ရှမ်းပြည်နယ် အရှေ့ပိုင်း၊ တာချီလိတ်မြို့တွင် ခရီးသွားဖို့ ဒီကနေ့ စက်တင်ဘာလ ၂၁ ရက်မှာ ကိုဗစ်-၁၉ ရောဂါပိုး ရှိ၊ မရှိ လာရောက် စစ်ဆေးသူတွေထဲက ၂ ဦးမှာ ကိုဗစ်ပိုး တွေ့ရှိခဲ့တယ်လို့ သတင်းရင်းမြစ်ထံကနေ သိရပါတယ်။
တာချီလိတ်မြို့ ဆေးရုံဟောင်းရှိ ကိုဗစ်-၁၉ ရောဂါ စစ်ဆေးရေး စင်တာကို ခရီးသွားဖို့ အတွက် လာရောက် စစ်ဆေးရာက ကိုဗစ်ပိုး တွေ့ရှိခဲ့တာ ဖြစ်တယ်လို့ သတင်းရင်းမြစ်က ပြောပါတယ်။
“၂ ယောက်မှာ ပိုးတွေ့တယ်။ လေယာဉ်နဲ့ သွားဖို့အတွက် လာစစ်တဲ့ သူတွေလို့ သိရတယ်။ ကျန်တာတော့ မသိရသေးဘူး” လို့ ၎င်းက ပြောပါတယ်။
ကိုဗစ်ပိုး တွေ့ရှိသူတွေနဲ့ ထိတွေ့ခဲ့သူတွေကို အာဏာပိုင်တွေက ဆက်လက် စုံစမ်း နေတယ်လို့လည်း သိရပါတယ်။
ပြီးခဲ့တဲ့ စက်တင်ဘာ ၂၀ ရက်ကလည်း တာချီလိတ်မြို့မှာ ကိုဗစ်ပိုး ကူးစက်ခံရပြီး ရောဂါအခံရှိတဲ့ အမျိုးသမီး တစ်ဦး သေဆုံးခဲ့ပါတယ်။
လတ်တလော တာချီလိတ်မြို့တွင် ကိုဗစ်ပိုး တွေ့ရှိသူတွေ ပြန်လည် များပြားလာပေမယ့် အာဏာပိုင်တွေက ရောဂါပိုး တွေ့ရှိမှုကို အတည်ပြု ထုတ်ပြန်တာမျိုး မရှိတဲ့အတွက် ရောဂါ ကူးစက်ခံရမှာကို စိုးရိမ်နေတယ်လို့ ဒေသခံတွေက ဆိုပါတယ်။
အခုရက်ပိုင်းမှာ တာချီလိတ်မြို့ အပါအဝင် ရှမ်းပြည်နယ်တွင် ကိုဗစ်-၁၉ ရောဂါပိုး တွေ့ရှိသူတွေ များပြားလာပါတယ်။
