မဲခေါင်၊ ဇန်နဝါရီ ၂၁

ရန်ကုန်တိုင်း၊ တောင်ဥက္ကလာပမြို့နယ်၊ (၁၄) ရပ်ကွက် အုပ်ချုပ်ရေးမှူးရုံးကို လက်ပစ်ဗုံးနဲ့ လာရောက် တိုက်ခိုက်တဲ့ လူငယ် ၂ ဦးကို ငွေတောင် စားသောက်ဆိုင်မှ ဝန်ထမ်းတွေက ဝိုင်းဝန်း ဖမ်းဆီးခဲ့တယ်လို့ ဒေသခံတွေက ပြောပါတယ်။

ဒီနေ့ ဇန်နဝါရီ ၂၁ ရက် နေ့လယ် ၁၂ နာရီ ဝန်းကျင်က ရပ်ကွက် အုပ်ချုပ်ရေးမှူးရုံးကို လက်ပစ်ဗုံးနဲ့ လာရောက် ပစ်ခတ်တဲ့ လူငယ် ၂ ဦးကို အနီးရှိ စားသောက်ဆိုင် ဝန်ထမ်းတွေက လိုက်လံ ဖမ်းဆီး ရိုက်နှက်ခဲ့တာ ဖြစ်တယ်လို့ ဒေသခံ တစ်ဦးက ပြောပါတယ်။

“ပထမ တစ်လုံးပေါက်ပြီး ထွက်ပြေးလာတဲ့ ကလေး ၂ ယောက်ကို ဝိုင်းဖမ်းကြတာ။ ဖမ်းတဲ့ကောင်တွေက အဲ့စားသောက်ဆိုင်က ကောင်တွေ ဖမ်းတာ။ မိသွားတဲ့ ကလေး တစ်ယောက်ကို ဝိုင်းရိုက်တာများ မြင်မကောင်းဘူး။ အဲ့ဆိုင်က စစ်တပ်နဲ့ ပတ်သက်ပြီး လူပါးဝနေတာ ကြာပြီ။ အန်တီက မြင်ပေမယ့် မကူညီရဲလို့ စိတ်မကောင်း ဖြစ်နေရတာ။ တစ်ယောက်ကတော့ ပြေးတာ လွတ်သွားတယ်။ ဖမ်းခံရတဲ့ သားလေးကတော့ မတွေးရဲဘူး” လို့ မျက်မြင်တွေ့သူ အမျိုးသမီး တစ်ဦးက ပြောပါတယ်။

ရိုက်နှက် ဖမ်းဆီးခံရတဲ့ လူငယ်မှာ ထိခိုက်ဒဏ်ရာ အများအပြား ရရှိထားပြီး အသက်အန္တရယ် စိုးရိမ်ရတဲ့ အခြေအနေမှာ ရှိတယ်လို့ ဝိုင်းဝန်း ရိုက်နှက်မှုကို မြင်တွေ့ခဲ့ရသူ တစ်ဦးက ပြောပါတယ်။

ရန်ကုန်မြို့နေ ပြည်သူတွေ အနေနဲ့ တော်လှန်ရေး အတွက် တိုက်ခိုက်နေတဲ့ ရဲဘော်တွေကို ဝိုင်းဝန်း ကူညီပေးဖို့နဲ့ ဝိုင်းဝန်း ဖမ်းဆီးတာတွေ မပြုလုပ်ကြဖို့ မြို့ပြပြောက်ကျားတပ်ဖွဲ့တွေက မေတ္တရပ်ခံ ထားပေမယ့် အခုလို ဝိုင်းဝန်း ဖမ်းဆီးမှု ပေါ်ပေါက်လာတာ ဖြစ်ပါတယ်။

MK-005

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)