မဲခေါင်၊ ဇူလိုင် ၁၅
ရှမ်းပြည်တောင်ပိုင်း၊ ဓနုဒေသ၊ ရွာငံမြို့နယ်၊ မြင်းကျဒိုးကျေးရွာမှ ဓနုတိုင်းရင်းသားလူမျိုးများ ဒီမိုကရေစီပါတီ – DNDP ဒုတိယဥက္ကဋ္ဌ ဦးစံတင့်နှင့် ဝက်ဒိုင်လုပ်ကိုင်သူ ဦးအောင်ဝင်းစိန်တို့ ၂ ဦးကို အမည်မသိ လက်နက်ကိုင်အဖွဲ့က ဖမ်းဆီးခေါ်ဆောင်သွားပြီးနောက် သတ်ဖြတ်ခံခဲ့ရကြောင်း ဒေသတွင်းသတင်းအရ သိရသည်။
၎င်းတို့အား ယမန်နေ့ ဇူလိုင် ၁၄ ရက်၊ ညပိုင်းက ညောင်ပင်ခွကျေးရွာတွင် လာရောက်ဖမ်းဆီး ခေါ်ဆောင်သွားခဲ့ပြီးနောက် သတ်ဖြတ်ခံခဲ့ရခြင်း ဖြစ်ကြောင်း သိရသည်။
ဦးစံတင့် သတ်ဖြတ်ခံရမှုနှင့် ပတ်သက်၍ DNDP ကိုယ်စားပြုပြီး ကလောမြို့နယ်မှ ပြည်နယ်လွှတ်တော် ကိုယ်စားလှယ် ဝင်ရောက်ယှဥ်ပြိုင်ခဲ့ဖူးသူ ဦးမင်းလွင်ဦးက “ဓနုအမျိုးသားရေးသက်သက် ရည်ရွယ်ပြီး စွမ်းဆောင်ပေးနေတဲ့ ဦးစံတင့်ရေ ဘ၀ဆက်တိုင်း ဤကဲ့သို့ အဖြစ်ဆိုးတွေနဲ့ မတွေ့ကြုံရပါစေနဲ့လို့သာ ဆုတောင်းပေးရုံမှတစ်ပါး အခြားထိရောက်တဲ့ ကူညီမှုတွေ မပေးနိုင်လို့ပိုပြီး ၀မ်းနည်း ကြေကွဲမိပါတယ်။ ရွာငံမြိုနယ် မြင်းကျဒိုးကျေးရွာအိုးစည်(ဓနု)ပါတီ(ဗဟို) ဒု-ဥက္ကဌ ဦးစံတင့် ဇူလိုင်လ ၁၄ ရက် အင်္ဂါနေ့ည၊ ညောင်ပင်ခွကျေးရွာအတွင်း ကွယ်လွန်တိမ်းပါးသွားခဲ့ပြီ ဖြစ်ပါကြောင်း အသိပေးအကြောင်းကြားအပ်ပါတယ်” ဟု ၎င်း၏ ဖေ့စ်ဘွခ်စာမျက်နှာတွင် ရေးသားဖော်ပြထားသည်။
သတ်ဖြတ်ခံရသူ ၂ ဦးအနက် ဦးစံတင့်သည် စစ်ကောင်စီတပ်များ အသုံးပြုရန် ကျေးရွာအတွင်းရှိ ကားများကို ချောဆွဲခေါ်ဆောင်ပေးနေရသူ ဖြစ်ပြီး ဒေသခံပြည်သူ့ကာကွယ်ရေးတပ်ဖွဲ့(PDF) များက သတိပေးစာများ ပေးပို့ခံခဲ့ရပြီး နောက်ပိုင်းတွင် ၎င်းအနေဖြင့် အသွားအလာ ဆင်ခြင်နေထိုင်ခဲ့သော်လည်း ယခုတွင် ဖမ်းဆီးသတ်ဖြတ်ခံခဲ့ရခြင်း ဖြစ်သည်ဟု ဒေသခံများက ဆိုသည်။
“မြင်းဂျဒိုး ဝက်ဒိုင် ဦးအောင်ဝင်းစိန်က အရင်သတ်ခံလိုက်ရတဲ့ ပျူခေါင်းဆောင် ဦးဝင်းမြင့်အောက်က၊ ဦးဝင်းမြင့် လက်အောက်ကနေ သွားတာ သူက။ အခုကတော့ ဦးဝင်းမြင့် မရှိတော့ဘူး၊ သူ့ခြေသူလက် လုပ်နေတာပေါ့။ ဒါပေမယ့် ဟို ဦးဝင်းမြင့် လုပ်သလောက်ကြီး ကျယ်ကျယ်ပြန့်ပြန့်မျိုးတော့ မဟုတ်ဘူး။ သူ့ပတ်ဝန်းကျင်မှာတော့ သူဆရာလုပ်နေတာပေါ့၊ အဲဘက် အဲနားမှာလည်း ရှိတော့ ရှိသေးတယ်။ အဲလိုမျိုး စကစ လက်ပတ်ဆွဲ လုပ်နေတဲ့ဟာတွေတော့ ရှိတော့ ရှိသေးတယ်” ဟု အသတ်ခံရသည့် ဦးစိန်ဝင်းအောင်နှင့်ပတ်သက်၍ ဓနုပြည်နယ်အမျိုးသားကာကွယ်ရေးတပ်တော် DSNDA မှ တာဝန်ရှိသူတစ်ဦးက မဲခေါင်သို့ ပြောသည်။
ယခုသတ်ဖြတ်မှုကို PDF အဖွဲ့တစ်ခုက လာရောက် သတ်ဖြတ်သွားခြင်း ဖြစ်သည်ဟု သတင်းများ ထွက်ပေါ်နေသော်လည်း မည်သည့်အဖွဲ့အစည်းဟု ကြေညာခြင်း၊ သိရှိရခြင်း မရှိသေးပေ။
ဓနုဒေသအတွင်း သတ်ဖြတ်မှု ဖြစ်စဉ်အများစုတွင် မည်သည့်အဖွဲ့အစည်းက လုပ်ဆောင်သည်ကို ထုတ်ပြန်ကြေညာခြင်း မရှိသလို၊ လုပ်ဆောင်သူကိုလည်း ဖော်ထုတ်နိုင်ခြင်း မရှိပေ။
ယင်းဓနုဒေသ၊ ပင်းတယ၊ ရွာငံနယ်တွင် DSNDA၊ Danu 103 PDF နှင့် DPLA တော်လှန်ရေးအဖွဲ့များက စစ်ကောင်စီကို ခုခံတိုက်ခိုက်လျက်ရှိကြောင်း သိရသည်။
#MeKongNews
#ရွာငံ
#DNDP
#ဒုဥက္ကဋ္ဌ
#ဝက်ဒိုင်လုပ်ငန်းရှင်
#သတ်ဖြတ်ခံရ
