မဲခေါင်၊ နိုဝင်ဘာ ၄
ရှမ်းပြည်တောင်ပိုင်း၊ ဖယ်ခုံမြို့နယ်၊ ဘောရန်ကျေးရွာ အနီးတဝိုက်တွင် စစ်ကောင်စီ၊ PNO ပူးပေါင်းတပ်နှင့် ကရင်နီ တော်လှန်ရေးတပ်ပေါင်းစုတို့ နှစ်ဖက်တိုက်ပွဲ ပြင်းထန်စွာ ဖြစ်ပွားခဲ့ကြောင်း ယင်းတိုက်ပွဲတွင် ပါဝင်သည့် တော်လှန်ရေးတပ်ဖွဲ့ဝင်များထံမှ သိရသည်။
နိုဝင်ဘာလ ၁ ရက်မှ နိုဝင်ဘာလ ၃ ရက်အထိ ဖယ်ခုံမြို့နယ်အနောက်ဘက်ခြမ်းရှိ ဘောရန်ကျေးရွာ အနီးတဝိုက်ဖြစ်ပွားခဲ့သည့် တိုက်ပွဲအတွင်း စစ်ကောင်စီဘက်မှ ဘောရန်ကျေးရွာကို မီးရှို့နေကြောင်း တော်လှန်ရေးတပ်ဖွဲ့ဝင်တစ်ဦးကပြောသည်။
“တိုက်ပွဲဖြစ်တာဟုတ်ပါတယ်။ ကျတော်တို့ဘက်ကတော့ ထိခိုက်ကျဆုံးမှုမရှိဘူး။ ဘောရန်ကျေးရွာအနီးမှာ ဖြစ်တာပါ။ ရွာလွတ်လုံးကျွတ်နီးပါးအရှို့ခံရတာပါ။ လက်ရှိကတော့ တင်းမာနေတယ်”ဟု ၎င်းကပြောသည်။
တိုက်ပွဲမှာ နိုဝင်ဘာ ၁ ရက်တွင် နှစ်ဖက်ထိတွေ့မှု ပြင်းထန်ခဲ့ပြီး နိုဝင်ဘာ ၂ ရက် ည ၇ နာရီတွင် စစ်ကောင်စီစစ်ကြောင်းများထပ်ထိုးလာရာယမန်နေ့ နိုဝင်ဘာ၃ရက် ည နေ ၅နာ ရီထိ တိုက်ပွဲများ ဖြစ်ပွားကြောင်း၊ စစ်ကောင်စီဘက်က သေဆုံးသူများကြောင်း တော်လှန်ရေးတပ်ဖွဲ့ဝင်များထံမှ သိရသည်။ ထိခိုက်သေဆုံးမှု အရေအတွက်ကိုမူ အတည်မပြုနိုင်သေးပေ။
ဖယ်ခုံမြို့နယ်အတွင်း ဖြစ်ပွားသည့် တိုက်ပွဲများတွင် စစ်ကောင်စီတပ်ဘက်မှ လက်နက်ကြီးများအပြင် ဒရုန်းများကိုပါ အသုံးပြု၍ တိုက်ခိုက်နေသည်ဟုလည်း ဒေသခံသတင်းရင်းမြစ်ကလည်း ပြောသည်။
ပြီးခဲ့သည့် အောက်တိုဘာလ ပထမပတ်နှင့် ဒုတိယပတ်တွင် ဖယ်ခုံမြို့နယ် အနောက်ဘက်ခြမ်းရှိ တောင်စလုံးကျေးရွာ၊ မြောက်စလုံးကျေးရွာနှင့် ဘောရန်ကျေးရွာများကို စစ်ကောင်စီတပ်နှင့် ပအိုဝ်းပြည်သူ့စစ် (PNO) ပူးပေါင်းစစ်ကြောင်းက စတင်ထိုးစစ်ဆင် ဝင်ရောက်ခဲ့ပြီး နေအိမ်များကို မီးရှို့ဖျက်ဆီးခဲ့သေးကြောင်း ဒေသခံများထံမှ သိရသည်။
ယင်းတိုက်ပွဲများကြောင့်ဒေသခံ ၃၀၀၀ ခန့် သည် နီးစပ်ရာ ကျေးရွာများနှင့်တောတောင်အတွင်းသို့ ထွက်ပြေးတိမ်းရှောင် နေကြရပြီး လက်ရှိတွင် စားနပ်ရိက္ခာနှင့် ဆေးဝါးအကူအညီများ လိုအပ်နေကြောင်း ဒေသခံများထံမှ သိရသည်။
#MeKongNews
#ဖယ်ခုံမြို့နယ်
#တိုက်ပွဲပြင်းထန်
#စစ်ကောင်စီ
#ဘောရန်ကျေးရွာ
