မဲခေါင်၊ ဒီဇင်ဘာ ၂၈
ယူကရိန်းစစ်ပွဲစကတည်းက ရုရှားစစ်တပ်ကို အဓိက အထောက်အပံ့ပေးနေတဲ့ Fores ကုမ္ပကီ CEO သူဌေးကြီး ဆာဂေးရှမော့တ်ယက်ဗ်က ရုရှားစစ်သားတွေအနေနဲ့ ယူကရိန်း အသုံးပြုလာပြီးဖြစ်တဲ့ အမေရိကန်ထုတ် F-16 ဖိုက်တာဂျက်လေယာဉ်တစ်စင်း စတင်ပစ်ချဖျက်ဆီးနိုင်သူကို ရုရှားရူဘယ်ငွေ ၁၅ သန်း (ဒေါ်လာ ၁၄၅၀၀၀) ဆုကြေး ပေးသွားမယ်လို့ ကတိပေးထားကြောင်း ရုရှားအစိုးရပိုင် TASS သတင်းက အတိအလင်း ဖော်ပြသွားပါတယ်။
ရုရှားရဲ့ ကျူးကျော်စစ်စတင်ချိန်ကတည်းက ယူကရိန်းဟာ စစ်ရေးမှာ ဝေဟင်တိုက်ခိုက်မှု မယှဉ်နိုင်တဲ့ အနေအထားကြောင့် အမေရိကန်နဲ့ အနောက်မဟာမိတ်အင်အားစုတွေဆီက F-16 ဖိုက်တာဂျက်လေယာဉ်တွေ ထောက်ပံ့ပေးဖို့ တောင်းဆိုခဲ့ပေမယ့် စစ်ရေးပိုကျယ်ပြန့်လာမှာစိုးရိမ်ကြပြီး ယူကရိန်းကို အကူအညီမပေးခဲ့ကြပါဘူး။
ဒါပေမဲ့ ၂၀၂၃ ခုနှစ်မှာတော့ ရုရှားကို စစ်အောင်နိုင်ခြင်းဆီ မရောက်စေဖို့က အရေးကြီးကြောင်း ပြန်လည် စဉ်းစားသုံးသပ်ကြပြီးနောက် ယူကေဝန်ကြီးချုပ် ရီရှီဆူနက်၊ အမေရိကန်သမ္မတ ဂျိုးဘိုင်ဒန်အပါ အနောက် မဟာမိတ်နိုင်ငံတွေရဲ့ ခေါင်းဆောင်တွေဟာ အဆင့်ထပ်မံမြှင့်တင်ထားတဲ့ အမေရိကန်ထုတ် F-16 တိုက်လေ ယာဉ်တွေ ယူကရိန်းဆီ ပေးဖို့ သဘောတူခဲ့ပြီး လက်ရှိမှာ ယူကရိန်းဆီ F-16 လေယာဉ်တွေ ရောက်ရှိလို့ တိုက်ပွဲ စတင် ဆင်နွှဲနေခဲ့ပြီဖြစ်ပါတယ်။
ဒါကြောင့် ရုရှား သိမ်းပိုက်ထားတဲ့ ယူကရိန်း နယ်မြေသစ်များ ပေါင်းစည်းရေး ညှိနှိုင်းမှုကောင်စီ ပူးတွဲ ဥက္ကဌ တာဝန်ပါယူထားတဲ့ ရှမေ့ာတ်ယက်ဗ်ဟာ F-16 တိုက်လေယာဉ်တစ်စီး စတင်ပစ်ချနိုင်ရင် နိုင်ငံအတွက် သူရဲကောင်းတွေအဖြစ် အသက်စွန့် ပေးဆပ်တဲ့သူတွေအဖြစ် မော်ကွန်းတင်ရမှာဖြစ်တာကြောင့် ဒေါ်လာ ၁၄၅၀၀၀ ဆုကြေး ပေးသွားမှာဖြစ်ကြောင်း ဒီဇင်ဘာ ၂၇ ရက်နေ့မှာ အတည်ပြုထုတ်ပြန်သွားခဲ့ပါတယ်။
အရင်ကတည်းက ရှိမော့တ်ယက်ဗ်ဟာ ယူကရိန်းတင့်ကားတစ်စီး ဖျက်ဆီးနိုင်သူကို ဒေါ်လာ ၅၈၀၀၀ ပေးမယ်လို့ ကတိပေးထားသူ ဖြစ်ပြီး ယူကရိန်းစစ်ပွဲကာလအတွင်း ရုရှားတပ်သားတွေအတွက် ရူဘယ်သန်း ၂၃၀ ထောက်ပံ့ထားပြီးဖြစ်ကြောင်းလည်း ထုတ်ပြန်ထားပါတယ်။
ဒါပေမဲ့ F-16 လေယာဉ် စတင်ပစ်ချနိုင်ရင် ဆုကြေး ဒေါ်လာ ၁၄၅၀၀၀ ပေးမယ်ဆိုတဲ့ ကတိကို ဇာပေါ်ရစ်ဇီ ဒေသမှာ ရုရှားလေကြောင်းရန် ကာကွယ်ရေးစနစ်ကနေ ယူကရိန်းရဲ့ F-16 တိုက်လေယာဉ် တစ်စီးကို ပစ်ချနိုင်ခဲ့တယ်လို့ ရုရှားမီဒီယာတွေက အတည်မပြုနိုင်တဲ့ သတင်းကနေ ဖော်ပြခဲ့ပြီး နောက်တစ်ရက်မှ ကြေညာတာဖြစ်လို့ ဒီသတင်းမှန်ခဲ့ရင်ဆုကြေး ပေးခဲ့ခြင်းရှိမရှိကိုတော့ မသိရှိရပါဘူး။
တစ်ဆက်တည်းမှာပဲ ယူကရိန်းရဲ့ F-16 လေယာဉ်တွေဟာ စစ်ရေးအခြေအနေကို မဟာဗျူဟာကျကျ ပြောင်းလဲစေပြီး ရုရှား စစ်ရေး နိမ့်ပါးသွားဖို့ ရှိနေတဲ့အတွက် ရုရှားဟာ ယူကရိန်းမှာ ဒီလေယာဉ်တွေ ထားမယ့်နေရာ၊ လေယာဉ်တွေရဲ့ အစွမ်းထက်မှုတွေကို သိရှိနိုင်ဖို့ သူလျှိုတွေ စေလွှတ် စုံစမ်းခိုင်းထားကြောင်းလည်း သိရှိရပါတယ်။
ယူကရိန်းစစ်ထောက်လှမ်းရေး SBU ဟာ ဒီရက်ပိုင်းထဲ F-16 လေယာဉ်တွေနဲ့ပတ်သက်လို့ ရုရှားဘက်က သူလျှို့အဖြစ် စေလွှတ် လိုက်တဲ့ စစ်ပြေး ၁၂ ယောက်ကို ဖမ်းဆီးရမိခဲ့ပြီး ဒီလိုသူလျှိုတွေအဖြစ် ဆုကြေးအရ ရုရှားအတွက် စုံစမ်းပေးမယ့် အတွင်းရန်သူတွေဟာ ပိုပြီး ကြောက်စရာ၊ စိုးရိမ်စရာကောင်းနေတယ်လို့ ထုတ်ပြန်ခဲ့ပါတယ်။
Ref: bulgarianmilitary
MKF-001
#MeKongNews
#ရုရှားသူဌေး
#ယူကရိန်း
#တိုက်လေယာဥ်
#ပစ်ချ
#ဆုကြေး
