မဲခေါင်၊ ဖေဖော်ဝါရီ ၁၀
စစ်ကိုင်းတိုင်း၊ ကနီမြို့နယ်မှာ ၂ ရက်အတွင်း ကျေးရွာ ၃ ရွာ မီးရှို့ခံရလို့ နေအိမ် ၁၅၀ နီးပါး မီးလောင်ပြာကျ သွားတယ်လို့ ဒေသကာကွယ်ရေးတပ်ဖွဲ့ဝင် တစ်ဦးက ပြောပါတယ်။
ဖေဖော်ဝါရီ ၈ ရက်နေ့မှာ စစ်တပ် စစ်ကြောင်း မုံရွာ ကနေ စက်လှေ ၂ စီးနဲ့ ချင်းတွင်းမြစ်အတိုင်း ဆန်တက်လာပြီး ကျောက်မှော်ရွာမှာ စစ်အင်အား ၂၀၀ ဝန်းကျင်ချကာ အထက်ဘက်ကို စစ်ကြောင်းထိုးလာတာ ဖြစ်တယ်လို့ သိရပါတယ်။
အဲဒီနောက် ကျောက်မှော်၊ ယင်းမိုး၊ ကျွန်းကလေး၊ နတ်လဘို့တောင်ရွာ၊ ဒေါင်းခြံ၊ နတ်လဘို့မြောက်ရွာ၊ အုန်းပင်ဆိပ်နဲ့ သပြေတောရွာတွေကို စစ်တပ်က ဝင်ရောက်ခဲ့တယ်လို့ ဆိုပါတယ်။
စစ်တပ်က သပြေတောရွာကို ဖေဖော်ဝါရီ ၈ ရက် ညနေပိုင်းမှာ မီးရှို့ခဲ့ပြီးနောက် စစ်ကြောင်း နောက်ပြန်လှည့်ကာ ၉ ရက်နေ့ မနက်ပိုင်းမှာ အုန်းပင်ဆိပ်ရွာနဲ့ ညနေပိုင်းမှာ နတ်လဘို့မြောက်ရွာကို မီးရှို့ခဲ့တယ်လို့ သိရပါတယ်။
“၈ ရက်နဲ့ ၉ ရက်နေ့က ကျေးရွာ ၃ ရွာ မီးရှို့တယ်ဗျ။ သပြေတောရွာ၊ အုန်းပင်ဆိပ်ရွာ၊ နတ်လဘို့မြောက်ရွာ မီးရှို့တာဗျ။ စုစုပေါင်း အိမ်ခြေ ၁၅၀ ဝန်းကျင် မီးရှို့ခံလိုက်ရတယ်ဗျ” လို့ ဒေသ ကာကွယ်ရေးတပ်ဖွဲ့ဝင်က ဆိုပါတယ်။
အိမ်ခြေ ၁၀၀ ကျော် ရှိတဲ့ သပြေတောကျေးရွာမှ နေအိမ် ၁၀ လုံး ဝန်းကျင်၊ အိမ်ခြေ ၁၀၀ ကျော်ရှိတဲ့ အုန်းပင်ဆိပ်ကျေးရွာမှ နေအိမ် ၃၀ ဝန်းကျင်၊ အိမ်ခြေ ၂၀၀ ကျော်ရှိတဲ့ နတ်လဘို့မြောက်ရွာမှ နေအိမ် ၁၀၀ ဝန်းကျင်ကို စစ်တပ်က မီးရှို့ဖျက်ဆီး ခဲ့တယ်လို့ သူကပြောတယ်။
ဒီနေ့ မနက် ၁၁ နာရီမှာတော့ စစ်ကောင်စီတပ်တွေဟာ စက်လှေနဲ့ မုံရွာ နမခ သို့ ပြန်သွားတယ်လို့လည်း ဒေသခံတွေက ဆိုပါတယ်။
အခုလို စစ်တပ်က ကနီမြို့နယ်ရှိ ကျေးရွာတွေကို စစ်ကြောင်းထိုး ဝင်ရောက်လာတာကြောင့် ကျေးရွာ ၁၂ ရွာမှ ပြည်သူ ၃,၀၀၀ ဝန်းကျင် ထွက်ပြေးတိမ်းရှောင်ခဲ့ရပြီး လက်ရှိမှာတော့ ရွာတွေထဲ ပြန်လည်ဝင်ရောက်နေပြီလို့ သိရပါတယ်။
ပုံစာ- မီးရှို့ခံရတဲ့ နတ်လဘို့ မြောက်ရွာ
MK-003
#MeKongNews
#ကနီမြို့နယ် #မီးရှို့ #မုံရွာန.မ.ခ
