မဲခေါင်၊ ဇွန် ၂၆
ဆင်းရဲမွဲတေမှု၊ အခြားရွေးချယ်စရာ နည်းလမ်းမရှိမှုတို့ကြောင့် ဘိန်းစိုက်ပျိုးခြင်းနှင့် အခြားတရားမဝင် လုပ်ငန်းများထံ တွန်းပို့ခံရသည့် ဒေသခံပြည်သူများကို ရာဇဝတ်သားများအဖြစ် သတ်မှတ်မည်မဟုတ်ဟု ည် – RCSS က ပြောသည်။
ယနေ့တွင် ကျရောက်သည့် နိုင်ငံတကာ မူးယစ်ဆေးဝါးတိုက်ဖျက်ရေးနေ့ ထုတ်ပြန်ချက်တွင် RCSS က ယင်းကဲ့သို့ ထည့်သွင်းပြောဆိုထားခြင်းဖြစ်သည်။
“ဒေသခံပြည်သူများသည် ဆင်းရဲမွဲတေမှုနှင့် အခြားရွေးချယ်စရာ နည်းလမ်းမရှိမှုတို့ကြောင့် ဘိန်းစိုက်ပျိုးခြင်းနှင့် အခြားသော တရားမဝင် လုပ်ငန်းများထံသို့ တွန်းပို့ခံရကြောင်းကို နားလည်ထား သည့်အတွက်၊ တောင်သူများနှင့် သားကောင်ဖြစ်ရသူများကို ရာဇဝတ်ကောင်များအဖြစ် သတ်မှတ်မည် မဟုတ်ကြောင်း မိမိတို့၏ ပေါ်လစီက ပြဋ္ဌာန်းထားပါသည်”ဟု RCSS က ပြောသည်။
ထိုသူများကို ရာဇဝတ်သား သတ်မှတ်ပြီး ဆောင်ရွက်မည့်အစား RCSS အနေဖြင့် ဒေသန္တရအုပ်ချုပ်ရေးယန္တရားများမှတစ်ဆင့် လူနေမှုအဆင့်အတန်း မြင့်မားလာစေရန် ဒေသခံ ပြည်သူများ၊ အရပ်ဘက်လူမှုအဖွဲ့အစည်းများ (CSOs)၊ နိုင်ငံတကာ မိတ်ဖက်များနှင့် ဟန်ချက်ညီညီ ပူးပေါင်းဆောင်ရွက်မှုအပေါ် အခြေခံ၍ လုပ်ဆောင်နေသည်ဟုလည်း ထုတ်ပြန်ချက်တွင် ပြောသည်။
ယခုကဲ့သို့ ပူးပေါင်းဆောင်ရွက်မှုမှတဆင့် အစားထိုးသီးနှံများနှင့် ပိုမိုကျယ်ပြန့်သော အစားထိုးဖွံ့ဖြိုးတိုးတက်ရေး အစီအစဉ်များကို ထိရောက်စွာ ပံ့ပိုးပေးပြီး တရားမဝင် စီးပွားရေးလုပ်ငန်းများကို ရေရှည် အစားထိုးနိုင်ရန် အခြေခံခြေလှမ်းများအဖြစ် တရားဝင်ကုန်စည်များအတွက် ဈေးကွက်ရရှိရေးနှင့် ဓလေ့ ထုံးတမ်းစဉ်လာ မြေယာပိုင်ဆိုင်ခွင့်တို့ကို ကာကွယ်ပေးနိုင်မည်ဟု RCSS က ဆိုသည်။
RCSS အနေဖြင့် ၂၀၂၅ နှင့် ၂၀၂၆ ခုနှစ်များအတွင်း ဘိန်း ၃၉၁ ဒသမ ၉၂ ဂရမ်၊ ဘိန်းဖြူ ၁၁၀ ဒသမ ၄၃ဂရမ်၊ စိတ်ကြွဆေးပြား ၁၂သန်းကျော် (၁၂,၈၅၂,၆၁၉) ပြား ဖမ်းဆီးရမိခဲ့သည်ဟုလည်း ထုတ်ပြန်ချက်တွင် ဖော်ပြသည်။
ထို့ပြင် မူးယစ်ဆေးဝါး သယ်ဆောင်ရောင်းဝယ်သူ ၇၇ ဦးနှင့် ဆက်စပ်ပစ္စည်းများဖြစ်သည့် ပစ္စတို ၆ လက်၊ ရိုင်ဖယ် ၃ လက်၊ AK47 ၈ လက်၊ AK47 ကျည်ကပ် ၁၃ ခု၊ ကျည်ဆံမျိုးစုံ ၄၂၄ တောင့်၊ လက်ပစ်ဗုံး ၁ လုံး၊ စကားပြောစက် ၈ လုံး၊ တယ်လီဖုန်း ၁၈ လုံး၊ မော်တော်ဆိုင်ကယ် ၂၅ စီး၊ လေးဘီးမော်တော်ယာဉ် ၂ စီးတို့ကိုဖမ်းဆီးခြင်း၊ သုံးစွဲသူ ၅၅၄ ဦးကို ပြန်ထည် ထူထောင်ပေးခြင်းတို့ကိုလည်း ဆောင်ရွက်ခဲ့သည်ဟု ဆိုသည်။
မူးယစ်ဆေးဝါး သုံးစွဲမှု၊ ထုတ်လုပ်မှုနှင့် တရားမဝင် ရောင်းဝယ် ဖောက်ကားမှု စသည့် ရှုပ်ထွေးသော စိန်ခေါ်မှုများကို သီးခြားခွဲ၍သော်လည်းကောင်း၊ တရားဥပဒေ စိုးမိုးရေး သက်သက်ဖြင့်သော်လည်းကောင်း ဖြေရှင်း၍မရနိုင်ပဲ အစားထိုး ဖွံ့ဖြိုးတိုးတက်ရေးသည်သာ အသေချာဆုံးသော ဖြေရှင်းနည်းဖြစ်သည်ဟု ထုတ်ပြန်ချက်တွင်ဖော်ပြသည်။
ယင်းနည်းလမ်းကို လူမှုရေး သဟဇာတဖြစ်မှုနှင့် ခိုင်မာအားကောင်းသော ဒေသန္တရ အုပ်ချုပ်ရေးအပေါ် အခြေခံ၍ တည်ဆောက်ရမည်ဖြစ်ပြီး တိုင်းရင်းသားအချင်းချင်း သဟဇာတဖြစ်ခြင်း၊ ငြိမ်းချမ်းရေး တည်ဆောက်ခြင်း၊ သက်ဆိုင်သူအားလုံးနှင့် နက်ရှိုင်းစွာ ပူးပေါင်းဆောင်ရွက်ခြင်းတို့သည် မရှိမဖြစ် လိုအပ်သော တွန်းအားများ ဖြစ်သည်ဟု RCSS က ဆိုသည်။
#MeKongNews
#ဆင်းရဲမှု
#ဘိန်းစိုက်ပြည်သူ
#ရာဇဝတ်သား
#RCSS
