အသုံးပြုသွားရန် ရည်ရွယ်သည်ဟု ဗြိတိန်စစ်ရေးအကြီးအကဲ လုခ်ပိုလက်ခ်က ပြောသည်။
ဗြိတိန် ကာကွယ်ရေးဝန်ကြီးဌာနသည် ကိန်းဘရစ်ချ်အာကာသသိပ္ပံဌာနနှင့် လက်နက်ထုတ်လုပ်ရေး ကန်ထရိုက်စာချုပ်များစွာ ချုပ်ဆိုခဲ့ပြီး ၂၀၂၇ ခုနှစ်မှ စတင်ကာ နိုင်ငံကာကွယ်ရေး အသုံးစားရိတ်အား စုစုပေါင်း ဂျီဒီပီ၏ ၂ ဒသမ ၆ ရာခိုင်နှုန်းအထိ တိုးမြှင့်သုံးစွဲသွားရန် ဆုံးဖြတ်ခဲ့သည်။
ယခုတီထွင်လိုက်သည့် ယင်းအသေခံဒရုန်းကို အီရန်၏ ဒေသတွင်း ပစ်ခတ် ခြိမ်းခြောက်မှုများအတွက် အကာအကွယ်ရရေး ဦးတည်ကာ ဒီဇိုင်းရေးဆွဲ ထုတ်လုပ်ခဲ့ခြင်း ဖြစ်ကာ ကုန်ကျစားရိတ် များသော်လည်း ထိရောက်မှုပိုင်းနှင့် ယှဉ်လျှင် ထိုက်တန်သည်ဟု ကိန်းဘရစ်ချ်အာကာသဌာန စီအီးအို စတီဗင်ဘာရတ်က ပြောဆိုခဲ့သည်။
ဖေဖော်ဝါရီ ၂၈ ရက်ကတည်းကစပြီး အီရန်ကို အမေရိကန်နှင့် အစ္စရေးတို့ စတင်တိုက်ခိုက် ပြီးနောက် ပင်လယ်ကွေ့ဒေသနိုင်ငံများသို့ အီရန်ဘက်မှ ဒုံးကျည်များဖြင့် မဆင်မခြင် တိုက်ခိုက်နေကာ မတ် ၁ ရက်က ဆိုက်ပရပ်စ်တွင် အခြေစိုက်ထားသော ဗြိတိန် တော်ဝင်လေတပ် အက်ကရိုတီရီစခန်းကိုလည်း အီရန်ဒုံးကျည်နှင့် ဒရုန်းများ တိုက်ခိုက်ခဲ့ကြသေးသည်။
ကိုကလင်း
Ref:Thesun
#MeKongNews
#ဗြိတိန်
#Shahed
#အသေခံဒရုန်းသစ်
