မဲခေါင်၊ အောက်တိုဘာ ၁၃
ရှမ်းပြည်နယ် တောင်ပိုင်း၊ ညောင်ရွှေမြို့နယ်၊ အင်းလေးဒေသ၊ ကံရွာမှာ အောက်တိုဘာ ၁၂ ရက်နေ့၊ ည ၈ နာရီက စစ်ကောင်စီနဲ့ ပျူစောထီးကို ဆက်ကြေးပေး ဖွင့်လှစ်ထားတဲ့ လောင်းကစားဝိုင်း အနီး အသံမိုင်း ပေါက်ကွဲ ပြီးနောက် လူ ၆ ဦးကို စစ်ကောင်စီတပ်က ဖမ်းဆီးသွားတယ်လို့ ဒေသခံတွေက ပြောပါတယ်။
မိုင်းပေါက်ကွဲပြီးနောက် စစ်ကောင်စီတပ် ရောက်လာပြီး ပေါနော်ရွာက ဒေသခံ ၂ ဦးကို ဖမ်းဆီးကာ ည ၉ နာရီမှာတော့ သန်းထောင်စျေး တောင်ဘက်က ဓာတ်ဆီဆိုင် အနီး ဆိုင်ကယ်နဲ့ သွားလာနေတဲ့ လူငယ် ၄ ဦးကို စစ်ကောင်စီက ထပ်မံ ဖမ်းဆီးလိုက်တယ်လို့ ဆိုပါတယ်။
“လူငယ်တွေကို အကြောင်းအရင်း မရှိဘဲနဲ့ မိုင်းကွဲတာကြောင့် တွေ့ရာလူကို ဖမ်းနေတာ။ အဲ့ဒီ လူငယ် ၄ ယောက်ရဲ့ ဆိုင်ကယ် ၂ စီးကိုလည်း နောက်နေ့ လာရွေးလို့ ပြောထားပေမယ့် လူကြီးတွေ ဒီမနေ့ မနက် သွားရွေးတာ ဆိုင်ကယ်ကိုလည်း ပြန်မပေးဘူး။ အဖမ်းခံရတဲ့ လူတွေလည်း ဘာကြောင့် ဖမ်းသွားတယ်၊ ဘယ်မှာ ဖမ်းထားတယ်ဆိုတာ မသိရသေးဘူး” လို့ အင်းလေး ဒေသခံ တစ်ဦးက ပြောပါတယ်။
ကံရွာ အသံမိုင်းကွဲမှုဟာ စစ်ကောင်စီနဲ့ ပျူစောထီးတွေက ဒေသခံတွေ အပေါ် ဆက်ကြေးငွေ တောင်းဖို့လို့ အကွက်ဆင်တဲ့ သဘော ဖြစ်တယ်လို့ အင်းလေး ဒေသခံ တစ်ဦးက သုံးသပ်ပါတယ်။
“အခုအချိန်က အင်းလေးမှာ စကစ ရော ပျူရော PNO တွေရော ဘုရားပွဲကို အကြောင်းပြပြီး အများကြီး အင်အား တိုးထားတာလေ။ ဒီအချိန်မှာမှ အသံမိုင်း ကွဲတယ် ဆိုတော့ စဉ်းစားစရာပေါ့။ အင်းလူထုက သူတို့ကို လက်မခံတော့ သူတို့ကို လက်ခံလာအောင် အကွက်ဆင်တာ ဖြစ်မှာပေါ့။ ပြီးတော့ ငွေတောင်းစားချင်လို့ လုပ်တာလည်း ဖြစ်နိုင်တာပဲ” လို့ အင်းလေး ဒေသခံ လူငယ် တစ်ဦးက ပြောပါတယ်။
လက်ရှိ ဖောင်တော်ဦး ဘုရားပွဲ နီးကပ်တာနဲ့အမျှ ဘုရားပွဲကို အကြောင်းပြုပြီး နိုင်ငံရေး အမြတ်ထုတ်ဖို့ ပြင်ဆင် နေတဲ့ စစ်ကောင်စီဟာ ဘုရားပွဲ လုံခြုံရေးဆိုပြီး စစ်ကောင်စီတပ်၊ PNO ပြည်သူ့စစ်နဲ့ အင်းလေး ပျူစောထီးတွေကို တိုးမြှင့် ချထားပါတယ်။
အဲ့ဒီလို တိုးမြှင့်ချထားတဲ့ စစ်ကောင်စီလက်အောက်ခံ အဖွဲ့တွေဟာ ဘုရားပွဲ လုံခြုံရေးကြေးဆိုပြီး ဆက်ကြေး ကောက်တာ အပါအဝင် အင်းလေး ဒေသခံတွေရဲ့ ကားတွေကို ချောဆွဲ အသုံးပြုတာ၊ ဒေသခံတွေကို ဖမ်းဆီး ငွေညှစ်တာတွေ ပြုလုပ်နေတယ်လို့ ဒေသခံတွေက ပြောပါတယ်။
CJ-002
#MekongNews
#အင်းလေးဒေသ
#အသံမိုင်း
#လောင်းကစား၀ိုင်း
