မဲခေါင်၊ ဇွန် ၂၅
ရုရှားနိုင်ငံတောင်ပိုင်း မွတ်ဆလင်လူမျိုး အများစုနေထိုင်တဲ့ ဒါဂက်စတန်ဒေသက မြို့ ၂ မြို့မှာ ဇွန်လ ၂၃ ရက်နေ့က လက်နက်ကိုင် အကြမ်းဖက်သတ်ဖြတ်မှုတွေ ဖြစ်ပွားခဲ့ပြီး ဂျူးလူမျိုး အော်သိုဒေါ့ခရစ်ယာန်ဘာသာဝင် ဘုန်းကြီးကို မိသားစုရှေ့မှာပဲ လည်လှီးသတ်ဖြတ်ခဲ့သလို ရဲတပ်ဖွဲ့ဝင် အနည်းဆုံး ၁၉ ဦးလည်း သေဆုံးခဲ့ရကြောင်း ဇွန် ၂၄ ရက်မှာ ရုရှားမီဒီယာတွေက ထုတ်ပြန်ဖော်ပြကြပါတယ်။
ဒါဂက်စ္စတန်နီဒေသရဲ့ မြို့တော် ဒါဘန့်နဲ့ မကက်ချ်ကာလာမှာ နေရာတော်တော်များများ မီးခိုးလုံးတွေ အူထနေခဲ့ပြီး အနက်ရောင်ဝတ် စက်သေနတ်ကိုင်ဆောင်သူတစ်စုက အကြမ်းဖက်တိုက်ခိုက်တာဖြစ်ပါတယ်။
ဒီအကြမ်းဖက်မှုမှာ ဒါဘန်မြို့က အော်သိုဒေါ့ခရစ်ယာန်ဘုရားကျောင်းမှာ နှစ်ပေါင်း ၄၀ ဘုန်းတော်ကြီးလုပ်ခဲ့သူ ၆၆ နှစ်ရှိ နီကိုလိုင်ကိုတယ်လ်နီကော့ဗ်ကို မိသားစုရှေ့မှာတင် လည်လှီးသတ်ဖြတ်သွားခဲ့ပြီး ရဲတွေ လုံခြုံရေးယူထားတဲ့ အဆောက်အအုံထဲကိုလည်း မီးလောင်ဗုံးတွေပစ်သွင်းပြီးမှ ဝင်ရောက်ပစ်ခတ်လို့ ရဲတပ်ဖွဲ့ဝင် အနည်းဆုံး ၁၉ ယောက်ပါ သေဆုံးကြောင်း သိရပါတယ်။ အကြမ်းဖက်တိုက်ခိုက်မှုဟာမြို့နှစ်မြို့ နေရာအနှံ့မှာဖြစ်ပွားခဲ့လို့ ဒီထက်ပို သေဆုံး မှုမြင့်တက်လာနိုင်ကြောင်း ဒေသခံရုရှားသတင်းတွေက ဆိုပါတယ်။
ရုရှား အမျိုးသားအကြမ်းဖက်မှုဆန့်ကျင်ရေးကော်မတီ အဆိုအရ တစ်နေရာတည်းမှာ လူအများဆုံးသေအောင် ပစ်ခတ်သွားတဲ့ အကြမ်းဖက်သမား ၆ ယောက်ကို စုံစမ်းစစ်ဆေးရေး ကော်မတီဖွဲ့ပြီး ဒီဖြစ်ရပ်ဆိုးကို ကိုင်တွယ်ဖြေရှင်း သွားမှာဖြစ်ကြောင်း၊ ဒါဂက်စ္စတန် ဒေသအတွက် သာမက ရုရှားတစ်နိုင်ငံလုံးအတွက် ဝမ်းနည်းခံပြင်းစရာ အကြမ်းဖက်ခံရမှုလို့ ထုတ်ပြန်သွားပါတယ်။
ဒါဂက်စ္စတန်ဒေသဟာ မွတ်ဆလင်အများဆုံး နေထိုင်ခဲ့လို့ ချေချင်ညာ ခွဲထွက်အဖွဲ့ရဲ့ သီးခြားလွတ်လပ်ရေးတိုက်ပွဲတွေ ကြုံခဲ့ရသလို နောက်ပိုင်း ရုရှားစစ်တပ်က အင်အားသုံး ဖိနှိပ်ခဲ့ပေမယ့် အစ္စလာမ္မစ် အစွန်းရောက် လက်နက်ကိုင်အဖွဲ့တွေရဲ့ တော်လှန်မှုတွေ ဆက်ရှိခဲ့ပြီး ခရစ်ယာန်ဘုန်းတော်ကြီးကို လည်လှီးသတ်သွားပုံအရ အစ္စလာမ္မစ် အကြမ်းဖက်အဖွဲ့ လက်ချက်သာ ဖြစ်နိုင်တယ်လို့ သုံးသပ်နေကြပါတယ်။
ပူတင်ထောက်ခံ လွှတ်တော်အမတ် ဂတ်ဇီယက်ဗ်က ဒီအကြမ်းဖက် တိုက်ခိုက်မှုဟာ ယူကရိန်းနဲ့ နေတိုးတို့ နောက်ကွယ်က ကြိုးကိုင်စီစဉ်တာ သေချာကြောင်း တယ်လီဂရမ် လူမှုကွန်ယက်ပေါ် ရေးသားဝါဒဖြန့် သွားပါသေးတယ်။
ပြီးခဲ့တဲ့ မတ် ၂၂ ရက်နေ့ကလည်း မော်စကိုက လူပေါင်း ၆၀၀၀ ရှိတဲ့ ခရိုကက်စ် မြို့တော်ခန်းမရုံ စတိတ်ရှိုးပွဲကို လက်နက်ကိုင် အကြမ်းဖက်သမားတွေ ဝင်ရောက်ပစ်ခတ်လို့ အနည်းဆုံး ၁၃၉ ယောက် သေဆုံးတဲ့ ဖြစ်စဉ်တုန်းကလည်း ISIS က သူတို့လက်ချက်လို့ ထုတ်ပြန်တာတောင် ပူတင်အတွက် ဝါဒဖြန့်သူတွေက ယူကရိန်းလက်ချက်လို့ စွပ်စွဲခဲ့ကြပါသေးတယ်။
Ref:Thesun
MKF-001
