မဲခေါင်၊ ဇန်နဝါရီ ၂၇

ရှမ်းပြည်နယ် တောင်ပိုင်း၊ တောင်ကြီးမြို့၊ မြို့နယ် စည်ပင်သာယာရေးဌာန ဝန်ထမ်းတွေက ပျံကျဈေးသည်တွေကို အနိုင်ကျင့်နေတယ်လို့ ဒေသခံတွေထံက သိရပါတယ်။

တောင်ကြီးမြို့မဈေး အပါအဝင် မြို့ပေါ်က ဈေး ၄ ဈေးမှာ ရောင်းချနေတဲ့ ပျံကျဈေးသည်တွေကို ဈေးသိမ်းချိန် အော်ဟစ်ဆဲဆိုတာ၊ ပစ္စည်းတွေကို ကန်ကျောက်တာ၊ ပစ္စည်းတွေ သိမ်းယူတာတွေ ပြုလုပ်နေတယ်လို့ ဆိုပါတယ်။

“မနက်ဈေး ရောင်းချတဲ့ ပျံကျဈေးသည်တွေကို အခွန်လည်း ကောက်တယ်။ ဈေးရောင်းချသူတွေက သက်ကြီးပိုင်းတွေ များတယ်။ အခွန်ပေးနေရပေမယ့် ဒါကို သူတို့ သတ်မှတ်ချိန်အတွင်း ဈေးသိမ်းမပြီးလို့ ဆိုပြီး ရောင်းချတဲ့ ပစ္စည်းတွေကို ခြေထောက်နဲ့ ကန်ထုတ်တယ်၊ အော်ဆဲတယ်၊ ပစ္စည်းတွေကို ကားပေါ်ဆွဲတင်ပြီး သိမ်းသွားတယ်။ ဒါကို အထက်လူကြီးတွေက မသိတာလား၊ တမင် ခွင့်ပြုထားတာလားပေါ့” လို့ ဒေသခံ တစ်ဦးက ပြောပါတယ်။

ဒါ့အပြင် ပျံကျ ဈေးသည်တွေ ရောင်းချတဲ့ ကုန်စိမ်း၊ ဘုရားပန်း စတာတွေ ကျသင့်ငွေ မပေးဘဲ အလကား ယူတာ၊ ဈေးသည်တချို့ကို လမ်းနဲ့မလွတ်လို့ဆိုပြီး ပစ္စည်းသိမ်း၊ ဒဏ်ငွေရိုက်တာတွေ ပြုလုပ်နေတယ်လို့ သိရပါတယ်။

“သူတို့ပေးတဲ့ အခွန်လည်း ယူထားတာပဲဗျာ။ အချိန်နည်းနည်း စောင့်ပေးသင့်ပါတယ်။ တချို့ အသက်ကြီး ဈေးရောင်းချသူတွေဆို ငိုယိုပြီး အရင်းပြုတ်ပါပြီ ဆိုပြီး ဝမ်နည်းပူဆွေး နေကြတာ။ အဲဒါတွေကို စိတ်မကောင်းစွာနဲ့ပဲ ခဏခဏတွေ့နေရတယ်။ ဝဋ်လည်မှာ မကြောက်ကြဘူးလား မသိဘူး” လို့ တခြား ဒေသခံ တစ်ဦးက ပြောပါတယ်။

ဒါ့အပြင် မြို့ပေါ်လမ်းဘေးမှာ လက်တွန်းလှည်း၊ ကား၊ ဆိုင်ကယ်တွေနဲ့ ရောင်းချနေတဲ့ ဈေးသည်တွေကိုလည်း အခွန်ကောက်ခံတဲ့ အပြင် ပစ္စည်းသိမ်းဆည်းပြီး ဒဏ်ငွေရိုက်တာ၊ ဒဏ်ငွေ မပေးနိုင်တဲ့ ဈေးသည်တွေကို ဈေးရောင်းချခွင့် ပိတ်ပင်တာတွေ မကြာခဏ ပြုလုပ်နေတယ်လို့လည်း သိရပါတယ်။

MK-008

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)