မဲခေါင်၊ ဧပြီ ၃၀
အီရန်နိုင်ငံအပေါ် အမေရိကန်ရေတပ်၏ ပိတ်ဆို့မှုများသည် လနှင့်ချီ၍ ကြာမြင့်နိုင်ကြောင်း အမေရိကန်သမ္မတ ဒေါ်နယ်ထရမ့်က သတိပေးလိုက်ပြီးနောက် ရေနံဈေးနှုန်းများ ၄ နှစ်အတွင်း အမြင့်ဆုံးထိုးတက်သွားခဲ့သည်။
အီရန်ဆိပ်ကမ်းများသို့ သင်္ဘောများ အဝင်အထွက်ကို ပိတ်ဆို့ထားခြင်းသည် ဗုံးကြဲတိုက်ခိုက်မှုများထက် ပို၍ ထိရောက်မှုရှိကြောင်း အင်္ဂါနေ့က ရေနံလုပ်ငန်း အမူဆောင်အရာရှိများနှင့် တွေ့ဆုံချိန်တွင် ဒေါ်နယ်ထရမ့်က ပြောကြားသည်။
အမေရိကန်က သဘောတူညီချက်များ ရယူလိုလျှင် ၎င်းပိတ်ဆို့မှုကို အဆုံးသတ်ရမည်ဟု အီရန်က ပြောကြားထားသည်။
ထိုအစည်းအဝေး၌ ကမ္ဘာလုံးဆိုင်ရာ ရေနံဈေးကွက်များအပေါ် သက်ရောက်မှု လျော့ပါးရေး ၎င်းကြိုးပမ်းနေမှုများနှင့် လိုအပ်ပါက အီရန်အပေါ် တားဆီးပိတ်ဆို့မှုများ လနှင့်ချီ၍ ကြာမြင့်ခဲ့လျှင် အမေရိကန်က လုပ်ဆောင်နိုင်သော ခြေလှမ်းများအကြောင်းအပြင် အမေရိကန် စားသုံးသူများအပေါ် ထိခိုက်မှု အနည်းဆုံး ဖြစ်အောင် လုပ်ဆောင်ရေးကို ထရမ့်က ဆွေးနွေးခဲ့ကြောင်း အမည်ဖော်လိုသူ အိမ်ဖြူတော် အရာရှိကြီးတစ်ဦးက ပြောကြားသည်။
အီရန်အပေါ် ရေတပ်ဖြင့် ပိတ်ဆို့ထားမှုအကြောင်း Axios အွန်လိုင်းသတင်းဌာနကို ပြောကြားရာတွင်လည်း “သူတို့က ချုပ်နှောင်ခံထားရတဲ့ ဝက်တစ်ကောင်လို အသက်ရှုကျပ်နေပါပြီ။ နောက်ဆို ပိုဆိုးဖို့ပဲ ရှိတယ်” ဟု ထရမ့်က ပြောသည်။
ထို့နောက်တွင် Brent စံနှုန်း ရေနံဈေးနှုန်းသည် ၇ ဒသမ ၆ ရာခိုင်နှုန်း မြင့်တက်သွားကာ တစ်စည်လျှင် ၁၁၉ ဒသမ ၆၉ ဒေါ်လာသို့ ရောက်ရှိသွားခဲ့သည်။
ယင်းမှာ ၂၀၂၂ ခုနှစ်က ယူကရိန်းစစ်ပွဲ စတင်ပြီးနောက်ပိုင်း အမြင့်ဆုံးဈေး ဖြစ်သည်။
အီရန်ကလည်း တိုက်ခိုက်ခံခဲ့ရခြင်းအတွက် တန်ကြေးတစ်ခု ပြန်လည်ရယူနိုင်ရန် ကမ္ဘာ့ရေနံနှင့် ဓာတ်ငွေ့၊ ဓာတ်မြေဩဇာများအတွက် အဓိက လမ်းကြောင်းဖြစ်သည့် ဟောမုဇ်ရေလက်ကြားကို လည်မျိုညှစ်ထားခဲ့သည်။
ထိုအတောအတွင်းမှာပင် အီရန် စစ်ပွဲကြောင့် ဓာတ်မြေဩဇာ ဈေးနှုန်းများ မြင့်တက်လာခဲ့ခြင်းသည် နိုင်ငံပေါင်း ၁၆၀ မှ လူသန်းပေါင်း ၃၀ ခန့်ကို ဆင်းရဲတွင်းသို့ သက်ဆင်းသွားစေနိုင်သည်ဟု ကုလသမဂ္ဂဖွံ့ဖြိုးရေးအစီအစဉ် – UNDP က သတိပေးပြောကြားသည်။
အီရန်စစ်ပွဲသည် ဖွံ့ဖြိုးတိုးတက်မှုကို နောက်ပြန်သွားစေခဲ့သည်ဟု UNDP အကြီးအကဲ အလက်ဆန်းဒါးဒီခရူးက ဆိုသည်။
အေးကျော်
Ref:AFP
#MeKongNews
#အီရန်
#ရေတပ်ပိတ်ဆို့မှု
#ထရမ့်
#ရေနံဈေးနှုန်း
