မဲခေါင်၊ ဧပြီ ၁၆
စစ်ကောင်စီ ရွေးကောက်ပွဲမှ သမ္မတဖြစ်လာသည့် ဦးမင်းအောင်လှိုင်ကို ကြိုဆိုကြောင်း ဂုဏ်ပြုသဝဏ်လွှာပေးပို့ခဲ့သည်ဟု တအာင်းတပ်ဖွဲ့ – TNLA က ယမန်နေ့တွင် သတင်းထုတ်ပြန်သည်။
ထို့ပြင် ဦးမင်းအောင်လှိုင် ဦးဆောင်သည့် အစိုးရသစ်အနေဖြင့် အပစ်ခတ်ရပ်စဲရေးကတိကဝတ်ကို ဆက်လက်ထိန်းသိမ်းပြီး နိုင်ငံရေးပြဿနာကို ဆွေးနွေးအဖြေရှာရန် မျှော်လင့်သည်ဟုလည်း TNLA ထုတ်ပြန်ချက်တွင် ပြောသည်။
TNLA သည် တရုတ်နိုင်ငံ၏ ကြားဝင်စေ့စပ်မှုဖြင့် ဟိုင်ဂင်သဘောတူညီချက် မှတစ်ဆင့် (၉) ကြိမ်မြောက်ဆွေးနွေးပွဲတွင် စစ်ကောင်စီတပ်နှင့် ၂ ဖက် အပြန်အလှန် အပစ်အခတ်ရပ်စဲရေး သဘောတူစာချုပ်ကို ၂၀၂၅ ခုနှစ်၊ အောက်တိုဘာ ၂၈ ရက်တွင် သဘောတူလက်မှတ် ရေးထိုးခဲ့သည်။
ထို့ကြောင့် TNLA အနေဖြင့် စစ်တပ်၊ ဦးမင်းအောင်လှိုင် ဦးဆောင်သည့် အစိုးရသစ်နှင့်လည်း အပစ်အခတ်ရပ်စဲရေး ကတိကဝတ်များကို ဆက်လက်ထိန်းသိမ်းပြီး၊ နိုင်ငံရေးပြဿနာများကို နိုင်ငံရေးနည်းလမ်းဖြင့် ငြိမ်းချမ်းစွာ ဆွေးနွေးအဖြေရှာနိုင်ရန် အထူးမျှော်လင့်ထားသည်ဟု ထုတ်ပြန်ချက်တွင် ဖော်ပြသည်။
လက်နက်ကိုင် တော်လှန်ရေးတပ်ဖွဲ့အနေဖြင့် အာဏာသိမ်း ခေါင်းဆောင်တစ်ဦးကို ဂုဏ်ပြုကြိုဆိုကြောင်း သဝဏ်လွှာပေးပို့ခြင်းသည် ရှေ့နောက်မညီသည့် လုပ်ရပ်ဖြစ်သည်ဟုလည်း ရှမ်းမြောက် သတင်းရင်းမြစ်တစ်ဦးက ပြောသည်။
“မင်းအောင်လှိုင်ကို ကြိုဆိုတဲ့ စာပို့လိုက်တော့ ကျနော်တို့ တော်လှန်ရေး ဘက်တော်သားတွေအနေနဲ့ စိတ်မကောင်းဖြစ်တာ ခံစားချက်ဖြစ်တာတော့ ပြောစရာတောင် မလိုပါဘူး။ အာဏာရှင်စနစ် အမြစ်ပြတ်ရေးဆိုတဲ့ တော်လှန်ရေးခရီးမှာ သွေးကြွေးမှာ ဆွေးနွေးစရာမရှိလို့တောင် ခံယူကြတာလေ” ဟု ၎င်းက ဆိုသည်။
သို့သော် TNLA တွင်လည်း ဖိအားများ ရှိနေနိုင်သည်ကို ထည့်တွက်ရမည်ဖြစ်ကြောင်း အခြားသတင်းရင်းမြစ်တစ်ဦးက ထောက်ပြသည်။
“အပစ်ခတ်ရပ်စဲရေး ကတိကဝတ်ကို ထိန်သိမ်းဖို့ အထူးမျှော်လင့်တယ်ဆိုတဲ့ စကားရဲ့ နောက်ကွယ်မှာ ဘာတွေဖြစ်ပျက်နေတာလဲ ဘာတွေရှိသေးလဲ၊ ဘယ်ဖိအားက ဘယ်လောက်ရှိနေလို့ ဒီလို သဝဏ်လွှာတွေကို ပို့နေရသလဲဆိုတာကို ကြည့်နိုင်ဖို့လည်း လိုပါတယ်။ ကိုယ်ဝမ်းနာ ကိုယ်သာသိဆိုသလိုပဲ ကိုယ်ချင်းစာနိုင်ဖို့ သူ့အရပ်သူ့ဇာတ်တော့ ထည့်တွက်ရမှာပေါ့။ ဇွဲကြီးသူတွေသာ နောက်ဆုံး အောင်ပွဲဆင်မှာပါလို့ပဲ ပြောချင်တယ်” ဟု ၎င်းက TNLA ၏ သဝဏ်လွှာ ပေးပို့မှုနှင့် ပတ်သက်ပြီး မှတ်ချက်ပြုသည်။
ပြီးခဲ့သည့် ဧပြီပထမပတ်တွင် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်အား စစ်ကောင်စီ ရွေးကောက်ပွဲမှ အမတ်ဖြစ်လာသူများက သမ္မတအဖြစ် ရွေးချယ်ခန့်အပ်ခဲ့သည်။
အာဏာသိမ်းပြီး သမ္မတဖြစ်လာသည့် ဦးမင်းအောင်လှိုင်ကို တရုတ် – မြန်မာနယ်စပ်အခြေစိုက် အင်အားကြီးလက်နက်ကိုင်တပ်ဖွဲ့ဖြစ်သည့် UWSA-“ဝ”တပ်ဖွဲ့ နှင့် NDAA – မိုင်းလားတပ်ဖွဲ့တို့ကလည်း ဂုဏ်ပြုသဝဏ်လွှာပေးပို့ခဲ့သည်။
#MeKongNews
#သမ္မတ
#စစ်ခေါင်းဆောင်
#မင်းအောင်လှိုင်
#TNLA
#ကြိုဆို
