မဲခေါင်၊ ဇန်နဝါရီ ၂၃
ရန်ကုန်တိုင်း စစ်ကြောရေး တာဝန်ခံ ဗိုလ်မှူးသန်းထွဋ်နဲ့ တပ်ကြပ်ကြီးမြင့်အောင် တိုကို ပစ်ခတ်ဖမ်းဆီးပြီး လက်နက်တွေ သိမ်းဆည်းရရှိတယ်လို့ Bago Region PDF က ဒီကနေ့ ထုတ်ပြန်ပါတယ်။
မနေ့က နေ့လယ် ၁ နာရီ ၄၅ မိနစ် အချိန်မှာ ရန်ကုန် – မန္တလေး အမြန်လမ်း မိုင်တိုင် ၁၆၁ အနီးမှာ UG တော်လှန်ရေး ရဲဘော်တွေကို အသွင်ယူ စုံစမ်းဖမ်းဆီးလျက်ရှိတဲ့ ရန်ကုန်တိုင်း စစ်ကြောရေး တာဝန်ခံ ဗိုလ်မှူးသန်းထွဋ် (ဒုဗိုလ်မှူးကြီး အစမ်းခန့်)နဲ့ တပ်ကြပ်ကြီးမြင့်အောင်တို့ကို တောင်ငူခရိုင် PDF တပ်ရင်း (၃၅၀၁)၊ တပ်ခွဲ (၃) နဲ့ တပ်ခွဲ (၆) ပူးပေါင်းအဖွဲ့က ပစ်ခတ်ဖမ်းဆီးခဲ့တာပါ။
UG တွေရဲ့ သတင်းကွင်းဆက်တွေ လိုက်လံစုံစမ်းပြီး လက်နက်တွေ ဝယ်ယူမယ်လို့ အကြောင်းပြကာ ဖမ်းဆီးတာတွေ ပြုလုပ်နေတဲ့ ရန်ကုန်တိုင်း ၉ မိုင်ခွဲ ပြည်လမ်း North Point – Ocean စင်တာ အနီးရှိ အမှတ် (၁) စစ်ဘက်ရေးရာ လုံခြုံရေးအကူတပ်၊ စစ်ကြောရေး တာဝန်ခံ၊ စရက(၁)တပ်မှူး ဗိုလ်မှူးသန်းထွဋ် (ဒုဗိုလ်မှူးကြီး အစမ်းခန့်) နဲ့ တပ်ကြပ်ကြီး မြင့်အောင်တို့ လိုက်ပါလာတဲ့ ယာဉ်အမှတ် YGN. 2N 6158 TOYOTA VANGUARD အမဲရောင်ယာဉ်နဲ့ ရန်ကုန်-မန္တလေး အမြန်လမ်းအတိုင်း ထွက်ခွာလာတယ်ဆိုတာ YUA အဖွဲ့ရဲ့ သတင်း ပေးပို့မှုအရ တော်လှန်ရေးတပ်ဖွဲ့ဝင်တွေ ကင်းပုန်းဝပ်ပြီး စောင့်ဆိုင်းကာ အဲဒီကားကို ရပ်တန့်စေခဲ့တယ်လို့ သိရပါတယ်။
အဆိုပါ ကားပေါ်မှာ လူ ၄ ဦး လိုက်ပါလာပြီး ကားရပ်တန့်ပြီးနောက် တော်လှန်ရေးတပ်ဖွဲ့ဝင်တွေက ဝိုင်းဝန်း ပိတ်ဆို့ ဖမ်းဆီးစဉ် ၂ ဦးမှ အသင့်ပါလာတဲ့ လက်နက်တွေနဲ့ ပြန်လည်ခုခံလို့ ပစ်ခတ် ဖမ်းဆီးရာ ပွဲချင်းပြီး သေဆုံးသွားခဲ့တယ်လို့ သိရပါတယ်။
သေဆုံးသူ စစ်ကောင်စီ ဗိုလ်မှူးနဲ့ တပ်ကြပ် ၂ ဦးထံမှ ၉မမ ပစ္စတို ၂ လက်၊ ကျည် ၁၂ တောင့်၊ ယာဉ်လိုင်စင်နဲ့ စာရွက်စာတမ်း အချို့ကို သိမ်းဆည်းရရှိခဲ့ပြီး မော်တော်ယာဉ်ကို မီးရှို့ဖျက်ဆီးခဲ့တယ်လို့ ဆိုပါတယ်။
ဒါ့အပြင် အတူပါလာတဲ့ အမျိုးသား ၂ ဦးကို စစ်ဆေးမေးမြန်းဖို့ ခေါ်ဆောင်လာစဉ် လက်နက် လုယူထွက်ပြေးဖို့ ကြိုးစားတာကြောင့် တော်လှန်ရေးရဲဘော်တွေ ပစ်ခတ်ဖမ်းဆီးစဉ် သေဆုံးသွားလို့ အခင်းဖြစ် ကားပေါ်ပါ ၄ ဦးလုံး သေဆုံးသွားတယ်လို့ ဆိုပါတယ်။
အဲဒီ စစ်ဆင်ရေးမှာ တော်လှန်ရေးတပ်ဖွဲ့ဝင်တွေ ထိခိုက်ဒဏ်ရာမရှိဘဲ အောင်မြင်စွာ ဆုတ်ခွာနိုင်ခဲ့တယ်လို့ သိရပါတယ်။
MK-003
