မဲခေါင်၊ ဇူလိုင် ၃
ရှမ်းပြည်မြောက်ပိုင်း၊ မူဆယ်မြို့နယ်တွင် အုပ်ချုပ်ရေးမှူးအဖြစ် ကိုးကန့်တပ်ဖွဲ့ – MNDAA က ပြန်လည် ခန့်အပ်ထားသည့် စစ်ကောင်စီ အုပ်ချုပ်ရေးမှူးဟောင်းက ကျေးရွာပိုင်မြေကို သိမ်းပြီး ဒေသခံပြည်သူကိုလည်း ထပ်မံ တရားစွဲဆိုနေသည်ဟု သတင်းရင်းမြစ်များထံမှ သိရသည်။
ကိုးကန့်တပ်ဖွဲ့က မူဆယ် ၁၀၅ မိုင်၊ မိုင်းယုကျေးရွာအုပ်စု အုပ်ချုပ်ရေးမှူးအဖြစ် ခန့်အပ်ထားသည့် အုပ်ချုပ်ရေးမှူး ဦးမောင်အေးဆိုသူသည် ၁၀၅ မိုင်ဒေသ အောက်နမ့်ဟွယ်ကျေးရွာပိုင်မြေကို ၎င်းပိုင်သည်ဟု ဆိုကာ သိမ်းယူနေသည့်အပြင် ဒေသခံပြည်သူကိုပါ ၁၀၅ မိုင်ရှိ ညီနောင်မဟာမိတ်ရုံးတွင် တရားစွဲဆိုထားသည်ဟု သတင်းရင်းမြစ်များက ပြောသည်။
မူဆယ်မြို့နယ်၊ ၁၀၅ မိုင်မှ ကြူကုတ်(ပန်ဆိုင်း)သွားသည့် လမ်းမကြီးဘေးတွင်ရှိသည့် အောက်နမ့်ဟွယ်ကျေးရွာ၏ ကျေးရွာပိုင်ဘုံမြေကို ဒေသခံများက တရွာလုံး၏ သဘောတူညီချက်ဖြင့် ရွာရံပုံငွေရရှိရေး ကျောက်ထုတ်လုပ်ငန်း လုပ်ဆောင်ရန် ပြင်ဆင်နေချိန်တွင် ၁၀၅ မိုင် အုပ်ချုပ်ရေးမှူး ဖြစ်သူ ဦးမောင်အေးက ၎င်းပိုင်မြေဖြစ်ကြောင်း ပြောဆိုကာ တားမြစ်လာခဲ့ခြင်းဖြစ်သည်။
“ကျေးရွာရန်ပုံငွေ ရှိအောင်လို့ ရွာကနေပြီး ကျောက်ထုတ်ဖို့ လုပ်တဲ့အခါမှ အဲဒီမြေ ရွာမပိုင်တော့ဘူး သူပိုင်တဲ့မြေ ဖြစ်သွားပြီဆိုပြီးတော့ အုပ်ချုပ်ရေးမှူးက လာတားတယ်။ အမှန်က ဒီမြေက အများပိုင်မြေဆိုတာ တစ်ရွာလုံးသိတယ်။ ရပ်မိရပ်ဖတွေကလည်း ကျေးရွာပိုင်မြေလို့ ပြောတယ်။ ရွာရန်ပုံငွေအတွက်ဆို စုပြီး လုပ်လို့ရတယ်လို့ ခွင့်ပြုထားတယ်။ ဒါကို အုပ်ချုပ်ရေးမှူးက သက်သက်လာပြီး အာဏာပါဝါနဲ့ သူပိုင်တယ်ဆိုပြီး သိမ်းနေတယ်” ဟု သတင်းရင်းမြစ်က ပြောသည်။
လက်ရှိတွင် အုပ်ချုပ်ရေးမှူး ဦးမောင်အေးက အောက်နမ့်ဟွယ်ကျေးရွာ လူငယ်ခေါင်းဆောင်များကို ၁၀၅ မိုင်ရှိ မဟာမိတ်အုပ်ချုပ်ရေးကော်မတီရုံးတွင် တရားစွဲဆိုစာတင်ထားသဖြင့် အုပ်ချုပ်ရေးရုံးက ကျေးရွာဥက္ကများကို ခေါ်ယူကာ စာရွက်စာတမ်းများ ပြင်ဆင်ထားကြရန် အချိန် ၂ ပတ် ချိန်းဆိုထားသည်ဟု သတင်းရင်းမြစ်များထံမှ သိရသည်။
