မဲခေါင်၊ ဧပြီ ၁၉

ရှမ်းပြည်တောင်ပိုင်း၊ ဓနုကိုယ်ပိုင်အုပ်ချုပ်ခွင့်ရဒေသ၊ ရွာငံမြို့နယ် ကဇက်ကျေးရွာအနီးတွင် မြေနီများအား တရားမဝင် တူးဖော်ထုတ်ယူမှုများ ပြုလုပ်နေသဖြင့် ယင်းလုပ်ငန်းကို တားဆီးပေးရန် ဒေသခံတောင်သူများက တောင်းဆိုထားကြသည်။

ယင်းမြေနီတူးဖော်မှုများကို အရှေ့ပိုင်းတိုင်းစစ်ဌာနချုပ်မှ ဒုတိုင်းမှူးနှင့် ဓနုကိုယ်ပိုင်အုပ်ချုပ်ခွင့်ရဒေသ ဦးစီးအဖွဲ့ဥက္ကဌ ဦးအာကာလင်းတို့၏ ခွင့်ပြုချက်ဖြင့် ဆောင်ရွက်နေခြင်း ဖြစ်ကြောင်း ယင်းလုပ်ငန်းကို ဦးဆောင်နေသူ ကိုညီဆိုသူက ပြောဆိုသည်ဟု ဒေသခံများ၏ ပြောကြားချက်အရ သိရသည်။

“လူကြီးတွေ ခွင့်ပြုထားတာဖြစ်လို့ ဘယ်သူမှ လာမပြောနိုင်ဘူး။ မြို့နယ်အဆင့်ပဲဖြစ်ဖြစ်၊ ဒေသအဆင့်ပဲဖြစ်ဖြစ် ကြိုက်တဲ့နေရာ သွားတိုင်လို့ရတယ်”ဟု ကိုညီဆိုသူက ပြောဆိုကာ ဒေသခံတောင်သူများနှင့် ရွာခံများကို ခြိမ်းခြောက်နေကြောင်း သိရသည်။

တရားမဝင် မြေနီတူးဖော်မှုများကြောင့် မြေဆီလွှာများ ပျက်စီးလာပြီး လယ်ယာစိုက်ပျိုးရေးလုပ်ငန်းများအပေါ် ထိခိုက်မှုများ ဖြစ်ပေါ်နေကြောင်း ဒေသခံများက ပြောသည်။

“မြေကြီးတွေကို အကြီးအကျယ် တူးထုတ်သွားတာကြောင့် မြေဆီကောင်းတွေ ပျက်စီးသွားတယ်။ ဒီလို ဆက်လုပ်နေမယ်ဆိုရင် နောင်လာမယ့်နှစ်တွေမှာ လယ်ယာလုပ်ဖို့တောင် ခက်ခဲလာနိုင်တယ်” ဟု ဒေသခံတောင်သူတစ်ဦးက ပြောသည်။

ရွာငံမြို့နယ်သည် လက်ရှိတွင် လက်နက်ကိုင်အဖွဲ့များ လှုပ်ရှားနေသည့်နယ်မြေ ဖြစ်သောကြောင့် ဒေသခံများအနေဖြင့် အာဏာပိုင်များထံ တိုင်ကြားရာတွင် စိုးရိမ်မှုများ ရှိနေကြောင်း သိရသည်။

“ဘယ်ဖက်ကိုပဲ တိုင်တိုင် ကြောက်ရတယ်။ ဒါပေမဲ့ ဒီလို မြေယာ ပျက်စီးနေတာကိုတော့ မနေနိုင်တော့ဘူး။ ရပ်တန့်ပေးဖို့ လိုနေပြီ” ဟု ဒေသခံတစ်ဦးက ဆိုသည်။

ယင်းကိစ္စကို ရွာငံမြို့နယ် လွှတ်တော်အမတ်များထံသို့ ဒေသခံတောင်သူများက တင်ပြထားပြီး တရားမဝင် မြေနီတူးဖော်မှုများကို တားဆီးပေးရန်နှင့် လွှတ်တော်အတွင်း မေးမြန်းဆွေးနွေးပေးနိုင်ရေး တောင်းဆိုထားကြသည်။

ထို့ပြင် ထုတ်ယူထားသော မြေနီများကို ဘိလပ်မြေထုတ်လုပ်ရာတွင် အသုံးပြုရန် ကဇက်ကျေးရွာမှ ကျောက်ဆည်မြို့ရှိ ဘိလပ်မြေစက်ရုံများသို့ တရားမဝင် သယ်ယူပို့ဆောင်နေကြောင်း ဒေသခံများက ပြောသည်။

#MeKongNews
#ရွာငံ
#မြေနီ
#တရားမဝင်တူးဖော်
#ဒေသခံတောင်သူ
#တောင်းဆို

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)