မဲခေါင်၊ ဇန်နဝါရီ ၃၀
အရပ်သားအစိုးရခေတ်က စက်သုံးဆီအရောင်းဆိုင်များ ဖွင့်လှစ်ရန် နှစ် ၆၀ ဂရံ အဌားမြေကွက်များ ခွင့်ပြုပေးခဲ့တဲ့ ဆီဆိုင်မြေကွက်တွေကို စစ်ကောင်စီက ပယ်ဖျက်ပြီး ပြန်လည်သိမ်းယူလိုက်တယ်လို့ ယမန်နေ့က ကြေညာချက်တစ်စောင် ထုတ်ပြန်ခဲ့ပါတယ်။
စက်သုံးဆီအရောင်းဆိုင်တွေ ဖွင့်လှစ်ရောင်းချဖို့အတွက် ဒဂုံမြို့သစ်အရှေ့ပိုင်း၊ ဒဂုံမြို့သစ်တောင်ပိုင်းနဲ့ ဒလမြို့နယ်တွေမှာရှိတဲ့ နှစ် ၆၀ မြေဌားစာချုပ်ဂရံရှိထားတဲ့ မြေနေရာတွေကို လုပ်ထုံးလုပ်နည်းဥပဒေနဲ့အညီ ပယ်ဖျက်ပြီးဖြစ်တယ်လို့ စစ်ကောင်စီလက်အောက်ခံ မြို့ပြမြေစီမံခန့်ခွဲမှုဌာနက ထုတ်ပြန်ခဲ့တာပါ။
Golden Star ကုမ္ပဏီ၊ Yangon Petrol ကုမ္ပဏီတွေကို ဆီဆိုင်ဖွင့်ဖို့ ချထားပေးတဲ့ မြေကွက်တွေ ဖြစ်ပါတယ်။
နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို လာဘ်စားတယ်လို့ သက်သေထွက်ဆိုခဲ့တဲ့ ရန်ကုန်တိုင်းဝန်ကြီးချုပ်ဟောင်း ဖြိုးမင်းသိန်းက ဒီမြေကွက်တွေကို ချထားပေးခဲ့တာ ဖြစ်ပါတယ်။
ဒါတင်မကသေးဘဲ Yangon Petrol ကုမ္ပဏီဆီက စစ်ကောင်စီ ပြန်လည်သိမ်းယူလိုက်တဲ့ မြေကွက်တွေဟာ မရမ်းကုန်းမြို့နယ်အတွင်းက ၃ ဒဿမ ၇ ဧကရှိတဲ့မြေကွက်၊ သင်္ကန်းကျွန်းမြို့နယ်က ၀ ဒဿမ ၆၉၉ ဧကရှိတဲ့မြေကွက်၊ တောင်ဒဂုံမြို့နယ်က ၆၈ ဧကကျော်ရှိတဲ့ မြေကွက် ၃ ကွက်နဲ့၊ ဒလမြို့နယ်ရှိ မြေတစ်ဧကခွဲတို့ ဖြစ်ပါတယ်။
Yangon Petrol ကုမ္ပဏီက အရပ်သားအစိုးရလက်ထက်မှာ နိုင်ငံပိုင်မြေ ၂၆ ကွက်ကို တစ်ပေပတ်လည် ကျပ် ၂၀၀၀ နှုန်းနဲ့ အမည်ပေါက်ဝယ်ယူခွင့်ရပြီး ဂရံအမည်ပေါက် ရရှိခဲ့တယ်လို့လည်း လူထုနွေဦးသတင်း စာမျက်နှာမှာ ဖော်ပြထားပါတယ်။
MK-006
#MeKongNews #အရပ်သားအစိုးရ #YP