မဲခေါင်၊ အောက်တိုဘာ ၇
ရှမ်းပြည်မြောက်ပိုင်းကို စစ်ကောင်စီက လောင်စာဆီ၊ ဆေးဝါးနဲ့ ဆန် အပါအဝင် လူသုံးကုန်ပစ္စည်းတွေ တင်ပို့မှုကိုပိတ်ဆို့တာ၊ လူအဝင်အထွက်ကို တားမြစ်ပိတ်ဆို့တာတွေ အခုအောက်တိုဘာလ အစ ရက်ပိုင်းအတွင်း ပိုမိုတင်းကြပ်လုပ်ဆောင်လာတယ်လို့ ဒေသခံတွေထံက သိရပါတယ်။
တရုတ်ဘက်ကလည်း MNDAA နဲ့ ကိုးကန့်ဒေသကို ဖြတ် ၅ဖြတ်လုပ်နေပြီး ထိစပ်နေတဲ့ တရုတ်နယ်စပ်ဂိတ်တွေကို တင်းကြပ်စွာ ပိတ်ဆို့ထားသလို စစ်ကောင်စီကလည်း ရှမ်းပြည်မြောက်ပိုင်း တခြားဒေသတွေကို လုပ်နေတာလို့ နိုင်ငံရေးအကဲခတ်တွေက သုံးသပ်ပါတယ်။
“စက်သုံးဆီ ထောက်ခံစာမှာ သယ်ယူခွင့်ပြုတဲ့မြို့မှအပ ကျန်နေရာခွင့်မပြုလို့ပါတယ်။ (ထောက်ခံစာကို) ထွေအုပ်နဲ့စစ်တပ်ဆီက ယူရတာ”လို့ မိုင်းကိုင်ဒေသခံတစ်ဦးက ပြောပါတယ်။
အရင်က အခကြေးငွေနဲ့ရော စစ်ဘေးရှောင်ကူညီတာအနေနဲ့ရော ပြေးဆွဲနေကြတဲ့ကားတွေ အခုဆို မိုင်းကိုင်- မိုင်းရယ်လမ်းမှာ အသွားအလာမရှိသလောက်ဖြစ်လာနေတယ်လို့ ဆိုပါတယ်။
အခုလို ပိတ်ဆို့တာတွေအပြင် အင်တောနဲ့ ရပ်စောက်ဘက်မှာတော့ စစ်ဆေးရေး/လုံခြုံရေးဂိတ်တာဝန်ကျ တပ်နဲ့ရဲတွေကပဲ ငွေကြေးအဆမတန်တောင်းတာတွေရှိတယ်လို့ ခရီးသွားတွေဆီက စုံစမ်းသိရပါတယ်။
“ပြောမနေနဲ့ဆရာရေ ၁၂လက်မ ၁ပေ၊ ၃ပေ ၁ဂိတ် လို့ ပြောရအောင် ဂိတ်တွေများပြီး မပေးရင် ပြန်လှည့်ခိုင်းတာ၊ လုံးဝ အဆင်မပြေရင် လူကုန်ကူးပုဒ်မတပ်ပြီး ဖမ်းထောင်ချတာတွေ လုပ်လာနေတာ၊ အရမ်းကို ဆိုးနေပြီ”လို့ ရှမ်းပြည်မြောက်ပိုင်းသွား ယာဥ်မောင်းတစ်ဦးကမဲခေါင်ကို ပြောပါတယ်။
ရှမ်းပြည်မြောက်ပိုင်းဘက်သွားတဲ့ ယာဉ်လိုင်းက ယာဥ်မောင်းတစ်ဦး ဆမ္မဆယ်ကွင်းလမ်းဂိတ်မှာ ညှိနှိုင်းအဆင်မပြေလို့ လူကုန်ကူးပုဒ်မနဲ့ ထောင်၆လ၊ ကားပေါ်က လူတွေကထောင်၃လ စီရင်ချက်ချခံရတာရှိတယ်လို့ ပြောပါတယ်။
