မဲခေါင်၊ ဧပြီ ၁၅ 

မြန်မာ အာဏာသိမ်း စစ်တပ်ဟာ တရားဝင်စီရင် အုပ်ချုပ်ခွင့်မရှိတဲ့ အစိုးရတရပ်ထက် နိုင်ငံသားတွေကို ဓားစားခံ လုပ်ထားတဲ့ လူမိုက်ဂိုဏ်းနဲ့ တူနေတယ်လို့ မြန်မာနိုင်ငံ လူ့အခွင့်အရေး အခြေအနေ ဆိုင်ရာ အထူးအစီရင်ခံစာ တင်သွင်းသူ တွမ်အန်ဒရူးစ်က ပြောပါတယ်။ 

Channel4 သတင်းဌာနနဲ့ ဧပြီ ၁၂ ရက်က တွေ့ဆုံမေးမြန်းမှုမှာ မစ္စတာ အန်ဒရူးစ်က ပြောလိုက်တာပါ။ 

“’ဒီ (မြန်မာ အာဏာသိမ်း) စစ်တပ်ဟာ တရားမဝင်တဲ့ စစ်အုပ်ချုပ်ရေး ကျင့်သုံးနေသူတွေပါ။ သူတို့က တကယ်တော့ ရဟတ်ယာဉ်တွေ၊ တိုက်ခိုက်ရေး လေယာဉ်တွေ အပါအဝင် အဓိက အင်အားတွေကို ချုပ်ကိုင်ထားတဲ့ ရာဇဝတ်ဂိုဏ်း ဖြစ်ပါတယ်။ လူ ၅၄ သန်းကို ဓားစာခံအနေနဲ့ ထိန်းချုပ်ထားတာ ဖြစ်ပါတယ်။ စစ်အုပ်ချုပ်ရေး ကျင့်သုံးနေတာထက် လူမိုက်ဂိုဏ်းနဲ့ ပိုတူနေပါတယ်” လို့ အန်ဒရူးစ်က ပြောပါတယ်။ 

ပြီးခဲ့တဲ့ ရက်ပိုင်းက စစ်ကိုင်းတိုင်း၊ ပဇီကြီးကျေးရွာမှာ စစ်တပ်က လေကြောင်း တိုက်ခိုက်မှု ပြုလုပ်ခဲ့တဲ့ အပေါ် မှတ်ချက်ပြုနေရင်း မစ္စတာ အန်ဒရူးစ်က ပြောဆိုလိုက်တာပါ။ 

အဲဒီ တိုက်ခိုက်မှုကြောင့် ကလေးငယ်တွေနဲ့ အမျိုးသမီးတွေ အပါအဝင် လူ ၁၆၀ ကျော် သေဆုံးခဲ့ပါတယ်။ 

စစ်တပ်ဘက်ကတော့ ဒီတိုက်ခိုက်မှုဟာ သူတို့တိုက်ခိုက်မှုလို့ ဝန်ခံထားပေမဲ့ အတိုက်အခံ ပြည်သူ့ ကာကွယ်ရေးတပ်ဖွဲ့(ပီဒီအက်ဖ်) ရဲ့ လက်နက်တိုက်ကို ဦးတည်တိုက်ခိုက်ခဲ့တာဖြစ်ပြီး အရပ်သားတွေကို ပစ်မှတ်ထားတာ မဟုတ်ဘူးလို့ ငြင်းဆိုထားပါတယ်။ 

ဒီဖြစ်ရပ် အတွက် ရှုတ်ချကြောင်း ကုလသမဂ္ဂက ပြောပါတယ်။ 

ပြီးခဲ့တဲ့ ဒီဇင်ဘာမှာ ကုလသမဂ္ဂ လုံခြုံရေး ကောင်စီက မြန်မာနိုင်ငံအရေးနဲ့ ပတ်သက်ပြီး ဆုံးဖြတ်ချက်တခု ချထားပေမဲ့ ယူကရိန်းနိုင်ငံမှာ လိုမျိုး နိုင်ငံတကာ အသိုက်အဝန်းက အာရုံစိုက်တဲ့ မဟာဗျူဟာမြောက် လုပ်ငန်း ဆောင်ရွက်မှုတွေ မတွေ့ရသေးဘူးလို့လည်း မစ္စတာအန်ဒရူးစ်က ပြောပါတယ်။ 

#MeKongNews

#ကုလသမဂ္ဂ

#ဥက္ကာ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)