မဲခေါင်၊ ဖေဖော်ဝါရီ ၁၀
မလေးရှားဝန်ကြီးချုပ် အန်ဝါအီဘရာဟမ်က ထိုင်းဝန်ကြီးချုပ် ပရာယွတ်နဲ့ ဆွေးနွေးမှုမှာ အိမ်ချင်းကပ်နိုင်ငံ ဖြစ်တဲ့အလျှောက် ထိုင်းနိုင်ငံဟာ မြန်မာ ပဋိပက္ခမှာ ပိုမိုတက်ကြွစွာ ပါဝင်ကူညီပေးသင့်တယ်လို့ တိုက်တွန်း ပြောဆိုသွားပါတယ်။
မနှစ်က ဝန်ကြီးချုပ်ဖြစ်လာပြီးနောက် ပထမဆုံးအကြိမ် ထိုင်းနိုင်ငံကို ရောက်လာခဲ့တဲ့ အန်ဝါက အာဆီယံမှာ အာဏာသိမ်းမြန်မာစစ်ကောင်စီနဲ့ ပတ်သက်တဲ့ သဘောထားတွေ ကွဲလွဲနေမှုအတွက်မေးခွန်းထုတ်နေမှုအပေါ် ဖြေရှင်းခြင်းအဖြစ် ပိုပြီး အိမ်နီးချင်းကျတဲ့ ထိုင်းက မြန်မာ့ပဋိပက္ခကို ပိုအားစိုက် လုပ်ဆောင်ပေးသင့်တယ်လို့ ပြောသွားတာဖြစ်ပါတယ်။
“ မြန်မာ့အရေးဟာ ပြည်တွင်းရေးဖြစ်တယ်ဆိုပေမယ့် ကျွန်တော်တို့ရဲ့ ပူပန်မှုတွေကို ပိုပြီးအိမ်နီးချင်းကျတဲ့ ခင်ဗျားတို့က ပိုဖော်ထုတ်ဖို့ အခွင့်အလမ်းအသာ ရတယ်။ ပြည်တွင်းရေး ပြည်တွင်းမှာပဲ ဖြေရှင်ရမယ်ဆိုပေမယ့် ဒီကိစ္စက ဒေသတွင်းတစ်ခုလုံးကို ရိုက်ခတ်နေတာပါ” လို့ အန်ဝါက တိုက်တွန်းပြောကြားပါတယ်။
ပရာယွတ်က ဒီစကားကို တိုက်ရိုက်မတုံ့ပြန်ဘဲ “ငါတို့ဟာ မိသားစုတွေပဲ။ ကျေးဇူးပါ သူငယ်ချင်းကြီး” လို့သာ ဝေလည်ကြောင်ပတ်ဖြေသွားခဲ့ကြောင်း ဘန်ကောက်ပို့စ်သတင်းမှာ ဖော်ပြပါတယ်။
မြန်မာနိုင်ငံအရေးအတွက် အာဆီယံနိုင်ငံတွေကြားမှာ အာဏာသိမ်းစစ်ကောင်စီကို လုံး၀တရားဝင်အစိုးရအဖြစ် မသတ်မှတ်ဖို့ ဘရူနိုင်း၊ အင်ဒိုနီးရှား၊ မလေးရှား၊ ဖိလစ်ပိုင်နဲ့ စင်ကာပူတို့က ခါးခါးသီးသီး သဘောထားထုတ်ပြန်ထားပြီး ကမ္ဘောဒီးယား၊ လာအို၊ ထိုင်းနဲ့ ဗီယက်နမ်နိုင်ငံတွေက စစ်ကောင်စီကို အသိအမှတ်ပြုရေး စေ့စပ်ဆွေးနွေးစေချင်တဲ့နိုင်ငံတွေအဖြစ် ရပ်တည်နေကြပါတယ်။
ဒီဇင်ဘာလက ပရာယွတ်ဦးဆောင်ပြီး စစ်ကောင်စီတာဝန်ရှိသူတွေကို ဘန်ကောက်မှာ ခေါ်ယူဆွေးနွေးရာ ကမ္ဘောဒီးယား၊ လာအိုနဲ့ ဗီယက်နမ်တို့က ဒုတိယနိုင်ငံခြားရေးဝန်ကြီးတွေလောက်သာ တက်ရောက်ခဲ့ပြီး ကျန်နိုင်ငံတွေက တက်ရောက်ခြင်းမရှိခဲ့ပါဘူး။
ထိုင်းအစိုးရပိုင် ရေနံနဲ့သဘာ၀ဓာတ်ငွေလုပ်ငန်း PTTEP ဟာ ထိုင်းနိုင်ငံရဲ့ လျှပ်စစ်ပေးဝေမှုအတွက် လိုအပ်တဲ့ သဘာ၀ဓာတ်ငွေ့ ၁၆ ရာခိုင်နှုန်းကို မြန်မာနိုင်ငံကနေ တင်သွင်းရယူနေပြီး စစ်ကောင်စီကို ဝင်ငွေရှာပေးနေလို့ ဝေဖန်မှုတွေခံနေရပါတယ်။
အာဏာသိမ်းပြီးနောက် မြန်မာနိုင်ငံမှာ လူပေါင်း ၃၀၀၀ ကို စစ်ကောင်စီက သတ်ခဲ့ ပြီး လူပေါင်း ၇၂၀၀၀ ဟာ ထိုင်း၊ မလေးရှား၊ အိန္ဒိယနဲ့ ဘင်္ဂလားဒေ့ရှ်နိုင်ငံတွေကို နေအိမ်စွန့်ခွာ ထွက်ပြေးခဲ့ကြ ရပါတယ်။
မလေးရှားနိုင်ငံမှာ မြန်မာဒုက္ခသည်ပေါင်း ၂ သိန်းအထိ လက်ခံထားရတဲ့အတွက် သူတို့လို ထိန်းချုပ် ကန့်သတ်မှုများတဲ့ နိုင်ငံငယ်လေးဟာ ဒီဝန်ကို ကြာရှည်စွာ၊ လောက်ငှစွာ ထမ်းနိုင်မှာမဟုတ်ကြောင်း၊ ဒါကြောင့် ထိုင်းအနေနဲ့ မြန်မာပဋိပက္ခဖြေရှင်းရေး အလုံးစုံ မတတ်နိုင်ရင်တောင် လျှော့ချနိုင်စေဖို့ လက်ရှိပုံစံထက်ပိုတဲ့ တက်ကြွစွာ ပါဝင်လှုပ်ရှားမှုမျိုး လုပ်စေချင်တာဖြစ်တယ်လို့ အန်ဝါအီဘရာဟမ်က ပရာယွတ်ကို တိုက်တွန်း ပြောကြားသွားတာလည်းဖြစ်ပါတယ်။
MKF – 001
Ref:Bangkok Post
#MeKongNews
