မဲခေါင်၊ ဖေဖော်ဝါရီ ၂၃
အမျိုးသား ညီညွတ်ရေး အစိုးရ-NUG၊ ကျန်းမာရေးဝန်ကြီးဌာန အနေနဲ့ ကြားကာလ ပြည်နယ်-ဖက်ဒရယ် ယူနစ်တွေက ဆေးရုံ ဆေးခန်းတွေမှာ တာဝန်ထမ်းဆောင်ဖို့ ကျန်းမာရေး ဝန်ထမ်းတွေ ခေါ်ယူနေတယ်လို့ ဒီကနေ့ ထုတ်ပြန်ပါတယ်။
အထူးကု ဆရာဝန်တွေ၊ ဆရာဝန်တွေ၊ သွားနှင့်ခံတွင်း အထူးကုဆရာဝန်တွေ၊ သွားနှင့်ခံတွင်း ဆရာဝန်တွေ၊ အထူးကု ဘွဲ့လွန်သင်တန်းသားတွေ၊ ဆေးနှင့် ဆေးနှီးနွှယ်ဆိုင်ရာ ဒီပလိုမာဘွဲ့ ရရှိသူတွေ၊ သူနာပြုတွေ၊ ဆေးဘက်ဆိုင်ရာ နည်းပညာတက္ကသိုလ် ဒီပလိုမာနဲ့ ဘွဲ့ရရှိသူတွေ၊ ဆေးဝါးတက္ကသိုလ်တွေက ဘွဲ့ရရှိသူတွေနဲ့ တိုင်းရင်းဆေးပညာရှင်တွေ အနေနဲ့ ဖေဖော်ဝါရီလ ၂၃ ရက်မှ မတ်လ ၁၆ ရက်အတွင်း လျှောက်ထားနိုင်တယ်လို့ ဆိုပါတယ်။
ဒါ့အပြင် ကျန်းမာရေးမှူးတွေ-HA၊ အမျိုးသမီး ကျန်းမာရေး ဆရာမတွေ-LHV၊ သားဖွား ဆရာမတွေ-Midwife၊ ပြည်သူ့ကျန်းမာရေး ကြီးကြပ် (၁) PHS-1၊ ပြည်သူ့ကျန်းမာရေးကြီးကြပ် (၂) PHS-2 တွေအနေနဲ့ မတ်လ ၁၇ ရက်မှ ဧပြီလ ၇ ရက်အတွင်း လျှောက်ထားနိုင်တယ်လို့ ဖော်ပြပါတယ်။
လျှောက်ထားသူဟာ မြန်မာနိုင်ငံဖွား ကျန်းမာရေးကောင်းသူ၊ စစ်ကောင်စီနဲ့ ပတ်သက်မှု မရှိသူ ဖြစ်ရမှာဖြစ်ပြီး နိုင်ငံ့ဝန်ထမ်း ဖြစ်ပါက CDM ဝန်ထမ်း ဖြစ်ရမယ့်အပြင် တာဝန်ချထားရာ ဒေသသို့ သွားရောက်တာဝန် ထမ်းဆောင်နိုင်သူ ဖြစ်ရမယ်လို့ ဆိုပါတယ်။
အတည်ပြု ရွေးချယ်ခံရသူတွေ အနေနဲ့ သင်တန်းတွေကို သတ်မှတ် အစီအစဉ်အတိုင်း တက်ရောက်ရမှာဖြစ်ပြီး ဝန်ကြီးဌာနနဲ့ ကြားကာလ ပြည်နယ်-ဖက်ဒရယ်ယူနစ်တွေ အစီအစဉ်နဲ့ ဒေသအသီးသီးမှာ တာဝန်ချထားမယ်လို့ ထုတ်ပြန်ချက်မှာ ဖော်ပြပါတယ်။
လျှောက်ထားလိုသူတွေ အနေနဲ့ ရာထူးနေရာများ အလိုက် သတ်မှတ်ထားတဲ့ ရက်များအတွင်း နေ့စဉ် ပိတ်ရက်မရှိ၊ မနက် ၁၀ နာရီမှ ည ၈ နာရီ အထိ အမျိုးသား ညီညွတ်ရေး အစိုးရ၊ ကျန်းမာရေး ဝန်ကြီးဌာန၊ လူ့စွမ်းအား အရင်းအမြစ်ဌာန Telegram – https://t.me/HR_MOHNUG သို့မဟုတ် Telegram Username – @HR_MOHNUG မှာ လျှောက်လွှာပုံစံတွေ ထုတ်ယူပြီး ပေးပို့ လျှောက်ထားနိုင်တယ်လို့ သိရပါတယ်။
စစ်အာဏာသိမ်းပြီးနောက် အာဏာဖီဆန်ရေးလှုပ်ရှားမှု CDM မှာ ပါဝင်ခဲ့တဲ့ ကျန်းမာရေးဝန်ထမ်း ၄၇,၂၅၄ ဦး ရှိတယ်လို့ စစ်ကောင်စီက ထုတ်ပြန်ထားပါတယ်။
