ဖယ်ခုံကို စစ်ဘေးရှောင်တွေ မပြန်ကြဖို့ တော်လှန်ရေးအင်အားစုတွေ သတိပေး
မဲခေါင်၊ နိုဝင်ဘာ ၂၁
ရှမ်းပြည်တောင်ပိုင်း၊ ကရင်နီပြည်အစပ်ဖြစ်တဲ့ ဖယ်ခုံမြို့နယ်ကို စစ်ဘေးရှောင်တွေ လတ်တလော မပြန်ကြဖို့ တော်လှန်ရေး အင်အားစုတွေက ဒီနေ့ (နိုဝင်ဘာ ၂၁)မှာ သတိပေးလိုက်ပါတယ်။
ဖယ်ခုံမြို့တွင်းမှာ တိုက်ပွဲတွေ မရှိတော့ပေမယ့် ၄၅ မိနစ်သာ ကွာဝေးတဲ့ မိုးဗြဲမြို့မှာ တိုက်ပွဲ ဖြစ်ပွားနေဆဲ ဖြစ်ပြီး မြေမြုပ်မိုင်း မရှင်းလင်းရသေးတဲ့အပြင် လက်နက်ကြီးနဲ့ လေကြောင်း အန္တရာယ်လည်း ကျန်ရှိနေသေးတာကြောင့်လို့ သတင်းအရင်းအမြစ်က ပြောပါတယ်။
“ကျနော်တို့ကတော့ သတိပေးစာတွေ တင်မယ်၊ မှာစရာရှိတာ လိုက်မှာမယ်၊ လိုင်းပေါ်တင်နေတာတွေ မယုံသင့်တာတွေမယုံဖို့ ပြောပေးမယ်၊ ဒီလောက်ပဲလုပ်ပေးလို့ရမယ်ပေါ့နော်၊ အဲဒါကိုမှ သူတို့ဖက်ကမရတော့ဘူး ခက်ခဲလာလို့ ပြန်ချင်တယ် ဆိုရင်လည်း မတတ်နိုင်ဘူးပေါ့နော်” လို့ မြေပြင်သတင်းအရင်းအမြစ်က ပြောပါတယ်။
ဖယ်ခုံမြို့က စစ်ကောင်စီ၊ ပအိုဝ်းပြည်သူ့စစ် (PNA) ပူးပေါင်းအဖွဲ့ရဲ့ အင်အား ၅၀၀ စစ်ကြောင်းဟာ တောလမ်းတွေကတဆင့် မိုးဗြဲမြို့ကို ရောက်ရှိပြီဖြစ်ပေမယ့် ဖယ်ခုံမြို့ကဆင့် စစ်ကူအင်အား နောက်ထပ် ပို့နိုင်ချေရှိပြီး လူသားဒိုင်းလည်း လုပ်နိုင်တယ်လို့လည်း မြေပြင်အရင်းအမြစ်က သုံးသပ်ပါတယ်။
“အရင်ကလည်း ပြန်ရင် သူတို့ ဖမ်းခေါ်တာပဲ၊ သူတို့ ခေါ်တယ်ဆိုတာက သူတို့ ထိန်းချုပ်နိုင်ကြောင်း ပြချင်တာပေါ့၊ တကယ်တမ်း ပြန်ရင်လည်း သူတို့ (စစ်ကောင်စီ)ဖက်က ဟုတ်တိပတိ လုံခြုံရေးမပေးနိုင်ပါဘူး၊ လွိုင်ကော်၊ နောင်ယားက တစ်ယောက်လည်း သူတို့ ပြန်ခေါ်တာ ပြန်တော့မိုင်းထိပြီး သေတယ်လေ”
