မဲခေါင် ၊ ဇူလိုင် ၂၁

ရှမ်းပြည်နယ်တောင်ပိုင်း၊ ရပ်စောက်မြို့နယ်၊ ယမ်းတွင်းငါးကြောင် ကျေးရွာအုပ်စုထဲက ကျေးရွာတွေမှာ စစ်ကောင်စီ လက်အောက်ခံ PNO ပြည်သူ့စစ်တွေက ပြည်သူလူထုကို ငွေတောင်းစားတာ လက်နက်နဲ့အနိုင်ကျင့်ဗိုလ်ကျပြီး ဖမ်းဆီး ရိုက်နှက်တာတွေ ပြုလုပ်နေတယ်လို့ ဒေသခံတွေက မဲခေါင် သတင်းဌာနကိုပြောပါတယ်။

PNO ပြည်သူ့စစ်ဟာ ယမ်းတွင်းငါးကြောင် အုပ်စုထဲမှာရှိတဲ့ ပအိုဝ်းကျေးရွာတွေ ဓနုကျေးရွာတွေကို သောင်းကြမ်းနေတာဖြစ်ပြီး အဲ့ဒီလို သောင်းကြမ်းနိုင်ဖို့ PNO ပြည်သူ့စစ်က ရွာတွေထဲမှာ ၎င်းတို့ရဲ့ အမာခံ လူတွေကို မွေးထားပြီး လက်နက်တွေလည်း ပေးထားတယ်လို့ ဒေသခံတွေကပြောပါတယ်။

“PNO ပြည်သူ့စစ်လို့ပြောရတာက PNO အဖွဲ့ထဲကိုဝင်ထားတဲ့ ပအိုဝ်းမဟုတ်တဲ့သူတွေပါနေလို့ပါ။ တစ်ချို့ကျေးရွာတွေမှာ PNO အဖွဲ့ထဲဝင်ထားတဲ့သူတွေရှိပါတယ်။ သူတို့ကို ယူနီဖောင်းနဲ့ လက်နက်တပ်ဆင်ပေးထားတယ်။ အဲ့ဒီလက်နက်အားကိုးနဲ့ပဲ မထင်ရင် မထင်သလို ကျေးရွာတွေထဲကိုလိုက်ဝင်ပြီး လူငယ်တွေကိုဖမ်းဆီးရိုက်နှက်တာမျိုးတွေလုပ်တယ်။ အကြောင်းက ဖုန်းထဲမှာ နိူင်ငံရေးနဲ့ပတ်သက်တဲ့ ပုံတွေတွေ့လို့တဲ့။” လို့ ဒေသခံတစ်ဦးကပြောပါတယ်။

ဖုန်းထဲမှာ နိုင်ငံရေးပိုစ့်တွေ စစ်ကောင်စီတိုက်ပွဲမှာ သေဆုံးတဲ့ ပိုစ့်တွေကို တင်ထားတာ SHARE ထားတာတွေ့ရင် PNO ပြည်သူ့စစ်က ဖမ်းဆီးသွားပြီး အဖမ်းခံရတဲ့သူတွေကို ပိုက်ဆံနဲ့ ပြန်ရွေးခိုင်းတယ်လို့ အဲ့ဒီဒေသခံက ပြောပါတယ်။

“ပြီးတော့ လက်နက်တွေတွေ့လို့ပါဆိုပြီး ဖမ်းခေါ်သွားတာမျိုးလည်းရှိတယ်။ ပြီးခဲ့တဲ့ ၄ ရက်ကဆို လက်နက်တွေ့လို့ ဆိုပြီး ဖမ်းသွားတာ အဲ့အဖမ်းခံရတဲ့သူကလည်း သူတို့လူပဲ၊ သူတို့ပြောတဲ့ လက်နက်ကလည်း လေသေနတ်ကြီးကွာ” လို့ နောက်ထပ်ဒေသခံတစ်ဦးကပြောပါတယ်။

ပြီးခဲ့တဲ့ ဇူလိုင်လ ၁၈ ရက်နေ့မှာ အင်းအား ၃၀ ခန့်ရှိတဲ့ PNO ပြည်သူ့စစ်အဖွဲ့ဟာ ယမ်းတွင်းငါးကြောင် ကျေးရွာအုပ်စုထဲက ရွာတစ်ရွာကို ဝင်ရောက်ပြီး လမ်းမှာတွေ့တဲ့သူတိုင်းကို ဖမ်းဆီးစစ်ဆေးတာတွေ ပြုလုပ်ခဲ့တဲ့အပြင် လူငယ်တွေကို ရိုက်နှက်တာ တစ်ချို့ကို ဖမ်းခေါ်သွားတာတွေပြုလုပ်ခဲ့တယ်လို့ ဒေသခံတစ်ဦးကပြောပါတယ်။

