မဲခေါင်၊ မတ် ၂၅
ရှမ်းပြည်မြောက်ပိုင်း၊ လာရှိုးမြို့တွင် စစ်ကောင်စီထံ ဆက်ကြေးပေးပြီး လောင်းကစားမျိုးစုံ ပြောင်ပြောင်တင်းတင်း ဖွင့်လှစ်နေသည်ဟု ဒေသခံသတင်းရင်းမြစ်များက ပြောသည်။
လားရှိုးမြို့ ရပ်ကွက် ၇ ရှိ စိတ္တသုခဘောလုံးကွင်းတွင် ပြည်သူ့စစ် ခေါင်းဆောင်ဟောင်းတစ်ဦး ဦးဆောင်ကာ ၂၄ နာရီ ပိတ်ရက်မရှိ လောင်းကစားဝိုင်းမျိုးစုံ ဖွင့်လှစ်နေခြင်းဖြစ်သည်ဟု သတင်းရင်းမြစ်က ပြောသည်။
ယင်းလောင်းကစားဝိုင်းများကို ပြည်သူ့စစ်ခေါင်းဆောင်ဟောင်း ဦးဒီးဒီး ဆိုသူက စစ်ကောင်စီတပ်အား ဆက်ကြေးပေးကာ ဖွင့်လှစ်ထားခြင်း ဖြစ်ပြီး လောင်းကစားဝိုင်းမှ အသံများမှာလည်း ဆူညံသဖြင့် ပတ်ဝန်းကျင်နေ ပြည်သူများအား အနှောက်အယှက်ဖြစ်စေသည်ဟု ဆိုသည်။
“စိတ္တသုခကွင်းမှာ လုပ်နေတာ။ နာမည်ကတော့ ပွဲလုပ်နေတယ်ဆိုပြီး တကယ်က လောင်းကစားဝိုင်းတွေကြီးပဲ ဖြစ်နေတယ်၊ လူတွေအော်ဟစ်နေတာရော သီချင်းသံ စက်သံတွေရော ဆူညံနေတာပဲ။ လောင်းကစားဆိုလည်း အမျိုးစားအစုံပဲ ထည့်ထားတာ။ ဘယ်သူမှ မပြောရဲဘူး”ဟု လားရှိုးမြို့ခံတစ်ဦးက ပြောသည်။
စစ်ကောင်စီအား ဆက်ကြေးပေးကာ ဖွင့်လှစ်ထားသည့် ယင်းလောင်းကစားပွဲတွင် လေးကောင်ဂျင်၊ ဂလုံးဂလုံး၊ ရှမ်းကိုးမီး၊ ရွှေဘောလုံး စသည့် လောင်းကစားမျိုးစုံ ပါဝင်သည်ဟု သတင်းရင်းမြစ်ကပြောသည်။
“လောင်းကစားကတော့ အစုံပဲ ပိတ်ချိန်လည်း မရှိဘူး။ လူတွေ အကျင့်ပျက်စီးအောင် လုပ်နေသလိုပဲ ဆက်ကြေးလည်း ရနေတော့ အစိုးရကလည်း ဘာမှ မလုပ်ဘူး လွှတ်ပေးထားတယ်” ဟု လားရှိုးမြို့ခံတစ်ဦးက ပြောသည်။
လောင်းကစားဝိုင်း ဖွင့်ထားသည့် ကွင်းနေရာသည် ဘောလုံးကွင်း ၂ ကွင်းစာ ကျယ်ဝန်းသဖြင့် လူထောင်ချီ လောင်းကစား ပြုလုပ်နိုင်သည့် နေရာဖြစ်ပြီး လောင်းကစားရုံအတွင်းမှ နေ့နေ့ ညည မီးစက်သံများ ဆူညံကျယ်လောင်သဖြင့် ပတ်ဝန်းကျင်အတွက် အနှောင့်အယှက်လည်း ဖြစ်ကြောင်း အခြား သတင်းရင်းမြစ်တစ်ဦးက ပြောသည်။
စစ်ကောင်စီက ပြန်လည်ထိန်းချုပ်သည့် လားရှိုးမြို့တွင် ခိုးမှု၊ လုယက်မှု များပြားလာခြင်းသည် လောင်းကစားဝိုင်းများကို ဖမ်းဆီးခြင်းမပြုဘဲ ဆက်ကြေးယူကာ လွှတ်ပေးထားခြင်းကြောင့်လည်း ပါဝင်သည်ဟု ဒေသခံများက ဆိုသည်။
#MeKongNews
#လားရှိုး
#စိတ္တသုခဘောလုံးကွင်း
#ဆက်ကြေးပေး
#လောင်းကစားဝိုင်း