စစ်ကောင်စီ ထောက်ခံသူ အုပ်စုက လူမှုကွန်ယက်စာမျက်နှာ (Facebook)ပေါ်ရှိ ကရင်နီပြည် အမည်ခံ ပေချ့်များ၊ ဂရုများမှာ ဖယ်ခုံမြို့ကို အမြန်ဆုံး ပြန်ကြဖို့အတွက် နေ့စဉ်တိုက်တွန်း ရေးသားနေပြီး ရောက်ရှိနေတဲ့ မြို့တွေမှာ ဖိအားပေးမှုတွေလည်း ရှိတယ်လို့ ဆိုပါတယ်။
နေရပ်ပြန်မယ့် စစ်ဘေးရှောင်တွေအတွက် သက်ဆိုင်ရာ အုပ်ချုပ်ရေးမှူးတွေဆီမှာ အမှန်တကယ် နေထိုင်ကြောင်း ထောက်ခံစာတောင်းခံပြီး အလွယ်တကူ ပြန်လို့ရမယ့်အပြင် လုံခြုံရေးအတွက်ကိုလည်း စစ်ကောင်စီရဲ့ စကခ-၇ ကဆောင်ရွက်ပေးသွားမယ်လို့ ဝါဒဖြန့်ထားတာပါ။
“ပင်လောင်းကတော့ ပြန်ခိုင်းပြီ၊ ညောင်ရွှေလည်း အရင်လတွေက ပြန်ခိုင်းတယ်၊ တဖက်ကလည်း ပြန်ခိုင်းတယ်၊ တဖက်ကလည်း ဒီမှာတော့ တိုက်ပွဲရှိသေးတယ် မပြန်ရသေးဘူး အဲလိုပေါ့နော်၊ ပြေလည်တဲ့သူလောက်ပဲ အဆင်ပြေတာပါ” လို့ ညောင်ရွှေမြို့ရောက် စစ်ဘေးရှောင်တစ်ဦးက ပြောပါတယ်။
ဖယ်ခုံမြို့နယ်တွင်းမှာ အိမ်စောင့်ကျန်ရစ်သူ အမျိုးသားများနဲ့ သူခိုးအုပ်စုများ၊ တော်လှန်ရေး အင်အားစုများ အပါအဝင် လူဦးရေ ၁၀ ရာခိုင်နှုန်းခန့်သာကျန်ရှိပြီး နိုဝင်ဘာလ ၁၀ ရက်ဝန်းကျင်ကတည်းက ဒေသခံတွေ တိမ်းရှောင်နေကြပါတယ်။
နိုဝင်ဘာလ ၁၁ ရက်ကလည်း ဖယ်ခုံမြို့နယ်၊ ရွှေပြည်အေးရွာမှာ အရပ်သား ၂၀၀ ကျော်ကို ဖမ်းဆီးကာ ပင်လောင်းမြို့နယ် အားကစားရုံမှာ ချုပ်နှောင်ထားပြီး အမျိုးသမီးတွေကို ပြန်ခွင့်ပြုပေမယ့် အမျိုးသားအားလုံးကို PNA က စစ်မှုထမ်းခေါ်ယူထားတယ်လို့ နီးစပ်သူတွေဆီကသိရပါတယ်။
စစ်ကောင်စီတပ်က ပင်လောင်း – ဖယ်ခုံ – မိုးဗြဲ လမ်းအတိုင်း စစ်အင်အား ဖြည့်တင်းနေသလို သူတို့ ရာနှုန်းပြည့် ထိန်းချုပ်ထားနိုင်တဲ့ ဆီဆိုင် – လွိုင်ကော်လမ်းကနေလည်း ကွေ့ပတ်ပြီး စစ်ကူပို့နေတဲ့အပြင် လွိုင်ကော် – ဘော်လခဲ – ဖားဆောင်းလမ်း အတိုင်းလည်း စစ်ကြောင်းထိုးဖို့ ပြင်ဆင်နေတယ်လို့ မြေပြင်အရင်းအမြစ်တွေက ပြောပါတယ်။
MK-14
#MeKongNews