ပြင်ဦးလွင်အတက် ၁၆မိုင်ကအစ နတ်စင်ဂိတ်၊ အနီးစခန်းရဲကင်း၊ ၂၃မိုင် ဇီးပင်ကြီးကနေ ၁၃/သမားတွေကို အကြောင်းအမျိုးမျိုးပြ ကြန့်ကြာအောင်လုပ်ပြီး ငွေတောင်းကာ ဝက်ဝံရှောင်ကွင်းလမ်း ဆမ္မဆယ်မှာ ကားစီးရေ၅၀ခန့်ကို တားစစ်ကာ လွှတ်မပေးဘဲ ည၁၂နာရီခန့်မှာ လွှတ်ပေးတာမျိုးတွေ ပြုလုပ်တယ်လို့ ယာဉ်မောင်းတွေထံက သိရပါတယ်။
“မေမြို့လမ်းက ၁၃/ဆိုရစ်တယ်။ ရပ်စောက်ဘက်ကျတော့ ၁၃/မဟုတ်ရင် လုံးဝရစ်တယ်။ ပါးစပ်ထဲရှိတဲ့အတိုင်းတောင်းတာ။ အသက် ၁၈ ကနေ ၃၅ နှစ်ကြားဆို ပိုဆိုး ပိုတောင်းတာ၊ မပေးရင် ဆွဲချထားလိုက်တာ၊ ကျနော်ကတော့ ၁၃/မဟုတ်ရင် မတင်တော့ဘူး။ စောင့်လဲမစောင့်နိုင်သလို တာဝန်လဲ မယူနိုင်ဘူး”လို့ မန္တလေး-မူဆယ် ကားသမား၁ဦးက ပြောပါတယ်။
စစ်ကောင်စီဂိတ်တွေကို ကျော်သွားပြီးနောက် PDF ဂိတ်တွေမှာတော့ လူစာရင်းတိုက်စစ်တာကလွဲလို့ ငွေတောင်းတာမရှိသလို ကိုးကန့်တပ်တွေလဲ ဘာမှ မမေးဘူးလို့ သိရပါတယ်။
TNLAဂိတ်တွေမှာတော့ ၁နှစ်စာ ကျပ်၁သိန်းခွဲဆောင်ထားတဲ့ ဖြတ်ပိုင်းပြနိုင်ရင် သွားလာခွင့်ပြုပြီး မပြနိုင်ရင်တော့ အခွန်ဆောင်ရတယ်လို့ သိရပါတယ်။
“မပြနိုင်ရင်တော့ ဆောင်ရတယ်၊ အဲ့ပြေစာကို မပျောက်ပျက်အောင် သေချာသိမ်းရတာ၊ ထပ်ဆောင်ရရင် ငွေကုန်မှာလေ”လို့ ပြောပါတယ်။
နမ့်လန် ၉မိုင်ခွဲက မန်းမွန်းနားမှာ စစ်တပ်က ည၁၂နာရီလောက်မှ လွှတ်ပေးလို့ ပစ်ခတ်မှုတွေကြား ကားမှန်တွေကွဲပြီး ဒဏ်ရာရတာတွေ ရှိတယ်လို့ သူက ပြောပါတယ်။
လက်ရှိမှာ မန္တလေး-လားရှိုးကားခ လူတစ်ဦး ၃သိန်းရှိနေပြီး အပြန်လူမရရင် ဂိတ်တွေပေးရလို့ တွက်ချေမကိုက်တော့သလို လားရှိုးမှာလည်း ဗုံးတွေရက်ဆက်ကြဲနေလို့ မြို့တွင်းမနားရဲဘဲ ရသမျှ လူနဲ့ ပြန်ထွက်နေကြကြောင်း ယာဉ်မောင်းတွေက ပြောပါတယ်။
ကျောက်မဲ၊ လားရှိူးမြို့တွေမှာ ဆက်သွယ်ရေးလိုင်းတွေ မရသလို စက်သုံးဆီကအစကုန်စျေးနှုန်းတွေ ကြီးမြင့်နေတာအပြင် စစ်ကောင်စီက လေကြောင်းက တိုက်ခိုက်တာကို ဒေသခံပြည်သူတွေ ခံစားနေရတယ်လို့ သိရပါတယ်။
MK – 012
