မဲခေါင်၊ ဇွန် ၂၃
ရှမ်းပြည်တောင်ပိုင်း၊ တောင်ကြီးမြို့ ကန်ကြီးရပ်ကွက်၊ နယ်မြေ (၃) ရှိ ရှမ်းကွင်းအနီးတွင် ဇွန်၂၂ ရက်၊ ညနေ ၆ နာရီခွဲခန့်က အလုပ်မှ နေအိမ်သို့ ပြန်လာနေသည့် အမျိုးသမီးတစ်ဦး ဓားပြတိုက် လုယက်ခံရပြီး ဆိုင်ကယ်၊ လက်ကိုင်ဖုန်းနှင့် ငွေသားများ ပါရှိသည့် ပိုက်ဆံအိတ်တို့ ဆုံးရှုံးခဲ့ကြောင်း ဒေသခံများထံမှ သိရသည်။
ဒေသခံများ၏ ပြောကြားချက်အရ ယင်း အမျိုးသမီးသည် ဆိုင်ကယ်မောင်းနှင်၍ နေအိမ်သို့ ပြန်လာစဉ် အမည်မသိ အမျိုးသားတစ်ဦးက ဓားဖြင့် ခြိမ်းခြောက်ကာ ဆိုင်ကယ်တစ်စီး၊ လက်ကိုင်ဖုန်းတစ်လုံးနှင့် ငွေသားများ ပါရှိသည့် ပိုက်ဆံအိတ်တို့ကို လုယက် ယူဆောင်သွားခဲ့ကြောင်း သိရသည်။
ဖြစ်စဉ် ဖြစ်ပွားချိန်တွင် ရပ်ကွက်နေ ပြည်သူများက ကျူးလွန်သူအား ဝိုင်းဝန်းဖမ်းဆီးရန် ကြိုးပမ်းခဲ့သော်လည်း ၎င်း၏လက်ထဲတွင် ဓားကိုင်ဆောင်ထားသဖြင့် လုံခြုံရေးအရ စိုးရိမ်မှုများရှိခဲ့ကာ ဖမ်းဆီးနိုင်ခြင်း မရှိဘဲ လုယက်ယူဆောင်သွားသည့် ဆိုင်ကယ်ဖြင့် ထွက်ပြေးလွတ်မြောက်သွားကြောင်း သိရသည်။
“အခုနောက်ပိုင်း တောင်ကြီးမှာ ညနေပိုင်းဆိုရင် အမျိုးသမီးတွေ တစ်ယောက်တည်း သွားလာဖို့တောင် ကြောက်လာရတယ်။ လူသွားလူလာရှိတဲ့ နေရာမှာတောင် ဓားပြတိုက်တဲ့အထိ ဖြစ်လာတော့ လုံခြုံရေးကို ပိုပြီး အလေးထားဆောင်ရွက်ပေးဖို့ လိုနေပြီလို့ ထင်ပါတယ်။ အရင်က ဒီလောက်မကြောက်ရဘူး။ အခုတော့ ညနေပိုင်း အလုပ်ဆင်းပြီး အိမ်ပြန်ရင်တောင် စိုးရိမ်နေရတယ်။ လုယက်မှုတွေ များလာတော့ ပြည်သူတွေ စိတ်မအေးနိုင်တော့ဘူး” ဟု ဒေသခံအမျိုးသမီးတစ်ဦးက မဲခေါင်သို့ ပြောသည်။
လက်ရှိတွင် ယင်းဖြစ်စဉ်နှင့် ပတ်သက်၍ သက်ဆိုင်ရာ တာဝန်ရှိသူများက စုံစမ်းစစ်ဆေးမှုများ ဆက်လက် ဆောင်ရွက်နေကြောင်း သိရသည်။
#MeKongNews
#တောင်ကြီး
#အမျိုးသမီးတစ်ဦး
#ဓားပြတိုက်
#လုယက်