“ဒီခေတ်ပျက်ကို အခွင့်ကောင်းယူပြီး PNO ပြည်သူ့စစ်တွေက လက်နက်အားကိုးနဲ့ ထင်တိုင်းကြဲ အနိူင့်ကျင့် ဗိုလ်ကျနေတာကတော့ အတော်ရုပ်ဆိုးအကျည်းတန်တယ်ဗျ၊ ဒါဟာ အာဏာရှင်စနစ်အောက်က ပြည်တွင်းစစ်ဖြစ်နေတဲ့ ခေတ်ပျက်ကြီးထဲမှာ နောက်ဆက်တွဲ ဆိုးကျိုးတွေပေါ့ဗျာ” ရပ်စောက်မြို့နယ် ဒေသခံတစ်ဦးကပြောပါတယ်။

PNO ပြည်သူ့စစ်ရဲ့ အနိုင်ကျင့်ဗိုလ်ကျမှုကြောင့် ရပ်စောက်မြို့နယ် ယမ်းတွင်းငါးကြောင် ကျေးရွာအုပ်စုထဲက ကျေးရွာတွေမှာ လူငယ်အများစုက ထိုင်း ၊ မလေးရှားစတဲ့ ပြည်ပနိုင်ငံကို ထွက်ပြေးကုန်ကြီး ရွာတွေထဲမှာ သက်ကြီးပိုင်းတွေသာ အများဆုံးရှိတယ်လို့ ရပ်စောက်မြို့နယ်မှ ဓနုလူမျိုးတစ်ဦးကပြောပါတယ်။

PNO ပြည်သူ့စစ်တွေဟာ ဓနုကျေးရွာတွေကိုပါ အနိုင်ကျင့် ဗိုလ်ကျနိုင်ဖို့အတွက် ပအိုဝ်းမဟုတ်တဲ့ ရွာခံတွေကို ယူနီဖောင်းနဲ့ လက်နက်တွေ တပ်ပေးပြီး ကျေးရွာကို အနိုင်ကျင့်ခွင့်ပြုထားတာကြောင့်ဖြစ်တယ်လို့ နောက်ထပ်ဒေသခံတစ်ဦးကပြောပါတယ်။

“ဒီနားတစ်ဝှိုက်က ကျေးရွာတွေမှာ PNO အဖွဲ့ဝင် ပြည်သူ့စစ်တွေများလာတယ်။ ဒီနယ်တစ်ဝှိုက်မှာ သူတို့ကိုကြောက်နေရတယ်။ အာဏာရှင်လက်ပါးစေတွေပေါ့ဗျာ” လို့ သူကပြောပါတယ်။

ဒါ့အပြင် PNO ပြည်သူ့စစ်အဖွဲ့မှ စစ်ဗိုလ်တွေဟာ ရပ်စောက်မြို့နယ်ဘက်က ကျေးရွာတွေမှာ ကိုယ်တိုင် မူးယစ်ဆေးဝါး ရောင်း ဝယ် ကြတာဖြစ်ပြီး တစ်ခါတစ်လေ အချင်းချင်း မတည့်ကြတာလည်းရှိတယ်လို့ အဲ့ဒီဒေသခံက ဆက်ပြောပါတယ်။

ဦးအောင်ခမ်းထီ ဦးဆောင်တဲ့ စစ်ကောင်စီလက်အောက်ခံ PNO ပြည်သူ့စစ်အဖွဲ့ဟာ စစ်ကောင်စီနဲ့ ပူးပေါင်းပြီး တော်လှန်ရေးတပ်ဖွဲ့တွေကို တိုက်ခိုက်တာ တော်လှန်ရေးဘက်တော်သားတွေကို ဖမ်းဆီးတာတွေကြောင့် နာမည်ဆိုးနဲ့ ကျော်ကြားနေတဲ့အဖွဲ့ဖြစ်ပါတယ်။

CJ 002

#MeKongNews

#ရပ်စောက်မြို့နယ်

#PNO ပြည်သူ့စစ်အဖွဲ့

#စစ်ကောင်စီ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)