ဦးမောင်အေးသည် နမ့်ဟွမ်ကျေးရွာသားဖြစ်ပြီး စစ်ကောင်စီ ထိန်းချုပ်စဉ်ကလည်း အုပ်ချုပ်ရေးမှူးလုပ်ခဲ့သူ ဖြစ်ကာ ကိုးကန့်တပ်က ထိန်းချုပ်သည့် အခါတွင်လည်း ကိုးကန့်တပ်ဖွဲ့က အုပ်ချုပ်ရေးမှူး ရာထူး ဆက်ပေးထားသူ ဖြစ်သည်။
“စကစတုန်းကလည်း သူကအုပ်ချုပ်ရေးမှူးပဲ၊ အခုကိုးကန့်ထိန်းတော့လည်း သူ့ကိုပဲ အုပ်ချုပ်ရေးမှူး ဆက်ပေးထားတယ်။ အခုအမှုနဲ့ ပတ်သက်ပြီးတော့ မနေ့ကလည်း ၁၀၅ မိုင်မှာ ညီနောင်မဟာမိတ် အုပ်ချုပ်ရေးကော်မတီက ခေါ်ပြီး အစည်းအဝေးလုပ်တာ ညီနောင်မဟာမိတ်အဖွဲ့ကလည်း ဒေသခံတွေပြောတာကို သိပ်နားမထောင်ပဲ သူတို့ခန့်ထားတဲ့ အုပ်ချုပ်ရေးမှူးဘက်ကိုပဲ လိုက်ပြောနေတယ်။ ညီနောင်မဟာမိတ်ရုံးဆိုပေမယ့် အကုန်လုံးက ကိုးကန့်တပ်ကပဲ။ တအာင်းတပ်က ဒီမှာ မရှိတော့ဘူး။ အုပ်ချုပ်ရေးက အဓိက ကိုးကန့်ပဲ ကိုင်တာလေ။ တရားမျှတမှု ရဖို့တော့ မလွယ်တော့တဲ့ အခြေအနေမှာရှိနေတယ်။
အခုဆို အုပ်ချုပ်ရေးမှူးက ကိုးကန့်တပ်ကအားကိုးနဲ့ ရွာကိုတောင် ပြန်ခြိမ်းခြောက်နေတယ်”ဟု ဒေသခံသတင်းရင်းမြစ်က ပြောသည်။
ကျေးရွာအုပ်ချုပ်ရေးမှူး ဦးမောင်အေးသည် လက်ရှိတွင် နမ့်ဟွယ်ကျေးရွာမှ လူငယ်ခေါင်းဆောင်များကို ကိုးကန့်တပ်ဖွဲ့ – MNDAA နှင့် အာရက္ခတပ်တော် – AA တို့ ပူးတွဲထိန်းချုပ်သည့် ၁၀၅ မိုင်ရှိ အုပ်ချုပ်ရေးကော်မတီထံတွင် တရားစွဲစာတင်ထားပြီး ကျေးရွာကိုလည်း ခြိမ်းခြောက်မှု ပြုလုပ်နေသည်။
တစ်ဧကခွဲ့ခန့်ရှိသည့် ယင်းမြေနေရာသည် လွန်ခဲ့သည့် နှစ်ပေါင်း ၃၀ ကျော်ကတည်းက ကျေးရွာပိုင်မြေဖြစ်ပြီး မည်သူကိုမှ ရောင်းချဖူးခြင်း မရှိကြောင်း ဒေသခံ သတင်းရင်းမြစ်များက ပြောသည်။
#MeKongNews
#မူဆယ်
#ကိုးကန့်
#အုပ်ချုပ်ရေးမှူး
#ကျေးရွာပိုင်မြေ
#တရားပြန်စွဲ
