အွန်လိုင်း အသုံးမပြုရေး လုပ်ဆောင်နေတဲ့စစ်ကောင်စီက နယ်စပ်မှာ အွန်လိုင်းရောင်းဝယ်ရေးစနစ်တစ်ခု ဖေါ်ဆောင်နေ
မဲခေါင်၊ ဒီဇင်ဘာ ၁၃
နိုင်ငံသားတွေ အွန်လိုင်းအသုံးမပြုနိုင်အောင် လုပ်ဆောင်နေတဲ့ စစ်ကောင်စီက ဖရဲ၊ သခွားအပါအဝင် ကုန်စိမ်းတွေကို မိုင်းလား-တာလော့ နယ်စပ်ရောင်းဝယ်ရေးမှာ အွန်လိုင်း မှတ်ပုံတင်စနစ်နဲ့ ရောင်းဝယ်ဖို့ စီစဉ်နေတာကြောင့် သစ်သီးဝလံကုန်သည်တွေ အခက်အခဲဖြစ်နေတယ်လို့ သိရပါတယ်။
ကြိုက်ရောင်း ကြိုက်ဝယ် စနစ်ကနေ အွန်လိုင်းမှတ်ပုံတင်စနစ်ကို ၂၀၂၅ ခုနှစ်၊ ဇန်နဝါရီလ ၁ရက်မှာ ပြောင်းလဲရောင်းချဖို့ စစ်ကောင်စီရဲ့ ကုန်သွယ်ရေးဦးစီးဌာနက ကုမ္ပဏီတွေကို ပြီးခဲ့တဲ့ နိုဝင်ဘာ၂၇ ရက်က ညွှန်ကြားခဲ့တာလို့ သိရပါတယ်။
“ အွန်လိုင်းဆိုတာ လိုင်းကောင်းမှ အဆင်ပြေတာ၊ ခုကလိုင်းတွေကလည်းမကောင်း၊ VPN ကိုပါ တရားမဝင်ဘူး ဖမ်းမယ်၊ ဆီးမယ်ဆိုပြီး ပိတ်တာ ကန့်သတ်တာတွေ လုပ်ထားတာလေ၊ အဲဒါကို အွန်လိုင်းမှဆိုတော့ ဘယ်လိုလုပ် လွယ်ကူအဆင်ပြေနိုင်ပါ့မလဲ၊ အရင်ဆုံးလုပ်ရမှာက အင်တာနက်လိုင်းကောင်းပြီး အတားအဆီးတွေနည်းအောင် လုပ်ပေးရမှာ” လို့ မိုင်းလား ကုန်ပို့သီးနှံကုမ္ပဏီတစ်ခုက ပြောပါတယ်။
အွန်လိုင်း ရောင်းဝယ်ရေးကို စျေးနှိမ်မခံရစေဖို့၊ ငွေလိမ်လည်မခံရစေဖို့နဲ့ အခွန်ရဖို့ရည်ရွယ်ချက်တွေနဲ့ လုပ်တာလို့သိရပေမယ့် သီးနှံတွေအချိန်မီ လတ်လတ်ဆတ်ဆတ်ရောက်ရှိဖို့ အဆင်မပြေနိုင်ဘူးလို့ ဆိုပါတယ်။
“ အွန်လိုင်းဆိုတာက စျေးမှန်ရပြီး စျေးနှိမ်မခံရပေမယ့် ကိုယ့်ဘက်ကလည်း အရည်အသွေး မှန်၊ ပစ္စည်းကောင်း အာမခံရမှာဆိုတော့ ခုလိုလမ်းခရီးကြာတာ၊ ရာသီဥတုကြောင့် အသီးအနှံအရည်အသွေးလျော့ကျတာတွေဆို မလွယ်ဘူး၊ မျက်မြင် ကြိုက်ရောင်းကြိုက်ဝယ်မဟုတ်တော့ဘူးပေါ့” လို့ မူဆယ်သီးသီးဝလံကုန်သည် တစ်ဦးက ပြောပါတယ်။
ကုန်သွယ်ရေးမှာ နိုင်ငံချင်းချိတ်ဆက်ရောင်းဝယ်မှုက နှစ်ဘက်ဘဏ်အကောင့်၊ အမှာစာ၊ အရည်အသွေး စိစစ်အတည်ပြုမှု၊ စံချိန်စံညွှန်းနဲ့သတ်မှတ်ကာလတွေအတွင်း ရောင်းဝယ်ကြရတာဖြစ်ပြီး နယ်စပ်ကုန်သွယ်ရေးကတော့ နှစ်နိုင်ငံခွင့်ပြုကုန်ကို ကြိုက်ရောင်း၊ ကြိုက်ဝယ် ပြုကြတာလို့ သိရပါတယ်။
အွန်လိုင်းမှတ်ပုံတင်ဖို့ ကုမ္ပဏီစာရွက်စာတမ်းအပြည့်အစုံ၊ မှတ်ပုံတင်ကအစ ထောက်ခံချက်မျိုးစုံနဲ့ နေထိုင်ရာမြို့ကစစ်ကောင်စီရဲ့ ကုန်သွယ်ရေးဌာနမှာတင်ရတာ ဖြစ်တယ်လို့ သိရပါတယ်။
ကုန်သွယ်ရေးဦးစီးဌာနမှာ အွန်လိုင်းရောင်းချခွင့် မှတ်ပုံတင်တဲ့ ကုမ္ပဏီတွေကိုလာမယ့် ဒီဇင်ဘာ ၂၁ရက် မှာ စတင်စစ်ဆေးပြီး ခွင့်ပြုမိန့်ရတဲ့ကုမ္ပဏီတွေကလာမယ့် ၂၀၂၅ ခုနှစ်၊ ဇန်နဝါရီ၁ရက်ကစပြီး ရောင်းချခွင့်ရမှာ ဖြစ်တယ်လို့ သိရပါတယ်။
“အခု လွယ်ဂျယ်ဖွင့်ပြီ မရှုတ်တဲ့ လွယ်ဂျယ်ဘက်ပဲ သွားရောင်းတော့မယ်၊ ဒီမှာက စာရွက်စာတမ်းကအစ ငွေပေးရတာအဆုံး အရမ်းရှုပ်တယ်” လို့ကျိုင်းတုံ-မိုင်းလား ပို့ သစ်သီးကုန်သည်တစ်ဦးက ပြောပါတယ်။
KIA သိမ်းထားတဲ့ လွယ်ဂျယ်နယ်စပ်ဂိတ်ကို မနေ့ကတရုတ်ဘက်က ဖွင့်ခဲ့ပေမယ့် KIAဘက်ကတော့ ဒီနေ့မနက်မှ ဖွင့်ခဲ့တာ ဖြစ်ပါတယ်။
တရုတ်ဘက်က ရှမ်းမြောက်က နယ်စပ်ဂိတ်တွေကို ကန့်သတ်ချက်တွေနဲ့ မူဆယ်နဲ့ မိုင်းလားမှာဖွင့်ပေမယ့် အခြားနယ်စပ်ဂိတ်တွေကိုတော့ ပိတ်ထားဆဲဖြစ်ကြောင်း သိရပါတယ်။
MK-012
#MekongNews
