မဲခေါင်၊ ဇူလိုင်၁
ရှမ်းပြည်တောင်ပိုင်း၊ တောင်ကြီးမြို့နယ်တွင် လျှပ်စစ်ဓာတ်အား ဖြန့်ဖြူးခြင်းနှင့် လက်လီရောင်းချခြင်းလုပ်ငန်းကို တာဝန်ယူထားသည့် လင်းသီဟ အထွေထွေဝန်ဆောင်မှု ကုမ္ပဏီက ဓာတ်အားသုံးစွဲသည့် ပြည်သူများ တွေ့ ကြုံနေရသည့် အခက်အခဲများကို ပြေလည်အောင် ဖြေရှင်းရမည့်အစား အွန်လိုင်းပိုစ့်တင်သူများကို တရားစွဲဆိုသွားမည်ဟု ခြိမ်းခြောက်စာ ထုတ်ပြန်ခဲ့ကြောင်း သိရသည်။
“အများပြည်သူ သိစေရန် ကြေညာခြင်း” ဟူသော စာကို လူမှုကွန်ရက်တွင် ထုတ်ပြန်ခဲ့ခြင်း ဖြစ်ပြီး လူမှုကွန်ရက်များတွင် ပိုစ့်တင်သူများကို ဥပဒေအရ တရားစွဲဆိုသွားမည်ဟု လင်းသီဟကုမ္ပဏီ အမှုဆောင်ဒါရိုက်တာ ဦးနေမျိုးအောင်က ထုတ်ပြန်ခဲ့ခြင်း ဖြစ်သည်။
“သုံးစွဲသူက အဆင်မပြေတာတွေ၊ ငွေလိမ်ခံရတာတွေ၊ ဆက်ဆံရေး မပြေပြစ်တာတွေကို ပြောတာကို တာဝန်ယူ ဖြေရှင်းပေးတာမျိုးမှ မရှိဘဲ။ ပြည်သူကို ဥပဒေအကြောင်းပြ တုံ့ပြန်ခြိမ်းခြောက်လာတာ။ တကယ်ဆို သူတို့က အဆင်ပြေအောင် လုပ်ပေးရမှာကို” ဟု အေးသာယာနေသူတစ်ဦးက ပြောသည်။
ပြည်သူလူထု မီတာလာဆောင်စဉ် လင်းသီဟ ကုမ္ပဏီမှ ရိုင်းပြစွာ ဆက်ဆံသည့် ကိစ္စရပ်များကို လူမှုကွန်ရက်တွင် အသိပေးမျှဝေခဲ့ရာ၊ ပြည်သူလူထုကို ပြန်လည် ဖြေရှင်းပေးရမည့် အစား ရိုင်းစိုင်းသော စကားလုံးများဖြင့် ပြန် လည် တုံ့ပြန်ခဲ့ခြင်းဖြစ်ပြီး ယင်းကုမ္ပဏီသည် အေးသာယာမြို့တွင် ကုမ္ပဏီဝန်ထမ်း လိမ်ပြေးသော ဖြစ်စဉ်ကို တာဝန်ယူ ဖြေရှင်းပေးခြင်း မရှိရုံသာမက ပြောဆိုသူ ပြည်သူများကိုသာ ဥပဒေအကြောင်းပြ၍ တည်ဆဲဥပဒေများနှင့်အညီ တရားစွဲဆိုသွားမည်ဖြစ်ကြောင်း တုံ့ပြန်ခြိမ်းခြောက်ခဲ့ခြင်းဖြစ်သည်။
“တနေ့က မီတာသွားဆောင်တဲ့ ပြည်သူတယောက်က အဲ့မီတာဆောင်တဲ့ ကောင်တာက အမျိုးသမီး ဆက်ဆံရေးညံ့ကြောင်း ရေးတင်ခဲ့တာကို အခု အဲ့နေမျိုးအောင်ဆိုတဲ့လူက လိုင်းပေါ်ကနေ အမျိုးမျိုးခြိမ်းခြောက်နေတာ”ဟု အေးသာယာနေသူတစ်ဦးက ဆိုသည်။
“ဒီနေ့မီတာသွားဆောင်တာဗျ ကျနော်က ကောင်း ကောင်းပြောတာပါ၊ ကောင်တာ၂မှာထိုင်တဲ့အန်တီကော ပြေစာထုတ်ပေးတဲ့ကောင်မလေးရောလူကိုဆက်ဆံတာ မှိုချိုး မျှစ်ချိုးဗျ၊ကောင်တာ၂မှာထိုင်တဲ့အန်တီကလဲ ကျနော်က ပထမစာရွက်ဘယ်လောက်ကျလဲမေးတာကို ငါအာ့လောက်ဦးနောက်မကောင်းဘူးတဲ့အော်ပြီးပြောတာဗျာ” ဟု မြို့ခံတစ်ဦးက လူမှုကွန်ရက်တွင် ရေးတင်ထားကြောင်းတွေ့ရသည်။
လင်းသီဟကုမ္ပဏီကို ယခင်စစ်အစိုးရဝန်ကြီး ဝဏ္ဏမောင်လွင်၏သား လုပ်ခွင့်ရထားခြင်းဖြစ်ပြီး ကုမ္ပဏီ၏ အမှုဆောင်ဒါရိုက်တာ ဦးနေမျိုးအောင် ဆိုသူမှာ DSA ၃၉ မှဟု သိရှိသူတစ်ဦးက မဲခေါင်သို့ ပြောသည်။
“အများနဲ့တစ်ယောက် စဉ်းစားကြည့်ပေါ့။ ဘာကမှားနေလဲဆိုတာ အဆင်မပြေကြလို့ ဒီလောက်ဝိုင်းထောက်ပြနေတာကို ဘာလိုအပ်ချက်ကို ပြုပြင်ရမလဲမစဉ်းစားပဲ တရားစွဲမယ်လေး ဘာလေး ခြိမ်းခြောက်မယ် ဆိုတာပဲ။ လုပ်နေတာကဖြင့် customer service”ဟု ပြည်သူတစ်ဦးကလည်း ထောက်ပြသည်။
ယင်းကုမ္ပဏီက တာဝန်ယူ လုပ်ဆောင်နေသည့်လျှပ်စစ်ဓာတ်အား ကောက်ခံခြင်း၊ မီတာခများ အကြွေးတင်နေခြင်း၊ ကုမ္ပဏီဘက်မှ မှားယွင်းခြင်း စသည့် အားနည်းချက်အားလုံးကို လူမှုကွန်ရက်စာမျက်နှာများတွင် ပြောဆိုသူ အများဆုံး ဖြစ်နေသည်ဟု လူမှုကွန်ရက် သုံးစွဲသူအများစုက မှတ်ချက်ပြုသည်။
ယခုကဲ့သို့ လင်းသီဟကုမ္ပဏီဘက်မှ ပြည်သူလူထုဘက် မကြည့်ဘဲ ကိုယ်ကျိုးဖက် တုံ့ပြန်နေမှုအပေါ် သက်ဆိုင်ရာ တာဝန်ရှိသူများမှ အရေးယူပေးရန် ဓာတ်အားသုံးစွဲသူ မြို့ခံများကလည်း တောင်းဆိုလျက်ရှိကြောင်း သိရသည်။
#MeKongNews
#ပြည်သူ့အခက်အခဲ
#အွန်လိုင်းပို့စ်
#လင်းသီဟကုမ္ပဏီ
#ခြိမ်းခြောက်
