မဲခေါင်၊ ဇန်နဝါရီ ၁၇
ရန်ကုန်မြို့ အပါအဝင် နိုင်ငံတဝှမ်းက ရုံးတွေမှာ စစ်ကောင်စီက နိုင်ငံကူးလက်မှတ် ထုတ်ပေးတဲ့လုပ်ငန်းစဉ်တွေ ရပ်ဆိုင်းထားတာကြောင့် ပြည်သူတွေ အခက်တွေ့နေပြီး အရေးပေါ် စာအုပ် လိုအပ်သူတွေ နည်းလမ်းပေါင်းစုံနဲ့ လိမ်လည်ခံနေရတာတွေရှိနေတယ်လို့ သိရပါတယ်။
ပြီးခဲ့တဲ့ ဒီဇင်ဘာလကုန်က စတင်ကာ နိုင်ငံကူး လက်မှတ် ထုတ်ပေးတဲ့ လုပ်ငန်းစဉ် တချို့ကို ရပ်ဆိုင်းခဲ့တာ ဖြစ်ပြီး အဲ့ဒီ မတိုင်ခင်ကလည်း လိမ်လည်မှုတွေ ရှိခဲ့ပေမယ့် အခုချိန်မှာ လိမ်လည်မှုတွေ ပိုများလာကာ အခြေအနေ ပိုဆိုးလာတယ်လို့ သိရပါတယ်။
“စာအုပ်ထုတ်ပေးတာက အခု လုံး၀ ရပ်ထားတယ်။ ဘယ်သူနဲ့ ပိုင်တယ်၊ ဘယ်သူက လုပ်ပေးနေတာ ဆိုတာတွေ ပြောပြီး လိမ်နေတာတွေ အများကြီး ဖြစ်နေတယ်။ အခုက စာအုပ် အသစ် လုပ်မပေးပေမယ့် ရုံးတွေက ဖွင့်ထားတော့ အရေးတကြီး လိုအပ်နေသူတွေကတော့ လာကြတာပေါ့။ အဲတော့ လိမ်တဲ့သူတွေနဲ့ တွေ့ပြီး အလိမ်ခံရတာတွေ အများကြီး ဖြစ်နေတယ်။ အွန်လိုင်းကလည်း လိမ်တယ်။ နည်းလမ်းပေါင်းစုံပဲ” လို့ နိုင်ငံကူး လက်မှတ် ဝန်ဆောင်မှု ပေးနေသူ တစ်ဦးက ပြောပါတယ်။
မနေ့က ရန်ကုန်မြို့ရှိ နိုင်ငံကူးလက်ရုံး သွားခဲ့သူတွေကို လူလိမ်အဖွဲ့က ရုံးထဲ ဖုန်းသယ်လို့ မရဘူးလို့ ပြောဆိုကာ သိမ်းယူသွားလို့ ဖုန်း ၁၅ လုံးခန့် ပါသွားတယ်လို့ သူက ပြောပါတယ်။
“လိမ်တာကတော့ အစုံပဲ။ အရင်ကတည်းက လိမ်ကြတာ ခုက ပိုဆိုးတယ်။ Group တွေပါထောင်ပြီး Admin ကိုယ်တိုင်က အလိမ်တွေရှိတယ်။ အမြဲဝင် လေ့လာနေတော့ အလိမ်တွေမှန်း အကြမ်းဖျင်း ခွဲနိုင်တယ်။ အဲ့ဒါကြောင့် အမြဲပို့စ်တင် သတိပေးတယ်” လို့ ဝါရင့် နိုင်ငံကူးလက်မှတ် ဝန်ဆောင်မှု ပေးနေသူ တစ်ဦးက မဲခေါင်သတင်းကို ပြောပါတယ်။
နိုင်ငံကူးလက်မှတ် လုပ်ဖို့ ကြိုတင် ရက်ချိန်းယူနိုင်တဲ့ QR စနစ်ကို ဒီဇင်ဘာ ၅ ရက်နေ့က စတင် ရပ်ဆိုင်း လိုက်ပြီး QR ရပြီးသူတွေရဲ့ နောက်ပိုင်း လုပ်ငန်းစဉ်တွေကို ဆက်လက် လုပ်ကိုင်ပေးခဲ့ ပေမယ့် ဇန်နဝါရီ ၂ ရက်နဲ့ ၃ ရက်နေ့တွေမှာ နိုင်ငံကူး လက်မှတ် ထုတ်ပေးတဲ့ လုပ်ငန်းစဉ် အားလုံးကို ရပ်ဆိုင်းခဲ့ပါတယ်။
အဲ့ဒီနောက် ဇန်နဝါရီ ၅ ရက်မှာတော့ ရုံးပြန်ဖွင့်ခဲ့ပြီး MOU စာချုပ်ချုပ်ထားသူတွေနဲ့ ဗုဒ္ဓဂါယာ ဘုရားဖူးတွေက လွဲရင် တခြား ကိစ္စနဲ့ စာအုပ်လုပ်သူတွေရဲ့ လုပ်ငန်းစဉ်တွေကို ရပ်ဆိုင်းထားခဲ့ပါတယ်။
“ခုက ရုံးက ဝန်ဆောင်မှု ပြန်ပေးရင် ဝင်ဖို့စောင့်ကြသူထဲမှာ နိုင်ငံခြားမှာ အလုပ်ကရပြီးသား Passport မရှိလို့ အလုပ်ကို လက်လွှတ်ရမလို ဖြစ်နေတဲ့သူတွေ၊ ကျောင်းအပ်ထားသူတွေရော အကုန်ဒုက္ခ ဖြစ်နေကြတာ။ အစ်မဆီကို ငိုပြီး လာပြောသူတွေလည်း ရှိတယ်။ အစ်မတို့လည်း ဘာမှ လုပ်ပေးလို့မရနဲ့ တကယ် ရင်နာစရာ ကောင်းတယ်” လို့ နိုင်ငံကူးလက်မှတ် ဝန်ဆောင်မှု ပေးနေသူက ပြောပါတယ်။
နိုင်ငံကူးလက်မှတ် လိုအပ်နေသူတွေထဲမှာ အလုပ်အကိုင်၊ ပညာရေးအပြင် ကျန်းမာရေး အတွက် နိုင်ငံခြားမှာ ဆေးဝါးကုသမယ့် သူတွေလည်း ပါဝင်တယ်လို့ သိရပါတယ်။
နိုင်ငံကူး လက်မှတ် လျှောက်ထားတဲ့ လုပ်ငန်းစဉ်တွေကို ယာယီ ရပ်ဆိုင်းထားတယ်လို့ မြန်မာ ပြည်ပ အလုပ်အကိုင် ဝန်ဆောင်မှု လုပ်ငန်းရှင်များ အဖွဲ့ချုပ်က မနေ့က ထုတ်ပြန်တာကြောင့် လက်ရှိ နိုင်ငံကူး လက်မှတ် ရဖို့ ပိုမို ခက်ခဲလာပြီး ပြည်ပ အလုပ်အကိုင်တွေပါ မရေမရာ ဖြစ်နေတယ်လို့ သိရပါတယ်။
MK-009
