မဲခေါင်၊ ဒီဇင်ဘာ ၁၂
– ထိုင်း – ကမ္ဘောဒီးယား နယ်စပ်တစ်လျှောက် တိုက်ပွဲများသည် ယနေ့နံနက် ၉ နာရီမှစ၍ ဆက်လက် ဖြစ်ပွားနေပြီး ကမ္ဘောဒီးယား တပ်ဖွဲ့ဝင်များက ပစ်ကူလက်နက် အမျိုးမျိုး အသုံးပြုကာ ထိုင်းနိုင်ငံဘက်ရှိ အရေးပါသော နေရာများစွာသို့ ပစ်ခတ်ခဲ့ကြကြောင်း ထိုင်းကာကွယ်ရေး ဦးစီးချုပ်ရုံးက ထုတ်ပြန်သည်။
– ယနေ့ညနေ ၅ နာရီခွဲတွင် ထိုင်းစစ်သားများ အန်မား တောင်ကြားရှိ တောင်ကုန်းအမှတ် – ၆၇၇ ပေါ်၌ ထိုင်းအလံကို အောင်မြင်စွာ လွှင့်ထူနိုင်ခဲ့ပြီး စစ်ဆင်ရေးတပ်ဖွဲ့က ၎င်းဧရိယာထဲသို့ ဝင်ရောက်ပြီး ရှင်းလင်းခဲ့သည်။
– ထိုင်းစစ်သားများက အငြင်းပွားနေသည့် မြင်းကုန်းနှီး တောင်ကြားကို ရာနှုန်းပြည့် ထိန်းချုပ်ထားနိုင်ပြီဟု ထိုင်းစစ်တပ်က ယနေ့ ညနေပိုင်းတွင် ဖော်ပြသည်။
– ထိုင်းတပ်ဖွဲ့များက ကမ္ဘောဒီးယား၏ ရှေ့တန်းကွပ်ကဲရေးနှင့် ထိန်းချုပ်ရေး နေရာတစ်ခုကို ၁၅၅ မမ M198 ဟောင်ဝစ်ဇာများဖြင့် ပစ်ခတ်ခဲ့သည်။
– ပရီယာဝီဟီယာ ဒေသရှိ လူနေထူထပ်သော နေရာများမှ ကမ္ဘောဒီးယား တပ်ဖွဲ့ဝင်များက ထိုင်းနိုင်ငံ၊ ဥဘွန်ရတ်ချဌာနီ ခရိုင်၊ နမ်းယွမ်မြို့နယ်ရှိ တောင်ကုန်းအမှတ် – ၆၇၇သို့ BM-21 ဒုံးကျည်များဖြင့် ပစ် ခတ်ခဲ့ကြောင်း ထိုင်းစစ်တပ်က ပြောသည်။
– ကမ္ဘောဒီးယား – ထိုင်းနယ်စပ်တစ်လျှောက် ပြန်လည်ဖြစ်ပွားလာသော တင်းမာမှုများ နောက်ဆက်တွဲအဖြစ် ယဉ်ကျေးမှု အမွေအနှစ်များကို အကာအကွယ်ပေးရန် လိုအပ်ကြောင်း ယူနက်စကိုက အလေးပေး ပြောကြားသည်။
– ယနေ့တွင် ပွိုက်ပက်ဒေသ၌ ပိတ်မိနေသော ထိုင်းအရပ်သားများအား ကမ္ဘောဒီးယား အာဏာပိုင်များက နေရပ်ပြန်ခွင့် မပြုသေးကြောင်း ထိုင်းစစ်တပ်က အတည်ပြု ပြောကြားသည်။ ၎င်းတို့ လုံခြုံစွာ ပြန်လာရေးအတွက် ထိုင်းနိုင်ငံခြားရေးဝန်ကြီးဌာနက ကမ္ဘောဒီးယားနှင့် တက်ကြွစွာ ညှိနှိုင်း ဆောင်ရွက်နေကြောင်း ဆိုသည်။
– ကမ္ဘောဒီးယား၊ ပါဆတ်ခရိုင်၊ ဗီယဲဗိန်းမြို့နယ်၊ ထမာဒါရှိ ဒေသခံနေအိမ်များနှင့်စီးပွားရေး အဆောက်အအုံများသည် ထိုင်းစစ်တပ်၏ လတ်တလော တိုက်ခိုက်မှုများကြောင့် ပျက်စီး ဆုံးရှုံးခဲ့ရကြောင်း ကမ္ဘောဒီးယား သတင်းများက ဆိုသည်။
ထိုတိုက်ခိုက်မှုများတွင် လက်နက်ကြီး၊ လက်နက်ငယ်များဖြင့် ပစ်ခတ်ခြင်း၊ အသေခံ ဒရုန်းများဖြင့် တိုက်ခိုက်ခြင်း၊ ရေတပ် စစ်သင်္ဘောများမှ အမြောက်ဖြင့် ပစ်ခတ်ခြင်းနှင့် F – 16 တိုက်လေယာဉ်များဖြင့် ဗုံးကြဲ တိုက်ခိုက်ခြင်းများ ပါဝင်ခဲ့ကြောင်း သိရသည်။
– ယနေ့အထိ ထိုင်းနိုင်ငံမှ ကမ္ဘောဒီးယားအပေါ် စစ်ရေး ကျူးကျော်မှုများကြောင့် အရပ်သား ၁၁ ဦး သေဆုံးပြီး ၅၉ ဦး ဒဏ်ရာရခဲ့ကြောင်း ကမ္ဘောဒီးယားက ဆိုသည်။ အာဏာပိုင်များ၏ ထုတ်ပြန်ချက်အရ မိသားစုပေါင်း ၈၉၆၈၇ စု မှ စုစုပေါင်း လူဦးရေ ၃၀၃၂၁၃ ဦး နေရပ်စွန့်ခွာ ထွက်ပြေးခဲ့ရကြောင်း သိရသည်။
#MeKongNews
#ထိုင်း
#ကမ္ဘောဒီးယား
#စစ်ပွဲ
#နောက်ဆုံးရ
