မဲခေါင်၊ ဇန်နဝါရီ ၁၂
CNF ဌာနချုပ် လေကြောင်းကနေ ဗုံးကြဲတိုက်ခိုက်ခံရပြီး သေဆုံးမှုတွေ ရှိခဲ့တဲ့အပေါ် ဝမ်းနည်းမှု ပြသတဲ့ အနေနဲ့ မနေ့ ဇန်နဝါရီ ၁၁ ရက်နေ့က ဟားခါးမြို့မှာ ဆိုင်အများအပြား ပိတ်ထားခဲ့ရာ အဲဒီဆိုင်တွေကို ဒီကနေ့ စစ်ကောင်စီက ချိတ်ပိတ်ခဲ့တယ်လို့ ဒေသတွင်း မီဒီယာThe Chin Journal က ဖော်ပြပါတယ်။
ဝမ်းနည်းခြင်း အထိမ်းအမှတ် ဆိုင်ပိတ်သူတွေကို ဖမ်းဆီး ချိတ်ပိတ် မယ်လို့ စစ်ကောင်စီတပ်က မနေ့က ခြိမ်းခြောက်ခဲ့ရာ မွန်းလွဲ ၁ နာရီ နောက်ပိုင်း ဆိုင်ပြန်ဖွင့်သူ တစ်ချို့ ရှိခဲ့သလို မဖွင့်ဘဲ တစ်နေ့လုံး ပိတ်ထားသူတွေလည်း ရှိခဲ့တယ်လို့ သိရပါတယ်။
မနေ့က ၁ နာရီ နောက်ပိုင်း ပိတ်ထားတဲ့ ဆိုင်ခန်းတွေကို စစ်ကောင်စီတပ်သားတွေက ဓါတ်ပုံတွေ လိုက်ရိုက်ခဲ့ ပြီးနောက် ဒီကနေ့မှာ စာတွေကပ်ကာ ချိတ်ပိတ်လိုက်တာ ဖြစ်ပါတယ်။
ချိတ်ပိတ်ခံရတဲ့ ဆိုင်ခန်း ပိုင်ရှင်တွေကိုလည်း စစ်ကောင်စီတပ်ဖွဲ့ဝင်တွေက ရဲစခန်းသို့ ခေါ်ဆောင်သွားရာ အခုအချိန် အထိ ပြန်လည် လွတ်မြောက်လာတာ ရှိမရှိ မသိရသေးဘူးလို့ The Chin Journal က ဖော်ပြပါတယ်။
CNF ဌာနချုပ် တိုက်ခိုက်ခံရမှု ဝမ်းနည်းကြောင်း ပြသလို့ ဆိုင်ခန်းတွေ ချိတ်ပိတ်တာ ဖြစ်ပေမယ့် စစ်ကောင်စီ ကပ်ထားတဲ့ ဗီနိုင်း မှာတော့ “အခုနေအိမ်ဟာ အကြမ်းဖက်မှု ကျူးလွန်သူ တစ်ဦးကို ပုန်းအောင်းခွင့် ပေးတာနဲ့ ယာယီ နေထိုင်ခွင့် ပေးတာကို ဖော်ထုတ်ရရှိတဲ့ အတွက် အကြမ်းဖက်မှု တိုက်ဖျက်ရေး ဥပဒေပုဒ်မ ၅၂ အရ နေအိမ် အဆောက်အဦ ပိုင်ရှင်ကို အရေးယူမယ့် အပြင် ပုဒ်မ ၅၆ အရ နေအိမ်၊ အဆောက်အဦအား နိုင်ငံတော် ဘဏ္ဍာ အဖြစ် သိမ်းဆည်းမယ်” လို့ ဖော်ပြထားတာ တွေ့ရပါတယ်။
MK-003