မဲခေါင်၊ နိုဝင်ဘာ ၂၃
မူဆယ် ၁၀၅ မိုင်ကုန်သွယ်ရေးဇုန်မှ ထွက်လာသော ကုန်တင်ယာဉ်အားလုံးကို တားဆီး၊ ဖမ်းဆီးရန် စစ်ကောင်စီမှ အမိန့်ထုတ်ထားကြောင်း ယင်းလမ်းကြောင်းတွင် သယ်ယူပို့ဆောင်နေသည့် ကုန်သည်များထံမှ သိရသည်။
မြောက်ပိုင်း မဟာမိတ် ၃ ဖွဲ့ AA၊ MNDAA၊ TNLA တို့ ထိန်းချုပ်ထားသည့် ၁၀၅ မိုင်ဇုန်မှ ထွက်သော ကားအားလုံးကို တရားမဝင် ကုန်သွယ်ရေးအဖြစ် သတ်မှတ်ကာ နယ်စပ်ဂိတ်များအထိ တင်းကြပ်စွာ တားဆီး၊ ဖမ်းဆီးရေး လုပ်ဆောင်နေကြောင်း ရှမ်းမြောက်က ကုန်သည်တစ်ဦးက ယနေ့ မဲခေါင်သို့ ပြောကြားသည်။
စစ်ကောင်စီက ရှမ်းပြည်မြောက်ပိုင်း မူဆယ် ၁၀၅ မိုင်ဇုန်ကို မြောက်ပိုင်းညီနောင်မဟာမိတ် ၃ ဖွဲ့က ထိန်းချုပ်ထားနေသောကြောင့် ထိုဇုန်မှ ပြည်တွင်းသို့ ဝင်လာသည့် ကုန်ကားအားလုံးကို နိုဝင်ဘာလ ဒုတိယပတ်မှစ၍ တင်းတင်းကျပ်ကျပ် အရေးယူရန် စစ်ကောင်စီက အထူးညွှန်ကြားချက် ထုတ်ပြန်ထားကြောင်း ယင်းကုန်သည်က ပြောသည်။
“အရင်ကလည်း ဖမ်းဖို့ ဆိုတာ ရှိပေမယ့် အခုက ထပ်ပြီး တင်းကြပ်လာတယ်။ သူပုန်အားမပေးဖို့ လည်းပြောတယ်။ ခုက လမ်းမှာ ဖမ်းမိရင် လူပါ ‘သူပုန်အားပေးမှု’ နဲ့ အရေးယူမယ်လို့ ပြောနေတယ်။ မကြာခင် ကုန်တွေ ပြတ်သွားမယ်၊ စျေးတွေ ကမောက်ကမ တက်လာမယ်”ဟု ၎င်းက မဲခေါင်ထံသို့ ပြောသည်။
မန္တလေး–မူဆယ် ကုန်သွယ်ရေးလမ်းကြောင်းမှ ရရှိနေသည့် ဝင်ငွေများသည် မြောက်ပိုင်း မဟာမိတ်တပ်ဖွဲ့များ၏ ဘဏ္ဍာရေးကို အထောက်အပံ့ပေးနေပြီး ၎င်းတို့ကို တိုက်ခိုက်ရာတွင် ပြန်လည်အသုံးပြုနေကြောင်း စစ်ကောင်စီက စွပ်စွဲထားသည်။
မြောက်ပိုင်းညီနောင်မဟာမိတ် ၃ ဖွဲ့သည် ယခုနှစ် ဇူလိုင် ၁ ရက်မှ စ၍ ၁၀၅ မိုင် ကျင်းစန်းကျော့ဂိတ်တွင် ၎င်းတို့ သတ်မှတ်ထားသည့် အခွန်နှုန်းထားများဖြင့် ကုန်သွယ်ခွန်ကို ကောက်ခံလျက်ရှိနေသည်။
စစ်ကောင်စီဘက်ကမူ ယခုနှစ် ဩဂုတ်လက တရုတ်အစိုးရထံ ၁၀၅ မိုင်ဇုန်အပါအဝင် ပြည်ထောင်စု ကုန်သွယ်လမ်းမပေါ်ရှိ မြို့များကို ပြန်လည် ရရှိနိုင်ရန် အကူအညီ တောင်းခံထားကြောင်းလည်း သိရသည်။
လက်ရှိတွင် စစ်ကောင်စီက တရုတ်အကူအညီဖြင့် MNDAA ကို တပ်စွဲထားသည့် နေရာများမှ အတင်းအကြပ် ဆုတ်ခွာခိုင်းနေသလို မူဆယ် ၁၀၅ မိုင်ကို ဖိအားပေးရန် စစ်အင်အားများ ဖြည့်တင်းလျက်ရှိကြောင်း ဒေသခံများထံမှ သိရသည်။
#MeKongNews
#မူဆယ်
#၁၀၅မိုင်ဇုန်
#ကုန်ကားဖမ်းဆီးမှု
#မြောက်ပိုင်းမဟာမိတ်
