မဲခေါင်၊ မေ ၉
အရှေ့တောင်အာရှတွင် ထိုင်းနိုင်ငံ စီးပွားရေးနှင့် ပြည်ပခရီးသွားလုပ်ငန်း ကျဆင်းလာချိန် စဉ်ဆက်မပြတ် စီးပွားရေးတိုးတက်လာသော ဗီယက်နမ်သည် ပြည်ပခရီးသွားနှင့် ရင်းနှီးမြှုပ်နှံမှု လုပ်ငန်းများ ဗဟိုချက်နိုင်ငံဖြစ်လာစေရေး ရွှေဗီဇာဟု အမည်ပေးထားသည့် ၁၀ နှစ်ခံ စတင်ထုတ်ပေးပြီဖြစ်ကြောင်း Times Of India သတင်းက ရေးသာဖော်ပြသည်။
Vietnam+ မီဒီယာ၏ ဖော်ပြမှုအရ ၂၀၂၅ ခုနှစ် ပထမ ၄ လပတ်အတွင်း ဗီယက်နမ်သို့ ပြည်ပခရီးသွား ၇.၇၆ သန်း ဝင်ရောက်ပြီး နှစ်စဉ် ၂၃.၈ ရာခိုင်နှုန်း မြင့်တက်နေကြောင်း ဗီယက်နမ် အမျိုးသားခရီးသွား အာဏာပိုင်အဖွဲ့ ထုတ်ပြန်ချက်အရ သိရှိရသည်။
ထို့ကြောင့် ရေရှည်တည်တံ့သော ခရီးသွားလုပ်ငန်းဖွံ့ဖြိုးမှုနှင့် ပြည်ပရင်းနှီးမြှုပ်နှံမှုလုပ်ငန်းများ မြင့်တက်လာစေရန် ဗီယက်နမ်သည် နှစ်ရှည် ၁၀ နှစ်ခံ ရွှေဗီဇာကို စတင်ဖွင့်လှစ်ပေးလိုက်ခြင်းဖြစ်သလို ဗီယက်နမ်တွင် ခရီးသွားလုပ်ငန်း၊ ဆန်းသစ်တီထွင်မှုလုပ်ငန်း သို့မဟုတ် စီးပွားရေးအကျိုးပြုနိုင်သူများကို ရွှေဗီဇာ ဆက်လက်သက်တမ်းတိုးခွင့်အပြင် အမြဲတမ်းနေထိုင်နိုင်ခွင့်ဗီဇာပါ ထပ်ပေးရန် ကနဦး စီစဉ်မှုဖြစ်ကြောင်း သိရသည်။
အထူးသဖြင့် ယဉ်ကျေးမှုနှင့် စီးပွားရေးကူးလူးဖလှယ်ရန် အိန္ဒိယနိုင်ငံသား ခရီးသွားများကို ပစ်မှတ်ထားပြီး သံရုံးသို့သွားစရာမလိုဘဲ ဗီဇာအမျိုးမျိုးကို ဒစ်ဂျစ်တယ်စနစ်ဖြင့် လျှောက်ထားနိုင်စေရန်လည်း စီစဉ်ထားကြောင်း၊ ပြည်ပခရီးသွားနှင့် စီးပွားရေးရင်းနှီးမြှုပ်နှံလိုသူများ မိသားစုအလိုက် နေထိုင်ရာတွင် အဆင်ပြေစေရေး ဟိုချီမင်း၊ ဟနွိုင်းနှင့် ဒါနန်းမြို့ကြီးများ၌ လုံခြုံဘေးကင်းခြင်းနှင့် ရင်သွေးများ ပညာသင်ရန် နိုင်ငံတကာအဆင့် စာသင်ကျောင်းများ၊ ဆေးရုံ၊ အိမ်ယာစီမံကိန်းများကိုလည်း ထူထောင်ပေးထားမည်ဟု ဆိုသည်။
ဗီယက်နမ်သို့ အဓိက စီးပွားရေးရင်းနှီးမြှုပ်နှံသူများအဖြစ် တရုတ်နိုင်ငံသား ၁ .၉၅ သန်း၊ တောင်ကိုရီးယားမှ ၁.၅၈ သန်း၊ ထိုင်ဝမ်မှ ၄၄၀၀၀၀၊ အမေရိကန်မှ ၃၂၃၀၀၀ တို့ လာရောက်မြှုပ်နှံထားပြီး ဂျပန်၊ ကမ္ဘောဒီးယား၊ ဩစတြေးလျ၊ အိန္ဒိယ၊ မလေးရှား၊ ထိုင်းနိုင်ငံသားများ အစဉ်လိုက် ရင်းနှီးမြှုပ်နှံမှုများ ပြုလုပ်ထားကြောင်း သိရှိရသည်။
ဗီယက်နမ်သည် ဗီဇာကင်းလွတ်ခွင့် မူဝါဒချမှတ်ပေးပြီးနောက် ဥရောပစျေးကွက်လည်း ပိုမိုဖွံ့ဖြိုးလာပြီး ယူကေမှ လာရောက်လည်ပတ်သူ ၂၀ .၇ ရာခိုင်နှုန်း၊ ပြင်သစ်မှ ၂၄.၇ ရာခိုင်နှုန်း၊ ဂျာမနီမှ ၁၈.၈ ရာခိုင်နှုန်း၊ အီတလီမှ ၃၂.၆ ရာခိုင်နှုန်း၊ စပိန်မှ ၁၂.၉ ရာခိုင်နှုန်း၊ ဒိန်းမှတ်မှ ၁၂.၇ ရာခိုင်နှုန်း လည်ပတ်မှု မြင့်တက်လာကြောင်းလည်း သိရသည်။
ကိုကလင်း
Ref:The Nation
#MeKongNews
#ဗီယက်နမ်
#အာဆီယံ
#ရွှေဗီဇာ
#ဟိုချီမင်း
#ဒါနန်း
