မဲခေါင်၊ ဩဂုတ် ၃
ရှမ်းပြည်နယ် မြောက်ပိုင်း၊ မူဆယ်မြို့နယ်၊ ဇယ်လန့်ရွာ အရှေ့ဘက်ရှိ ရသေ့တောင်မှာ ဩဂုတ်လ ၂ ရက်နေ့ မနက် ၁၀ နာရီကျော်ကစပြီး စစ်ကောင်စီနဲ့ TNLA တိုက်ပွဲ ဖြစ်ပွားရာ ပြည်သူ ၃ ဦး လက်နက်ထိမှန် ဒဏ်ရာရ ကြောင်း ဒေသခံတွေက ပြောပါတယ်။
မနေ့က မွန်းလွဲပိုင်းမှာ ၁၀၅ မိုင်က ကနေ ဇယ်လန့်ဘက် စစ်ကူလာတဲ့ စစ်ကောင်စီတပ် တုံခန်အနီးမှာ မိုင်းဆွဲ တိုက်ခိုက်ခံရကာ ထိခိုက်မှုတွေရှိလို့ ၁၀၅ မိုင်တပ်က လက်နက်ကြီး ပစ်ကူရာက ဘုန်းကြီးကျောင်းထဲ တည့်တည့် ကျတာလို့ ဒေသခံ အမျိုးသား တစ်ဦးက ပြောပါတယ်။
“လက်နက်က ဘုန်းကြီးကျောင်းမှာ လာကျကွဲတာ။ ဘုန်းကြီး တစ်ပါး ထိသွားတယ်” လို့ ဒေသခံ အမျိုးသမီး တစ်ဦးက ပြောပါတယ်။
၁၀၅ မိုင် ကုန်သွယ်ရေးဇုန် အနီးက စစ်ကောင်စီတပ်တွေရှိတဲ့ အနီးနား ၂ နေရာခန့်ကိုလည်း လာရောက် ပစ်ခတ်သွားတာ ရှိတယ်လို့ ဆိုပါတယ်။
၁၀၅ မိုင် ဘော်လုံးကွင်းမှာလည်း လက်နက်ကြီး ၃ လုံး ကျရောက် ပေါက်ကွဲတာပြီး စာသင်ကျောင်း အနောက်ဘက် တစ်လုံး ကွဲရာ အလယ်တန်းအရွယ် မိန်းကလေး တစ်ဦးနဲ့ နမ္မတူနွားခြံ အနီးက လူနေအိမ်ရှေ့မှာ လက်နက်ကြီး တစ်လုံး ကျကွဲကာ အမျိုးသမီး တစ်ဦးတို့ ထိခိုက် ဒဏ်ရာရတာလို့ သူက ပြောပါတယ်။
“၂ ယောက်ထိသွားတယ်။ မိန်းကလေးပဲ။ အခု ဆေးရုံမှာ” လို့ ၁၀၅ မိုင် ဒေသခံ အမျိုးသမီး တစ်ဦးက ပြောပါတယ်။
မနေ့က ညနေပိုင်းအထိ တိုက်ပွဲ ပြင်းထန်နေပြီး ဇယ်လန့် အနီးက ရသေ့တောင်ဘက်မှာတော့ TNLA တွေက စစ်ကောင်စီတပ်ဖွဲ့ကို အမဲလိုက်သလို အော်ဟစ် မောင်းထုတ် ပစ်ခတ်နေတယ်လို့ ရှေ့တန်း သတင်း ရင်းမြစ်က ပြောပါတယ်။
“ပလောင်တွေ အောင်ပွဲ ခံနေတာ။ အော်သံတွေ ကြားနေရတယ်။ မှိုရသလို အော်နေတာ။ ဘယ်လောက်တောင် အောင်ပွဲ ခံရလဲ မသိဘူး” လို့ သူက ပြောပါတယ်။
ဒါ့ အပြင် မနေ့ ညနေပိုင်းမှာ ၁၀၅ မိုင် ကနေ လားရှိုးဘက် အထွက် မော်တောင်းရွာ အနီးဝန်းကျင်လည်း တိုက်ပွဲ ဖြစ်ပွားလာတယ်လို့ ဒေသခံတွေက ပြောပါတယ်။
ညနေပိုင်း မူဆယ်-လားရှိုး လမ်းမပေါ်ရှိ ဆွမ်လုံရွာအနီး တိုက်ပွဲ ထပ်မံ ဖြစ်ပွားနေတာကြောင့် နမ့်အွမ်ရွာနားက ကောင်းဝိန်းရွာထဲ လက်နက်ကြီး ကျလာလို့ ကောင်းဝိန်းရွာက ဒေသခံတွေ အားလုံး နမ့်အွမ်ရွာထဲ တိမ်းရှောင်လာကြတယ်လို့ နမ့်အွမ် ရွာခံ တစ်ဦးက ပြောပါတယ်။
မူဆယ် နဲ့ နမ့်ခမ်းမြို့ကြား၊ ဇယ်လန့်ရွာ အနီးဝန်းကျင်မှာ စစ်ကောင်စီနဲ့ TNLA တို့အကြား ပြီးခဲ့တဲ့ ဇူလိုင်လ ၂၃ ရက် ညနေပိုင်းကစပြီး တိုက်ပွဲတွေ ဆက်တိုက်နီးပါး ဖြစ်ပွားနေပါတယ်။
CJ-008
#MeKongNews
#မူဆယ်_နမ့်ခမ်း
#TNLA
#၁၀၅_မိုင်
