မဲခေါင်၊ ဇူလိုင် ၁၇
ဂျာမနီနိုင်ငံရေးလောကတွင် လက်ယာစွန်းရောက် နာဇီလက်သစ် (နီယို-နာဇီ) လှုံ့ဆော်ရေးသမားအဖြစ် နာမည်ကြီးသော မာလာဆဗန်ဂျာလိုင်းဘစ်ချ်ကို ဇူလိုင် ၁၅ ရက်၌ ချက်နိုင်ငံက ဂျာမနီသို့ တရားခံအဖြစ် ပြန်လည်လွှဲပေးပြီးနောက် ၎င်းသည် လိင်အင်္ဂါခွဲစိတ်ပြောင်းလဲကာ အမျိုးသမီးအဖြစ် မှတ်ပုံတင်ခဲ့ပြီး ဖြစ်သည့်အတွက် အမျိုးသမီးထောင်အတွင်း ပြစ်ဒဏ်ကျခံတော့မည် ဖြစ်သည်။
ယခင် အခမ်းအနားပွဲများတွင် နာဇီဝတ်စုံများဝတ်ဆင်ကာ လက်မောင်းတွင် နာဇီခေတ်ဟန် လုံခြုံရေးဆိုသည့် လက်ပတ်ကိုလည်း ဝတ်ဆင်လေ့ရှိသော မာလာဆဗန်ဂျာလိုင်းဘစ်ချ်သည် အသက် ၅၅ နှစ်ရှိပြီဖြစ်ကာ ၂၀၂၃ ခုနှစ်က အသရေဖျက်မှု၊ မုန်းတီးစေရန် လှုံ့ဆော်မှုများကြောင့် အမျိုးသမီးအကျဉ်းထောင်တစ်ခုအတွင်း ထောင်ဒဏ် ၁ နှစ်ခွဲကျခံစေရန် ပြစ်ဒဏ်ချမှတ်ခံခဲ့ရသူ ဖြစ်သည်။
သို့သော် အယူခံဝင်ခဲ့ပြီး ထောင်ဒဏ်ကို ကျခံခြင်းမရှိသေးဘဲ နောက်တစ်နှစ်အကြာတွင် လိင်အင်္ဂါခွဲစိတ်ပြောင်းလဲ မှု အပြည့်အ၀လုပ်ဆောင်အပြီး အမျိုးသမီးအဖြစ် နာမည်ပြောင်းကာ မှတ်ပုံတင်ခဲ့ပြီးနောက် ယမန်နှစ် ဩဂုတ်လမှ စတင်ကာ ပျောက်သွားခဲ့သည်။
သို့သော် ချက်နိုင်ငံတွင် ရောက်ရှိနေခဲ့ကာ ချက်ရဲတပ်ဖွဲ့နှင့် ပူးပေါင်းဆောင်ရွက်ခြင်းများပြုလုပ်ပြီးနောက် ဂျာမနီသို့ ပြန်လည်လွှဲပြောင်းစဉ် နှုတ်ခမ်းမွှေးများဖြင့် ပြန်ရောက်လာပြီး အမျိုးသမီးထောင်အတွင်း ပြစ်ဒဏ်ကို ကျခံသွားတော့မည်ဟု လက်ခံခဲ့သည်။
၂၀၂၂ ခုနှစ်က မာလာဆဗန်ဂျာလိုင်းဘစ်ချ်သည် ဂျာမနီနိုင်ငံ ဟယ်လီရှိ LGBT အသိုင်းအဝိုင်းများ ဂုဏ်ယူချီတက် ပွဲတစ်ခုတွင် ပါဝင်ဆင်နွှဲသူများကို လူမှုအသိုင်းအဝိုင်းမှ ကပ်ပါးကောင်များဟု ဝေဖန်နှောင့်ယှက်ခဲ့သူဖြစ်သည်။
ယခုလို အမျိုးသမီးဘ၀ ပြောင်းလဲခံယူပြီး အမျိုးသမီးအကျဉ်းထောင်တွင် ကျခံရန် ကြိုးစားမှုသည် ဂျာမနီအဓိပတိ အိုလက်ဖ်ရှိုးဇ်နှင့် ၎င်း၏ ဗဟိုဝါဒီညွန့်ပေါင်းအစိုးရလက်ထက်က မိတ်ဆက်ပေးခဲ့သော လူသားတိုင်း မွေးရာပါ လိင်အင်္ဂါအတိုင်း ဘ၀ကို လက်ခံသွားရန်မလိုဘဲ လူတိုင်း ကိုယ်ပိုင်ပြဌာန်းခွင့်နှင့်အညီ ကျား၊ မ ကြိုက်သလို ပြောင်းလဲခံယူနိုင်သလို နာမည်ပြောင်းခွင့်ရှိသည်ဆိုသော ဥပဒေအား ဟားတိုက်လှောင် ပြောင်လိုက်ခြင်းသာ ဖြစ်မည်ဟု ပြောဆိုနေကြသည်။
မနှစ်ကတည်းက ဂျာမန်ထောင်အာဏာပိုင်များသည် လိုင်းဘစ်ချ်ကို အမျိုးသမီးထောင်အတွင်း ကျခံစေရန် ဆုံးဖြတ်ရခြင်းမှာ မွေးရာပါ လိင်သတ်မှတ်ချက်အရ မဟုတ်ဘဲ မှတ်ပုံတင်ထားသည့် လိင်အရဖြစ်သည်ဟု ဖြေရှင်းပြောဆိုခဲ့သည်။
လိုင်းဘစ်ချ်ကမူ အမျိုးသားအကျဉ်းထောင်အတွင်း ပြစ်ဒဏ်ကျခဲ့ရပါက ၎င်းကဲ့သို့ လိင်အင်္ဂါခွဲစိတ်ပြောင်းလဲ ထားသူမျိုးကို ခွဲခြားဆက်ဆံခံရမည်ကို စိုးရိမ်သဖြင့် အမျိုးသမီးထောင်တွင် ကျခံရန် ဆုံးဖြတ်ခဲ့သည်ဟု ပြောဆိုခဲ့သည်။
လိုင်းဘစ်ချ်နှင့်ပတ်သက်ပြီး ဝေဖန်သံများ ဆူညံလာခဲ့ပြီးနောက် လက်ရှိ ဂျာမန်အဓိပတိ ဖရိုင်းဒရစ်မာ့ဇ်သည် အိုလက်ဖ်ရှိုးဇ်လက်ထက် ပြဌာန်းခဲ့သော ဥပဒေကို ပြန်လည်သုံးသပ်မည်ဟု ကတိပြုခဲ့သည်။
ကိုကလင်း
Ref:Thesun
#MeKongNews
#လိင်တူချစ်သူ
#ဆန့်ကျင်ရေးသမား
#နာဇီလက်သစ်ဝါဒီ
#မာလာဆဗန်ဂျာလိုင်းဘစ်ချ်
#လိင်အင်္ဂါပြောင်းလဲ
