မဲခေါင်၊ ဇန်နဝါရီ ၂၆
စစ်ကိုင်းတိုင်း၊ ဝက်လက်မြို့မှာ စစ်ကောင်စီတပ်နဲ့ ဒေသကာကွယ်ရေးတပ်တွေ တစ်ပတ်ကြာ တိုက်ပွဲ ဖြစ်ပွားခဲ့ရာ စစ်တပ်ဘက်မှ ၁၅ ယောက် သေဆုံးခဲ့သလို တော်လှန်ရေး ရဲဘော် ၆ ဦး ကျဆုံးပြီး ၂ ဦး ဖမ်းဆီးခံခဲ့ရတယ်လို့ ဒေသခံ ကာကွယ်ရေးတပ်တွေထံမှ သိရပါတယ်။
ဇန်နဝါရီ ၂၀ ရက်က ဝက်လက်မြို့ရှိ စစ်ကောင်စီ လက်အောက်ခံ ဌာနဆိုင်ရုံးတွေနဲ့ တပ်စွဲထားတဲ့ နေရာ တွေကို ဒေသ ကာကွယ်ရေးတပ်ဖွဲ့တွေက ဝင်ရောက်စီးနင်းခဲ့ရာမှ စတင်ပြီး ဒီနေ့အထိ တိုက်ပွဲ ဖြစ်ပွားနေတာလို့ သိရပါတယ်။
ဇန်နဝါရီလ ၂၀ ရက်နေ့မှ ၂၆ ရက်နေ့ အတွင်း ဝက်လက်မြို့နယ် တိုတ်ပွဲတွေမှာ စစ်သား ၁၅ ဦးသေဆုံးပြီး ၅ ဦးထက်မနည်း ထိခိုက်ဒဏ်ရာရခဲ့တယ်လို့ ဆိုပါတယ်။ PAFD တပ်ခွဲ ဗိုလ်လှိုင်ဘွား ဦးဆောင်တဲ့ တော်လှန် ရေးတပ်ဖွဲ့မှ ရဲဘော် ၆ ဦး မြင့်မြတ်စွာ ကျဆုံးပြီး ၂ ဦးဖမ်းခံရကာ ၂ ဦး ဒဏ်ရာရရှိခဲ့တယ်လို့ တိုက်ခိုက်ရာမှာ ပါဝင်ခဲ့တဲ့ အာဏာရှင်စနစ် တိုက်ဖျက်ရေး ပြည်သူ့တပ်ဖွဲ့-PAFD က ဒီကနေ့ ထုတ်ပြန်ထားပါတယ်။
ဝက်လက်မြို့ပေါ်ရှိ စစ်ကောင်စီ လက်အောက်ခံ ဆည်မြောင်းနဲ့ ရေအသုံးချမှု စီမံခန့်ခွဲရေး ဦးစီးဌာနကို ဝင်ရောက် စီးနင်းရာမှာ ရုံးသုံး Laptop ၂ လုံး သိမ်းဆည်းရမိခဲ့ပြီး အဲ့ဒီထဲက အချက်အလက်တွေကို NUG ဆီ အပ်နှံသွားမယ်လို့လည်း ထုတ်ပြန်ထားပါတယ်။
အဲ့ဒီ စစ်ဆင်ရေးကို PAFD နဲ့ PAFD တပ်ခွဲမှူးဗိုလ်လှိုင်ဘွား၊ တပ်စိပ်(၁) ပျံလွှားအဖွဲ့၊ တပ်စိပ်(၂) ခွပ်ဒေါင်းအဖွဲ့ တပ်စိပ်(၃) ဇာမဏီအဖွဲ့၊ တပ်စိပ်(၄) ငရဲမီးအဖွဲ့နဲ့ PAFD တပ်ခွဲ၊ DKPDF ၊ MMU စတဲ့ မဟာမိတ် ပူးပေါင်းအဖွဲ့ တွေ ဆောင်ရွက်တာ ဖြစ်တယ်လို့ သိရပါတယ်။
ဝက်လက်တိုက်ပွဲတွေနဲ့ ပတ်သက်ပြီး ဝက်လက်မြို့နယ် မီးသတ်ရုံးကို ဇန်နဝါရီ ၂၃ ရက်က PDF တွေ လာရောက် ပစ်ခတ်တယ် ဆိုတာနဲ့ ၂၄ ရက်နေ့မှာ အမှတ် (၁) ရပ်ကွက်က လုံခြုံရေးအဖွဲ့တွေကို လက်လုပ် စိန်ပြောင်းတွေနဲ့ ပစ်ခတ်တဲ့ အတွက် ကလေးငယ် တစ်ဦး သေဆုံးကာ တိုက်ပွဲတွေ အတွင်း PDF ၇ ဦးခန့် အသေပစ်ခတ်မိပြီး လက်နက်တွေ သိမ်းဆည်းရမိတယ်လို့ စစ်တပ်ပိုင် သတင်းဌာနတွေက ဖော်ပြထားပါတယ်။
ဓာတ်ပုံ-PAFD။
MK-003
