မဲခေါင်၊ ဇွန် ၂၇
ရှမ်းပြည်မြောက်ပိုင်း၊ သီပေါမြို့နယ်တွင် အသက် ၁၄ နှစ်အရွယ် ညီမဝမ်းကွဲတော်စပ်သူ မိန်းကလေးငယ်တစ်ဦးအား အဓမ္မပြုကျင့် သတ်ဖြတ်ခဲ့သည့် အသက်၂၃ နှစ်အရွယ် အမျိုးသားတစ်ဦးကို ရှမ်းပြည်တိုးတက်ရေးပါတီ-SSPP-SSA က ဖမ်းဆီးအရေးယူလိုက်သည်။
၎င်းပြစ်မှုကျူးလွန်သူကို အရေးယူပေးရန် မိန်းကလေးငယ်၏ မိဘက တိုင်ကြားသဖြင့် SSPP တပ်ဖွဲ့က ဇွန် ၂၅ ရက် ညနေပိုင်းအချိန်တွင် ဖမ်းဆီးရမိခဲ့ခြင်းဖြစ်သည်ဟု ထုတ်ပြန်ချက်တွင်ဖော်ပြသည်။
“ပြစ်မှုကျူးလွန်သူ၏ ဝန်ခံထွက်ဆိုချက်အရ သေဆုံးသူ၏.ရုပ်အလောင်းအား ငှက်ပျောရွက်များဖြင့် ဖုံးအုပ်ပြီး ငှက်ပျောပင်တစ်ပင်အောက်တွင် စွန့်ပစ်ထားသည့်နေရာကို ၎င်းကိုယ်တိုင် လိုက်လံပြသခဲ့ပြီး သက်သေအထောက်အထားပစ္စည်းများကိုလည်း တာဝန်ရှိသူများက သိမ်းထားခဲ့ပြီဖြစ်သည်”ဟု SSPP က ထုတ်ပြန်ချက်တွင်ပြောသည်။
ယင်းပြစ်မှုကျူးလွန်သူမှာ သီပေါမြို့နယ်၊ စံဖိတ်ကျေးရွာအုပ်စု လွယ်ကျိုင်းကျေးရွာနေ စိုင်းစံ ဆိုသူဖြစ်ပြီး ကျူးလွန်ခံရပြီး အသတ်ခံရသူ အသက် ၁၄ နှစ်အရွယ် နန်းစံဟွမ်မှာ စိုင်းစံနှင့် ညီမဝမ်းကွဲတော်စပ်သူ ဖြစ်ကာ ကျေးရွာ တစ်ရွာတည်းတွင် နေထိုင်သူဖြစ်သည်။
ဖြစ်စဉ်မှာ ပြီးခဲ့သည့် ဇွန် ၁၄ ရက် နေ့လယ်ပိုင်းအချိန်တွင် စိုင်းစံဆိုသူက ညီမဝမ်းကွဲတော်စပ်သူ နန်းစံဟွမ်အား ရွာပြင်သို့ အလည်သွားရန် အကြောင်းပြ၍ ခေါ်ဆောင်သွားခဲ့ပြီး ဘော်ကြိုကျေးရွာအုပ်စု နမ့်ဟူးနွဲ့ကျေးရွာအနီးရှိ ငှက်ပျောခြံ တစ်နေရာသို့ ရောက်ရှိချိန်တွင် နန်းစံဟွမ်ကို အဓမ္မပြုကျင့်ခဲ့ခြင်းဖြစ်သည်။
ထို့နောက် နန်းစံဟွမ်ကို လည်ပင်းညှစ်သတ်ပြီး၊ ပုလင်းကွဲဖြင့် လည်ပင်း၊ ဝမ်းဗိုက်နေရာကို အကြိမ်ကြိမ် ထိုးသတ်ကာ အလောင်းကို ငှက်ပျောပင်အောက် စွန့်ပစ်ထားခဲ့ကြောင်း ပြစ်မှုကျူးလွန်သူက ဝန်ခံထွက်ဆိုသည်ဟုလည်း SSPP က ပြောသည်။
နန်းစံဟွမ် ပျောက်ဆုံးနေမှုနှင့် ပတ်သက်၍ ၎င်းမိဘများက ဇွန် ၂၅ ရက်တွင် ရှမ်းပြည်တိုးတက်ရေးပါ တီ တာဝန်ရှိသူများထံ လာရောက် တိုင်ကြားခဲ့သဖြင့် တာဝန်ရှိသူများက ချက်ချင်း စုံစမ်းဖော်ထုတ်ခဲ့ရာ ယင်းနေ့အတွင်းမှာပင် ပြစ်မှုကျူးလွန်သူကို ဖမ်းဆီးရမိခဲ့သည်ဟု ဆိုသည်။
လက်ရှိတွင် ပြစ်မှုကျူးလွန်သူကို ဆက်လက်စုံစမ်းစစ်ဆေးကာ ရှမ်းပြည်တိုးတက်ရေးပါတီ၊ ရှမ်းပြည်တပ်မတော် – SSPP/SSA ၏ ဥပဒေဖြင့် ဆက်လက်အရေးယူ ဆောင်ရွက်သွားမည်ဟု ထုတ်ပြန်ချက်တွင် ဖော်ပြသည်။
#MeKongNews
#သီပေါ
#ညီမဝမ်းကွဲ
#အဓမ္မပြုကျင့်
#သတ်ဖြတ်သူ
