မဲခေါင် ဇူလိုင် ၁၉
TNLA ရဲ့ တစ်ဖက်သတ်အပစ်ရပ်ထားတဲ့ ၄ ရက်တာအတွင်း စစ်ကောင်စီက လေကြောင်းနဲ့ လက်နက်ကြီးပစ်ခတ်တာကြောင့် ပြည်သူ ၁၈ ဦးသေဆုံးပြီး ၁၉ ဦး ဒဏ်ရာရခဲ့တယ်လို့ တအာင်းအမျိုးသား လွတ်မြောက်ရေးတပ်မတော် (TNLA) က ဒီနေ့ညမှာ ထုတ်ပြန်လာပါတယ်။
အပစ်ရပ် ၄ ရက်မြောက်နေ့ဖြစ်တဲ့ ဇူလိုင် ၁၈ ရက်နေ့ မှာပဲ မိုးကုတ်အရှေ့ပိုင်း ကုန်းမြင့်သာယာ၊ မင်းတံတားရပ်၊ ဖောင်တော်ဦးဘုရား၊ ဟက်ဖလားရပ်နှင့် မြိုမရပ်ကွက်တို့မှာ စစ်ကောင်စီရဲ့ လက်နက်ကြီး ကျရောက်ပေါက်ကွဲတာကြောင့် မယ်သီလရှင် ၃ ပါး အပါအဝင် အရပ်သား ၉ ဦးသေဆုံးပြီး ၁၀ ဦးထိခိုက်ဒဏ်ရာရရှိခဲ့တယ်လို့ သိရပါတယ်။
အလားတူ ဇူလိုင် ၁၇ ရက်နေ့မှာလည်း ကျောက်မဲမြို့ ခိုမုန်းသစ်စက်ဝန်းမှာ စစ်ကောင်စီရဲ့ လက်နက်ကြီးပစ်ခတ်တိုက်ခိုက်မှုကြောင့် အရပ်သား ၃ ဦးပွဲချင်းပြီးသေဆုံးခဲ့တဲ့အပြင် လားရှိုးမြို့ ရပ်ကွက် (၁) မှာ လက်နက်ကြီးကျရောက်ပေါက်ကွဲတာကြောင့်လည်း ဒေသခံ ၃ ဦးသေဆုံးသွားခဲ့ပြီး မိုးကုတ် ညောင်လေးပင်မှာလည်း လက်နက်ကြီးကျပေါက်ကွဲတာကြောင့် အမျိုးသားတစ်ဦးထိမှန်ဒဏ်ရာရရှိခဲ့တယ်လို့ ဆိုပါတယ်။
ဇူလိုင် ၁၆ ရက်နေ့မှာလည်း စစ်ကောင်စီရဲ့ အတွဲလိုက်ဒုံးပစ်ခတ်မှုကြောင့် မိုးကုတ်အနောက်ပိုင်း ကျပ်ပြင်အုပ်စု ပန်းမချယ်ရီရပ်ကွက်မှာ လက်နက်ကြီးကျရောက်ပေါက်ကွဲမှုဖြစ်ပွားခဲ့တဲ့အတွက် ရပ်ကွက်အတွင်းရှိ အရပ်သား ၂ ဦးသေဆုံးပြီး ၅ ဦးထိခိုက်ဒဏ်ရာရရှိခဲ့တာ ဖြစ်ပါတယ်။
ဒါ့အပြင် ဇူလိုင် ၁၅ ရက်နေ့မှာလည်း ကျောက်မဲမြို့မှာ စစ်ကောင်စီဘက်က လက်နက်ကြီးဆက်တိုက် ပစ်ခတ်တာကြောင့် အရပ်သား ၁ ဦး သေဆုံးသွားပြီး ၃ ဦးထိခိုက်ဒဏ်ရာရရှိခဲ့ပါသေးတယ်။
တော်လှန်ရေးတပ်တွေရဲ့ အပစ်ရပ်ထားတဲ့ ၄ ရက်အတွင်း မိုးကုတ်နဲ့ ကျောက်မဲမြို့မှာ စစ်ကောင်စီဘက်က လေကြောင်းနဲ့ လက်နက်ကြီးကျရောက်ပေါက်ကွဲတာတွေကြောင့် အရပ်သား ကား ၃ စီး မီးလောင်ခဲ့ပြီး နေအိမ် ၁၅ လုံးထက်မနည်းထိခိုက်ပျက်စီးခဲ့တယ်လို့ ဆိုပါတယ်။
ဇူလိုင်၁၇ ရက်နေ့ ည ၁၀ နာရီဝန်းကျင်အချိန်ကစပြီး စစ်ကောင်စီတပ်က လေကြောင်းနဲ့ ကျောက်မဲမြို့အရှေ့ဖက် နတ်ရေကန်၊ နမ့်တုံအပေါ်ရွာနဲ့ နတ်တောင်ဖက်ခြမ်း၊ ဇောတိကုန်းရွာ၊ နမ့်ဟူးတောင်အထက်၊ ပန်ပေါင်းရပ်နှင့် အေရှားဝေါတိုးဂိတ်တို့မှာ စုစုပေါင်း အကြိမ် ၄၀ ထက်မနည်းပစ်ခတ်ခဲ့တာပါ။
ရှမ်း-မန်း စစ်ဆင်ရေးရဲ့ ၂၄ ရက်ကြာ တိုက်ပွဲကာလအတွင်း စစ်ကောင်စီက အရပ်သားတွေ တည်ရှိရာကိုဦးတည်ပြီး လေကြောင်းနဲ့ လက်နက်ကြီးပစ်ခတ်တိုက်ခိုက်တာတွေကြောင့် အရပ်သားစုစုပေါင်း ၉၄ ဦး သေဆုံးပြီး ၁၃၁ ဦး ထိခိုက်ဒဏ်ရာရရှိခဲ့တယ်လို့ ထုတ်ပြန်ချက်အရ သိရပါတယ်။
MK-015
