မဲခေါင်၊ ဧပြီ ၂၈
တာချီလိတ်မြို့၏ တစ်ဖက်ကမ်း ထိုင်းနိုင်ငံ၊ မယ်ဆိုင်မြို့ရှိ ဦးအောင်ဇေယျမှန်တံတားဟု လူသိများသည့် Skywalk ကို ယနေ့မှစတင်ကာ ခေတ္တယာယီပိတ်ထားကြောင်း မယ်ဆိုင်ရောက် မြန်မာနိုင်ငံသားများထံမှ သိရသည်။
ယမန်နေ့ ဧပြီလ ၂၇ ရက် ညပိုင်းက မယ်ဆိုင်မြို့၌ လေပြင်းတိုက်ခတ်ပြီး မိုးသည်းထန်စွာ ရွာသွန်းခဲ့မှုကြောင့် Wat Phra That Doi Wao (Skywalk) အနီးတစ်ဝိုက်တွင် ပျက်စီးဆုံးရှုံးမှုအချို့ ရှိခဲ့သည့်အတွက် ယခုကဲ့သို့ ပိတ်ထားခြင်းဖြစ်သည်။
“မှန်တံတားက မှန်တွေတော့ မပျက်ပါဘူး။ ဒါပေမဲ့ အပျက်အစီး ရှိ၊ မရှိ သေချာစစ်ဆေးနေပါတယ်။ ဘုရားဘက်က ထီးတော်မြေခတာအပြင် ရင်ပြင်တော်ပေါ်မှာလည်း ထိခိုက်တာတွေ ရှိနေတယ်။ ပြန်ဖွင့်ရင် ကြေညာမယ်လို့ သိရတယ်၊ လတ်တလောမှာတော့ မှန်တံတားကို အလည်အပတ်သွားလို့ မရသေးပါဘူး” ဟု မယ်ဆိုင်မြို့နေသူတစ်ဦးက ပြောသည်။
တာဝန်ရှိသူများ၏ ကြေညာချက်တွင် လာရောက်လည်ပတ်သူများ ဘေးကင်းလုံခြုံစေရန်နှင့် လိုအပ်သည့် ပြန်လည်ပြုပြင်မှုများ လုပ်ဆောင်နိုင်ရန်အတွက် ယနေ့ ဧပြီလ ၂၈ ရက်နေ့မှစ၍ Skywalk သို့ ဝင်ရောက်ခွင့်ကို ယာယီပိတ်ထားမည်ဟု ဖော်ပြထားသည်။
ဘုရားကျောင်းနှင့် ပတ်ဝန်းကျင် ပြန်လည်ပြုပြင်ရေးလုပ်ငန်းများကို အရှိန်မြှင့် လုပ်ဆောင်သွားမည်ဖြစ်ပြီး၊ ပြန်လည်ဖွင့်လှစ်မည့် အချိန်ကို ထပ်မံကြေညာပေးသွားမည်ဟု ဆိုသည်။ ယင်းမှန်တံတားသည် မြန်မာဘက်မှ ထိုင်းဘက်သို့ အလည်အပတ်သွားရောက်သူတိုင်းလိုလို သွားရောက်လေ့ရှိသည့် အထင်ကရနေရာတစ်ခု ဖြစ်သည်။
#MeKongNews
#တာချီလိတ်
#မယ်ဆိုင်
#ဦးအောင်ဇေယျဘုရား
#လေပြင်းတိုက်
#မှန်တံတား
